އަފްޣާނިސްތާނުގެ އިޤްތިޞާދީ މިޞްރާބު ޒާތީ ފުދުންތެރިކަމާ ދިމާއަށް: ކިހާ ވަރަކުން ދާނެބާ؟
4 ޖެނުއަރީ 2023 | ބުދަ 05:39ޠާލިބާނުން އަފްޣާނިސްތާނުގެ ކޮންޓްރޯލް ނެގުމާއެކު، ބައިނަލްއަޤުވާމީ މައިދާނުން އަފްޣާނިސްތާނު ވަނީ އެކަހެރި ކޮށްފައި
ހާޖީ ނޫރުއްދީން އަޒީޒީ؛ އަފްޣާނިސްތާނުގެ އެކްޓިންގް ކޮމަރސް މިނިސްޓަރ
އަފްޣާނިސްތާނުގައި މިއަދު އޮތް ސަރުކާރަކީ އިޤްތީޞާދީ ޒާތީ ފުދުންތެރިކަން ނުވަތަ ސެލްފް-ސަފިޝަންސީ ކަށަވަރުކޮށް، ބިދޭސީ އިންވެސްޓްމަންޓްތަކަށް މަރުޙަބާ ކިއާ ސަރުކާރެއް ކަމަށް، ގަދަ ބާރުން އަފްޣާނިސްތާނުގެ ކޮންޓްރޯލް ނަގައިގެން އޮތް ހަތިޔާރު އެޅި ހަނގުރާމަވެރި ޠާލިބާން ޖަމާޢަތުން އަފްޣާނިސްތާނުގައި އެކުލަވާލި ކެބިނެޓްގައި، ވިޔަފާރިއާ ބެހޭ ވަޒީރުގެ ކަމުގެ މަޤާމު، ވަޤުތީ ގޮތުން އަދާ ކުރަމުން ދާ ހާޖީ ނޫރުއްދީން އަޒީޒީ ބުނެފިއެވެ.
މިފަދަ ރޫހެއްގައި ނޫރުއްދީން ވާހަކަދައްކާފައި ވާ މި ދަނޑިވަޅަކީ، އަންހެނުންނާ ދެކޮޅަށް ޠާލިބާނު ސަރުކާރުން ތަންފީޒު ކުރަމުންދާ ސިލްސިލާ، ހަރުކަށި ފިޔަވަޅުތަކުގެ ސަބަބުން، ބައިނަލްއަޤުވާމީ މައިދާނުގައި އިންތިހާއަށް އަފްޣާނިސްތާނު ބާކީވެފައި ވާ ދަނޑިވަޅެކެވެ.
ނޫރުއްދީން ބުނާ ގޮތުގައި ޠާލިބާން ސަރުކާރުން އަފްޣާނިސްތާނުގައި ވެރިކަން ހިންގުމުގެ އިސްތިރާޖުގެ އަނެއް ބަޔަކީ، ވިޔަފާރި ކުރިއަރުވާ، ބޭރުގެ އިންވެސްޓްމަންޓްތައް އިތުރު ކުރުމެވެ.
އީރާން، ރަޝިއާ އަދި ޗައިނާ ފަދަ ޤައުމުތަކުން އަފްޣާނިސްތާނާއެކު ވިޔަފާރިކޮށް، އިންވެސްޓް ކުރުމަށް ޝަޢުޤުވެރި ވާ ކަމަށް ނޫރުއްދީން ފާހަގަ ކުރެއެވެ. އެގޮތުން ސިނާޢީ ޕާކުތައް އެޅުމާއި، ހަކަތައިގެ ޕްލާންޓްތައް ޤާއިމު ކުރުމުގެ މަޝްވަރާތައް، ޗައިނާއާއެކު ކުރިއަށް ދާ ކަމަށާ، އެ ކަންކަން ކުރިއަށް ދަނީ ރަޝިއާއާއި އީރާނުގެވެސް ބައިވެރިވުމާ އެކުގައި ކަމަށް ނޫރުއްދީން ބުނެފައިވެއެވެ.
