މާލެއާއި އަތޮޅުތެރޭގެ 16،000 އާއިލާއަށް ބޯހިޔާވަހިކަން ފޯރުކޮށްދިނުމުގެ މަޝްރޫއުތަކެއް ކުރިއަށްދޭ
22،667 މީހުން ހިމެނޭގޮތަށް، 4000 ފްލެޓަށް ކުރިމަތިލާފައިވޭ
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
މާލެއާއި އަތޮޅުތެރޭގެ 16000 އާއިލާއަށް ބޯހިޔާވަހިކަން ފޯރުކޮށްދިނުމުގެ މަޝްރޫއުތަކެއް ސަރުކާރުން މިހާރު ކުރިއަށްގެންދާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.
ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައި ރައީސް ވަނީ މާލެއާއި އަތޮޅުތެރޭގެ 16000 އާއިލާއަށް ބޯހިޔާވަހިކަން ފޯރުކޮށްދިނުމުގެ މަޝްރޫއުތަކެއް ހިންގަމުންދާކަމަށް ވިދާޅުވެފައެވެ.
ސަރުކާރުން ވަނީ މާލޭ މީހުންނަށް ގޯތި ދިނުމުގެ އިތުރުން މާލޭ މީހުންނަށް ފްލެޓް ދިނުމަށް ޚާއްސަ ސްކީމެއް އިއުލާންކޮށްފައެވެ. އެ ސްކީމްގެ ދަށުން 4000 ފްލެޓް ދޫކުރާނެއެވެ.
އެގޮތުގެ މަތިން މާލޭގައި އަޅާ 8700 ފްލެޓަށް އަލިއަޅުވާލައްވާ ރައީސް ވިދާޅުވީ، އެ ފްލެޓުތަކަށް ކުރިމަތިލުމަށް 20،697 އެޕްލިކޭޝަން ލިބިފައިވާ ކަމަށެވެ. އެއީ 22،667 މީހުން ހިމެނޭގޮތަށް، 4000 ފްލެޓަށް ކުރިމަތިލާފައިވާ މީހުންގެ އަދަދުތަކެވެ.
މާލެ ސަރަަޙައްދުން ނަގާފައިވާ 5000 ގޯއްޗަށް އެޕްލައި ކުރުމަށް ހުޅުވާލި ފުރުސަތުގައި 15،164 އެޕްލިކޭޝަން ލިބިފައިވާކަމަށްވެސް ރައީސް ވިދާޅުވިއެވެ. އެއީ 23،088 މީހުން ހިމެނޭ ގޮތަށެވެ.
ރައީސް ވިދާޅުވީ، އަތޮޅު ތެރޭގައި 4438 ފްލެޓާއި، ރޯހައުސް އެޅުމުގެ މަސައްކަތް ކުރިއަށްދާކަމަށެވެ.
އަދި، ގެދޮރުވެރިޔާ ލޯނު 183 މީހަކަށް ދެވިފައިވާއިރު، މިހާތަނަށް 168 މިލިއަން ރުފިޔާ ދޫކުރެވިފައިވާކަންވެސް ރައީސް ފާހަގަ ކުރެއްވިއެވެ.
މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށް ސަރުކާރުން ކުރިއަށް ގެންދާ ގޮދޮރުވެރިން ޕްރޮގްރާމުގެ ތެރެއިން މާލެ ރައްޔިތުންނަށް ގޯތި ދިނުމަށް ހިންގާ ބިންވެރިޔާ ސްކީމުގެ ދަށުން މާލެ ސަރަހައްދުން ބަންޑާރަ ގޯތި ދޫކުރުމަށް ހަމަޖެހިފައިވާ އުސޫލާއި، ގޯތި ލިބޭނެ ގޮތްތަކާއި، ޝަރުތުތަކާއި، ލިބޭ ގޯތީގެ ސައިޒްތައް ވަނީ އާންމުކޮށްފައެވެ.
ގޯތި ލިބޭ ފަރާތް ކަނޑައެޅުމަށްޓަކައި، ފޯމްތައް އިވެލުއޭޓްކުރުމުގެ ބޭނުމަށް އެކިއެކި ކެޓަގަރީތަކަށް ފޯމުތައް ބަހާލެވޭނެއެވެ. އެހެންނަމަވެސް އެ ކެޓަގަރީތަކަކީ ގޯތި ލިބޭ ފަރާތްތައް ކަނޑައެޅުމުގައި އިސްކަންދޭނެ ތަރުތީބެއްނޫނެވެ.
ގޯތި ދިނުމުގައި ބަލާނީ ގޯއްޗަށް އެދި ހުށަހެޅި ފަރާތުގެ މާލެ ސަރަހައްދުގައި ހުރި ބޯހިޔާވަހިކަމަށާއި، އެ ފަރާތްތަކުގެ އާމްދަނީ އަދި އާއިލާގެ ހާލަތަށެވެ.
