ބާ ކައުންސިލުން ނަގާ ފީތައް އިއުލާނުކޮށްފި
29 ޑިސެމްބަރު 2022 | ބުރާސްފަތި 07:29ނަގާ ފީ 11 ބަޔަކަށް ވަނީ ބަހާލާފައި
ބާ އިމްތިހާނުގެ ތެރެއިން
ބާ ކައުންސިލް އޮފް ދި މޯލްޑިވްސް އިން ނެގުމަށް ހަމަޖެހިފައިވާ ފީތައް އިއުލާނުކޮށްފިއެވެ.
ބާ ކައުންސިލަށް ލިބޭ އާމްދަނީން އެކައުންސިލު ހިންގޭ ފަދަ ގޮތަކަށް ބާ ކައުންސިލުގެ ހިންގުން ބައްޓަންކުރުމަށްޓަކައި ބާ ކައުންސިލަށް އާމްދަނީ ހޯދޭނެ އިތުރު ގޮތްތައް ބަޔާންކުރުމަށް ގާނޫނީ ފަންނުގެ ގާނޫނަށް ވަނީ އިސްލާޙު ހުށައަޅާފައެވެ.
އެ އިސްލާޙުގެ ދަށުން ފީ ނެގުމަށް ހަމަޖެހިފައިވަނީ މިފެށޭ އައު އަހަރުން ފެށިގެންނެވެ. އެގޮތުން ނަގާ ފީ 11 ބަޔަކަށް ވަނީ ބަހާލާފައެވެ.
ގާނޫނީ ފަންނުގެ ގާނޫނަށް އަމަލުކުރަންފެށިއިރު ގާނޫނީ ރޮނގުން ފުރަތަމަ ޑިގްރީ ހާސިލުކޮށްފައިވާ ފަރާތްތަކުގެ ތެރެއިން މިގާނޫނުގެ ދަށުން ހިންގާފައިވާ ޚާއްސަ ތަމްރީނު ޕްރޮގްރާމް ފުރިހަމަކޮށް، އިމްތިހާނެއްގައި ބައިވެރިވުމަށްފަހުގައި ގާނޫނީ ވަކީލުކަމުގެ ހުވާކޮށްފައިވާ ފަރާތްތަކުން ބާ އިމްތިހާނު ހަދައި އަލުން ހުވާކުރަންޖެހޭކަމަށް އޮތްއޮތުން އުވާލުމަށްވެސް މި ޤާނޫނަށް ހުށައެޅި އިސްލާޙުގައިވެއެވެ.
އަދި ގާނޫނީ ވަކީލުންގެ ސުލޫކީ ޝަކުވާގެ ގޮތުގައި ބާ ކައުންސިލަށް ހުށަހެޅޭނެ ޝަކުވާގެ ބާވަތްތައް ގާނޫނުގައި އިތުރަށް ތަފްސީލު ކޮށްފައިވެއެވެ.
