ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއަކީ އަބަދުވެސް ގިނަ ބައެއްގެ މެދުގައި މަގުބޫލު ފުޓުބޯޅަ ކުޅުންތެރިއެކެވެ.

ރޮނާލްޑޯއަކީ މިހާތަނަށް ދުނިޔޭގައި އުފެދުނު އެންމެ މޮޅެތި ކުޅުންތެރިންގެ ތެރޭގައި ހިމެނޭ ކުޅުންތެރިޔެކެވެ. ދުނިޔޭގެ މޮޅު ކުޅުންތެރިޔާގެ އެވޯޑާއި، ފުޓުބޯޅައިގެ އެކި އެވޯޑުތައްވެސް ރޮނާލްޑޯ ވަނީ ހޯދާފައެވެ. އުމުރުން މިހާރު 37 އަހަރުގެ ކުޅުންތެރިޔާއަކީ ދުނިޔޭގައި އެންމެ މަގުބޫލު އެއް ކުޅުންތެރިޔާއޭވެސް ބުނެވިދާނެއެވެ. ގިނަ ބަޔަކު ސޯޝަލް މީޑިއާގައިވެސް އޭނާއަށް ފޮލޯކުރެއެވެ. ޚާއްސަކޮށް ސޯޝަލް މީޑިއާގެ މަންސައެއް ކަމަށްވާ އިންސްޓަގްރާމް ފާހަގަކޮށްލެވެއެވެ. ރޮނާލްޑޯގެ އިންސްޓަގްރާމަކީ އެންމެ ގިނަ މީހުން ފޮލޯ ކުރަމުން އަންނަ އިންސްޓަގްރާމް އެކައުންޓެވެ. މިހާތަަނަށް އިންސްޓަގްރާމްގައި ރޮނާލްޑޯ ފޮލޯކުރާ މީހުން އަދަދަކީ 526 މިލިއަން މީހުންނެވެ.

ސޯޝަލް މީޑިއާގައި އެންމެ ގިނަ ބަޔަކު ދައްކާ ވާހަކައަކަށް ގިނަ ފަހަރު އޮންނަނީވެސް ރޮނާލްޑޯގެ ވާހަކައެވެ. މިފަހަކަށް އައިސް އެންމެންގެ ސަމާލުކަން ހުއްޓިފައި އޮތީ ރޮނާލްޑޯ ބަދަލުވާނެ ކުލަބަކަށެވެ. އެންމެ ފަހުން ކުޅުނު މެންޗެސްޓަރ ޔުނައިޓެޑާ މައްސަލަޖެހި އެ ކުލަބުން ރޮނާލްޑޯ ދޫކޮށްލިއެވެ. އެއާއެކު ރޮނާލްޑޯ ހޯދުމަށް ސައުދީ އަރަބިޔާގެ އައްނަސްރުން ބިޑުކުރިއެވެ. އެ ވާހަކަވެސް ސޯޝަލް މީޑިއާގައި ވަނީ ވަރަށް ބޮޑަށް ދެކެވިފައެވެ. ނަމަވެސް ރޮނާލްޑޯ ބަދަލުވާނެ ވަކި ކުލަބެއް ނޭނގޭތީ އެންމެންގެ ޝައުގުވެރިކަން އޮތީ އެކަމަށެވެ.

އައު އަހަރާ ދިމާކޮށް، ރޮނާލްޑޯ ވަނީ އައްނަސްރުގެ ހުށަހެޅުން ގާބޫލުކޮށް އެ ކުލަބަށް ބަދަލުވާން ނިންމާފައެވެ. އެކުލަބުން ވަނީ އެކަން ރަސްމީކޮށް އިއުލާންވެސް ކޮށްފައެވެ. ރިޕޯޓުތައް ބުނާގޮތުން ރޮނާލްޑޯ އެކްލަބަށް ސޮއިކުރީ ފުޓްބޯޅައިގެ ތާރީޚުގައިވެސް އެންމެ މުސާރަ ބޮޑު ކުޅުންތެރިޔާގެ ގޮތުގައެވެ. ރޮނާލްޑޯގެ މުސާރަ އަހަރަކު 214 މިލިއަން ޑޮލަރަށްވުރެ ބޮޑުކަމަށް ރިޕޯޓުތައް ބުނެއެވެ.

