ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަށް އޭނާގެ ލޯބިވެރިޔާ ޖޯޖިނާ ރޮޑްރިގޭޒް ހަދިޔާއެއްގެ ގޮތުގައި ރޯލް ރޮއީސް ކާރެއް ހަދިޔާކޮށްފި އެވެ.
ޖޯޖިނާ ރޮނާލްޑޯއަށް ހަދިޔާއެއްގެ ގޮތުގައި ކާރެއް ދީފައިވަނީ ކްރިސްމަަސް ފާހަގަ ކުރުމަށެވެ. އުމުރުން 37 އަހަރުގެ ރޮނާލްޑޯ މި ވަގުތު ހުރީ އެއްވެސް ކުލަބެއްގައެއް ނޫނެވެ. އެހެންކަމުން އޭނާ އަންނަނީ ވޯލްޑް ކަޕަށްފަހު އާއިލާއާއެކު ވަގުތު ހޭދަކުރަމުންނެވެ. ރޮނާލްޑޯ އެންމެ ފަހުން ކުޅުނީ ޕްރިމިއާ ލީގުގެ މެންޗެސްޓަރ ޔުނައިޓެޑަށެވެ. މިވަގުތު ރޮނާލްޑޯ އަންނަނީ ސައޫދީ އަރަބިޔާގެ ކުލަބަކާ މަޝްވަރާ ކުރަމުންކަމަށް ރިޕޯޓުތައް ބުނާއިރު، ސައޫދީގެ ކުލަބަކުން އަންނަނީ ރޮނާލްޑޯ ހޯދުމުގެ މަސައްކަތް ކުރަމުންނެވެ.
ރޮނާލްޑޯ ވަނީ ޖޯޖިނާ އޭނާ އަށް ހަދިޔާކޮށްފައިވާ ކާރުގެ ފޮޓޯއެއް އޭނާގެ އިންސްޓަގްރާމްގައި ހިއްސާކޮށްފަ އެވެ. ލޯބިވެރިޔާ އަށް ޝުކުރު އަދާކުރާކަމަށް ބުނެ ކޮށްފައިވާ އެ ޕޯސްޓުގައި ޖޯޖިނާ ޓެގުކޮށްފައި ވެސް ވެއެވެ. ރޯލްސް-ރޮއީސްއަކީ މަޝްހޫރު ކާރު ބްރޭންޑެކެވެ. ރޯލްސް-ރޮއީސް ކާރުގެ އަގު އުޅެނީ ގާތް ގަނޑަކަށް 460،000 (ހަތަރު ލައްކަ ފަސް ދޮޅަސް ހާސް) އެމެރިކާ ޑޮލަރުގައެވެ. 2016 ވަނަ އަހަރުން ފެށިގެން އެއްކޮށް ދިރިއުޅެމުން އަންނަ ރޮނާލްޑޯ އާއި އޭނާގެ ލޯބިވެރިޔާ ޖޯޖިނާ މިހާރު ގެންދަނީ އާއިލާއާއެކު ޗުއްޓީ ހޭދަކުރަމުންނެވެ.
ރޮނާލްޑޯ މިހާތަނަށް އޭނާ ގުޅޭނެ އެއްވެސް ކުލަބެއް ނިންމާފައެއް ނުވެއެވެ.