ޠާލިބާނުން އަފްޣާނިސްތާނުގެ ކޮންޓްރޯލް ނެގުމާއެކު، ބައިނަލްއަޤުވާމީ މައިދާނުން އަފްޣާނިސްތާނު އެކަހެރި ކުރިއެވެ. އަފްޣާނިސްތާނުގެ އަދުގެ ސަރުކާރަކީ ބައިނަލްއަޤުވާމީ ފެންވަރުގައި ބަލައިގެންފައިވާ ސަރުކާރެއްވެސް ނޫނެވެ. ޤައުމުގެ ބޭންކިންގް ދާއިރާ ވަނީ މުޅިން އިނދަޖެހިފައެވެ. ނަތީޖާއެއްގެ ގޮތުން، އަފްޣާނިސްތާނުގައި އިންވެސްޓް ކުރުމާ މެދު، ބިދޭސީ އިންވެސްޓަރުންގެ މެދުގައި ވަނީ ކަންބޮޑުވުން އުފެދިފައެވެ. އަފްޣާނިސްތާނުގައި ހަރަކާތްތެރިވާ އައިސިސް ޖަމާއަތުން، ބިދޭސީ އަމާޒުތަކަށް ހަމަލާތައް ދޭ ދިނުމުގެ ސަބަބުން، ބިދޭސީ އިންވެސްޓަރުންގެ ހިތުގައި ވަނީ ބިރުވެރިކަން އުފެދިފައެވެ.
ނިމި ދިޔަ ޑިސެމްބަރު މަހުގެ ތެރޭގައިވެސް، ކާބުލްގައި ޗައިނާގެ ވިޔަފާރިވެރިންނަށް ޚިދުމަތްދޭ ހޮޓަލަކަށް އަމާޒުކޮށްގެން ދިން ހަމަލާއާ ގުޅިގެން، ޗައިނާގެ ވިޔަފާރި ގުރޫޕުގެ ތެރޭގައި ނުތަނަވަސްކަން އުފެދިފައި ވާ ކަމަށް، ޗައިނާގެ ވިޔަފާރިވެރިންގެ ތެރޭގައި ހިމެނޭ އިސް މެންބަރަކު ވަނީ ފާހަގަ ކޮށްފައެވެ.
ނޫރުއްދީން އަޒީޒީ ބުނި ގޮތުގައި، އަފްޣާނިސްތާނުގެ ސަރުކާރުން ދަނީ ސަލާމަތްތެރިކަން ކަށަވަރު ކުރުމަށް މަސައްކަތްތަކެއް ކުރަމުންނެވެ. އެގޮތުން، އެމެރިކާއިން މީގެ ކުރިން އަސްކަރީ ބޭސްތަކެއްގެ ގޮތުގައި ބޭނުން ކުރި ބިންތަކުގައި ހާއްސަ އިޤްތިޞާދީ ޒޯންތަކެއް އެޅުމުގެ ފިކުރު ގެންގުޅޭކަން އޭނާ ވަނީ ހާމަ ކޮށްފައެވެ.
އަފްޣާނިސްތާނުގައި އޮތް މައިން ކުރުމުގެ ސިނާޢަތުގެ އަގު 1 ޓްރިލިއަން ޑޮލަރަށް އަރާ އިރު، ބިދޭސީ އިންވެސްޓަރުންގެ ޝަޢުޤު، އެކަމަށްވެސް ހުރިކަން ނޫރުއްދީން އަޒީޒީ ވަނީ ފާހަގަ ކޮށްފައެވެ.
ޠާލިބާނުންގެ ބާރުތަކުން އަފްޣާނިސްތާނުގެ ވެރިކަމަށް އިސްވީ، އެއީ ބަދަލުވެފައިވާ ޖަމާޢަތެއް ކަމަށް ބުނެ، ދަޅަތަކެއް ދައްކައިގެންނެވެ. ނަމަވެސް ވެރިކަމުގައި މާ ގިނަ ދުވަހެއް ނުވެ، މަންޒަރު މުޅިން ބަދަލު ކޮށްލިއެވެ. އެތައް ބަޔަކު ޖެހިލުންވެ، ބިރު ގަންނަމުން ދިޔަ ކަންކަން ޙަޤީޤަތަކަށް ހަދަން ފެށިއެވެ. އަންހެނުންނާއި އަންހެން ކުދިންގެ އެތައް ޙައްޤަކަށް އަރައިގަތެވެ.