ހަމައެއާއެކު ރޮނާލްޑޯގެ ސޮއި ހޯދާފައިވާކަން އައްނަސްރުން އިއުލާންކުރިއިރު، އެ ކުލަބުގެ ރަސްމީ އިންސްޓަގްރާމް ފޮލޯކުރާ މީހުންގެ އަދަދަކީ 860 ހާސް މީހުންނެވެ. ނަމަވެސް ރޮނާލްޑޯގެ ސޮޔާއެކު މަދު ވަގުތު ކޮޅެއްގެ ތެރޭގައި އެ ކުލަބަށް ފޮލޯކުރާ އިންސްޓަގްރާމް މީހުންގެ އަދަދު ވަނީ ވަރަށް ބޮޑުތަން އިތުރުވެފައެވެ. އެގޮތުން މިހާތަނަށް އެ ކުލަބަށް ފޮލޯކުރާ މީހުންގެ އަދަދު ވަނީ 3.7 މިލިއަނަށް އަރާފައެވެ. މީގެ އިތުރުން ކުރިއަށް އޮތް ތަނުގައި މި އަދަދު އިތުރުވާނެކަމަށް ރިޕޯޓުތައް ބުނެއެވެ.

މިއީ ރޮނާލްޑޯ ޔޫރަޕުން ބޭރުގެ ކުލަބަކާ ގުޅުނު ފުރަތަމަ ފަހަރެވެ. މީގެ ކުރިން ރޮނާލްޑޯ ވަނީ ޔޫރަޕުގެ ހަތަރު ކުލަބަށް ކުޅެފައެވެ. އޭގެ ތެރޭގައި ސްޕޯޓިން، މެންޗެސްޓަރ ޔުނައިޓެޑް، ރެއާލް މެޑްރިޑް، އަދި ޔުވެންޓަސް ހިމެނެއެވެ. ރޮނާލްޑޯ ވަނީ ރެއާލާއެކު ޔުއެފާ ޗެމްޕިއަންސް ލީގު ފަސް ފަހަރު ކާމިޔާބުކޮށްފައެވެ. ރޮނާލްޑޯއަކީ ޗެމްޕިއަންސް ލީގުގެ ތާރީޚުގައިވެސް އެންމެ ގިނަ ލަނޑު ޖެހި ކުޅުންތެރިޔާއެވެ. ޗެމްޕިއަންސް ލީގުގައި ރޮނާލްޑޯ 141 ލަނޑު ޖަހާފައިވާއިރު، އޭނާއާ އެންމެ ކައިރިން ވާދަކުރަނީ އާޖެންޓީނާގެ ކެޕްޓަން ލިއޮނަލް މެސީއެވެ. މެސީ ވަނީ ޗެމްޕިއަންސް ލީގުގައި 129 ލަނޑު ޖަހާފަ އެވެ.

ރޮނާލްޑޯ ވަނީ ދުނިޔޭގެ މޮޅު ކުޅުންތެރިޔާއަށް ދޭ ބެލެންޑޯ އެވޯޑު ފަސް ފަހަރު ކާމިޔާބުކޮށްފަ އެވެ. ޔޫރަޕުގެ ރަން ބޫޓު އޭނާ ވަނީ ހަތަރު ފަހަރު ކާމިޔާބުކޮށްފައެވެ. މީގެ އިތުރުން ޕޯޗުގަލްގެ މޮޅު ކުޅުންތެރިޔާގެ އެވޯޑު ވަނީ ފަސް ފަހަރު ކާމިޔާބުކޮށްފައެވެ.