ޑާވިން ނޫނޭޒް ލަނޑު ޖަހާނެކަމާމެދު ކްލޮޕް ޝައްކެއް ނުކުރޭ

ލިވަޕޫލަށް ކުޅެމުން އަންނަ އުރުގުއޭގެ ފޯވާޑް ޑާވިން ނޫނޭޒް ލަނޑު ޖަހާނެ ކަމާމެދު ޝައްކު ނުކުރާ ކަމަށް އެ ޓީމުގެ ކޯޗު ޔާގަން ކްލޮޕް ބުނެފި އެވެ.

ކްލޮޕް މިހެން ބުނީ ވޯލްޑް ކަޕް ބްރޭކަށްފަހު ލީގުގައި ލިވަޕޫލުން ކުޅުނު ފުރަތަމަ މެޗަށްފަހު ވާހަކަ ދައްކަމުންނެވެ. އެ މެޗުން ލިވަޕޫލް މޮޅުވީ 3-1 އިންނެވެ. މެޗުގައި ނޫނޭޒަށް ވަނީ ލަނޑު ޖަހާނެ ފުރުސަތު ލިބި، ބޭނުން ނުކުރެވިފަ އެވެ. އެކަމާ ގުޅިގެން ވާހަކަ ދައްކަމުން ކްލޮޕް ބުނީ، ނޫނޭޒް އެސްޓަން ވިލާއާ ދެކޮޅަށް ކުޅުނީ މޮޅަށް ކަމަށެވެ. އަދި ނޫނޭޒް ލަނޑު ޖަހާނެ ކަމަށާއި، އެކަމާމެދު އޭނާ އެއްވެސް ވަރަކަށް ޝައްކު ނުކުރާ ކަމަށެވެ. މީގެ އިތުރުން ކްލޮޕް ބުނީ ނޫނޭޒްގެ ފަރާތުން ޓީމަށް ވެސް ބައިވަރު ފައިދާތަކެއް ވަމުންދާ ކަމަށާއި، ކޮންމެ މެޗެއްގައި ލަނޑު ނުޖެހިދާނެ ކަމަށެވެ. ނަމަވެސް މަޑުމަޑުން ކަންކަން ދާނީ ރަނގަޅުވަމުން ކަމަށާއި، އެސްޓަން ވިލާއާ ދެކޮޅަށް ނޫނޭޒް ކުޅުނީ ފާހަގަކޮށްލެވޭ ކުޅުމެއް ކަމަށެވެ.

ބެންފީކާ ދޫކޮށް ނޫނޭޒް ލިވަޕޫލަށް ބަދަލުވީ މިއަހަރު އެވެ. ބެންފީކާގައި އެންމެ ފަހުން ކުޅުނު ސީޒަންގައި ނޫނޭޒް ވަނީ މޮޅު ކުޅުމެއް ދައްކާފަ އެވެ. އޭނާ ވަނީ 41 މެޗުން 34 ލަނޑު ޖަހާފަ އެވެ. ނަމަވެސް ލިވަޕޫލްގައި ނޫނޭޒަށް އޭނާގެ އެންމެ މޮޅު ކުޅުން ނުދެއްކޭ ކަމަށް ބުނާ މީހުން ގިނަ އެވެ. ލިވަޕޫލަށް ބަދަލުވެ އެ ޓީމަށް ކުޅެދިން 19 މެޗުން ނޫނޭޒް ވަނީ ނުވަ ލަނޑު ޖަހާފަ އެވެ.