ރަސްދޫ ފުޓްބޯޅަ އަދި ހޭންޑްބޯޅަ އެކަޑަމީގެ ފިއެސްޓާ ކާމިޔާބުކަމާއެކު ނިންމާލައިފި

އއ.ރަސްދޫ ފުޓްބޯޅަ އެކަޑަމީއާއި ހޭންޑްބޯޅަ އެކަޑަމީގެ ފިއެސްޓާ ކާމިޔާބުކަމާއެކު ނިންމާލައިފި އެވެ.

ޑިސެމްބަރު މަހުގެ 25 އިން 30 ވަނަ ދުވަހުގެ ނިޔަލަށް ކުރިއަށް ގެންދިޔަ މި ފިއެސްޓާގައި ވަނީ ޖުމުލަ 130 ކުދިން ބައިވެރިވެފަ އެވެ. ފުޓުބޯޅަ ފިއެސްޓާގައި ވަނީ 9 އަހަރުން ދަށާއި، 12 އަހަރުން ދަށާއި، 14 އަހަރުން ދަށާއި، 14 އަހަރުން ދަށާއި، 16 އަހަރުން ދަށާއި އަދި 19 އަހަރުން ދަށުގެ ކުދިން ބައިވެރިވެފަ އެވެ. ހޭންޑްބޯޅަ ފިއެސްޓާގައި ވަނީ 9 އަހަރުން ދަށް، 14 އަހަރުން ދަށް އަދި 19 އަހަރުން ދަށުގެ ކުދިން ބައިވެރިވެފަ އެވެ.

ފިއެސްޓާ ނިންމާލުމުގެ ރަސްމިއްޔާތު ބާއްވާފައިވަނީ ހުކުރު ދުވަހުގެ ހަވީރު ރަސްދޫ ފުޓްސަލް ދަނޑުގަ އެވެ. ފިއެސްޓާ ނިންމާލުމުގެ ގޮތުން ވަނީ އއ.އުކުޅަހުގެ އެކަޑަމީއާއެކު ރަޙުމަތްތެރިކަމުގެ ފުޓުބޯޅަ މެޗަކާއި، ހޭންޑްބޯޅަ މެޗެއް ވެސް ކުޅެފަ އެވެ. ދެ މެޗު ވެސް ކާމިޔާބުކޮށްފައި ވަނީ ރަސްދޫ އެކަޑަމީ އެވެ. މެޗަށްފަހު ވަނީ ފިއެސްޓާގެ ބައިވެރިންނަށް މެޑަލް ހަވާލުކޮށްފަ އެވެ. ދަރިވަރުންނަށް މެޑަލް ހަވާލުކޮށްދެއްވީ ރަސްމިއްޔާތުގެ ޝަރަފުވެރި މެހުމާާން، ކޮމިޝަނަރ އޮފް ސަޕޯޓްސް އަޙުމަދު ސަލީމް (ހީނާ) އަދި ހޭންޑްބޯޅަ އެސޯސިއޭޝަން އޮފް މޯލްޑިވްސްގެ ނައިބު ރައީސް އަޙުމަދު މުޖުތަބާ އެވެ.

ރަސްމިއްޔާތަށްފަހު ވަނީ އެކަޑަމީގެ އަހަރީ ދުވަހާ ގުޅޭ ކޭކެއް ވެސް ފަޅާފަ އެވެ.