ދިވެހިރާއްޖޭގެ ފަތުރުވެރިކަމަށް 50 އަހަރު ފުރުމުގެ މުނާސަބަތުގައި "ދިވެހި ރާއްޖޭގެ ފަތުރުވެރިކަމުގެ ރަން ފަންސާސް" ގެ ނަމުގައި ޑިޖިޓަލް ފޮތެއް ޓޫރިޒަމް މިނިސްޓްރީން އިފްތިތާހްކޮށްފިއެވެ.
މި ފޮތް އިފްތިތާހްކޮށްދެއްވީ ފަތުރުވެރިކަމުގެ ޅަފަތުގައި ރިސޯޓް އަދި ސަފާރީ އުޅަނދުފަހަރު ތަރައްޤީ ކުރުމުގެ މަސައްކަތުގައި އުޅުއްވި މައިޒާން އުމަރު މަނިކެވެ. މި ފޮތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ހިތާބް އެކުލެވިފައިވާ ކަމަށް މިނިސްޓްރީން މައުލޫމާތު ދީފައި ވެއެވެ.
މި ފޮތުގައި ފަތުރުވެރިކަމުގެ ފެށުން އަދި އޭގެ މުހިންމު ބައިވެރިން، ފަތުރުވެރިކަން ތަރައްޤީވަމުން އައިގޮތާއި ސަރުކާރުގެ ދައުރު، ރާއްޖޭގެ އިޤްތިސާދުގައި ފަތުރުވެރިކަމުގެ ދައުރު އަދި ބޭރުގެ ބްރޭންޑްތައް، ދަތުރުފަތުރަށް އައި އިންޤިލާބީ ބަދަލުތައް، ފަތުރުވެރިކަމާއި ފަތުރުވެރިކަމުގެ ގުޅުންހުރި ބިޔަ ބޮޑެތި މަޝްރޫއުތައް އަދި ފަތުރުވެރިކަން ދެމެހެއްޓުމަށް ކުރިއަތް އޮތް ޖީލުތަކުގެ ޒިންމާ ފަދަ ބައިތަކަށް އަލިއަޅުވާލާފައިވެއެވެ.
މީގެއިތުރުން މިނިސްޓަރ އޮފް ޓޫރިޒަމް ޑރ. އަބްދުﷲ މައުސޫމުގެ ހިތާބާއެކު ޓޫރިޒަމް މިނިސްޓްރީން ކުރިން ހިންގެވި ބައެއް މިނިސްޓަރުންގެ ބަސްފުޅުތައް ވެސް ފޮތުގައި ހިމެނެއެވެ.
