ވައިގެ މަގުން އެތެރެކުރަން އުޅުނު 7 މިލިއަނަށްވުރެ ގިނަ ރުފިޔާގެ ކޮކެއިން އަތުލައިގަނެފި
29 ޑިސެމްބަރު 2022 | ބުރާސްފަތި 02:06ޑިސެމްބަރ 24 ވަނަ ދުވަހު ރާއްޖެ އައި އުމުރުން 59 އަހަރުގެ ސްވިޒަލެންޑްގެ ފިރިހެނެއްގެ އަމަލުތައް ހުރި ގޮތުން އެމީހާ އާ މެދު ޝައްކުކުރެވިގެން ބަލާފާސްކުރި
ކަސްޓަމްސް އިން މީގެކުރިން އަތުލައިގަތް މަސްތުވާތަކެތި
ވައިގެ މަގުން ބްރެޒިލް އިން ރާއްޖެ އައި މީހެއްގެ އަތުން ހަތް މިލިއަނަށްވުރެ ގިނަ ރުފިޔާގެ ކޮކެއިން ކަސްޓަމަސް އިން އަތުލައިގަނެފިއެވެ.
އެކަމާއި ގުޅިގެން ކަސްޓަމަސް އިން ބުނީ ޑިސެމްބަރ 24 ވަނަ ދުވަހު ރާއްޖެ އައި އުމުރުން 59 އަހަރުގެ ސްވިޒަލެންޑްގެ ފިރިހެނެއްގެ އަމަލުތައް ހުރި ގޮތުން އެމީހާއާ މެދު ޝައްކުކުރެވިގެން އޭނާގެ ލަގެޖް ކަސްޓަމަސް ބަލާ ފާސްކުރިކަމަށެވެ. ފާސްކުރިއިރު އޭނާގެ ލަގެޖްގެ ތެރެއިން މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވާކަމަށެވެ.
ފުރަތަމަ މަރުހަލާގައި މިތަކެތި ޓެސްޓްކުރި މަސްތުވާތަކެތީގެ ބާވަތެއްކަމުގައިވާ ކޮކެއިން އަށް ޕޮޒިޓިވްވެފައިވާކަމަށް ކަސްޓަމަސް އިން ބުނެއެވެ. މިމީހާގެ އަތުން އަތުލައިގަނެވުނު މަސްތުވާތަކެތީގެ ޖުމްލަ ބަރުދަނުގައި 2.198 ކިލޯގްރާމް ހުރިއެވެ.
އަތުލައިގަނެވުނު މަސްތުވާތަކެތީގެ އަގު 7،700،000 (ހަތް މިލިއަން ހަތް ލައްކަ) ރުފިޔާއަށް އަރައެވެ.
މިމައްސަލައިގައި ޝާމިލުވާ މީހާއާއި އަތުލައިގަނެވުނު މަސްތުވާތަކެތި މިހާރު ވަނީ ފުލުހުންނާ ހަވާލުކުރެވިފައިކަމަށް ކަސްޓަމަސްއިން ބުނެއެވެ.
