މެސީ އަކީ ދުނިޔޭގައި ހުރި އެންމެ މޮޅު ކުޅުންތެރިޔާ: ލެވަންޑޯސްކީ

އާޖެންޓީނާގެ ކެޕްޓަން ލިއޮނަލް މެސީ އަކީ ދުނިޔޭގައި ހުރި އެންމެ މޮޅު ކުޅުންތެރިޔާކަމަށް ޕޮލެންޑުގެ ކެޕްޓަން ރޮބާޓް ލެވަންޑޯސްކީ ބުނެފި އެވެ.

މެސީގެ ކުރީގެ ކުލަބް ބާސެލޯނާ އަށް ކުޅެމުން އަންނަ ލެވަންޑޯސްކީ މިހެން ބުނީ، މިއަހަރުގެ ފީފާ ވޯލްޑް ކަޕް ގްރޫޕް ސްޓޭޖުގައި އާޖެންޓީނާ އާއި ޕޮލެންޑް ބައްދަލު ކުރި މެޗުގައި މެސީ އާއި ލެވަންޑޯސްކީއާ ދެމެދު ދެކެވުނު ވާހަކަތަކާ ގުޅިގެން ކުރި ސުވާލަކަށް ޖަވާބު ދެމުންނެވެ. އޭނާ ބުނީ މެސީއާ ދެމީހުން ދެއްކި ވާހަކަތައް އާންމުންގެ ތެރޭގައި ހިއްސާކުރަން ބޭނުން ނުވާ ކަމަށެވެ. އޭނާ ބުނީ އެއީ ދެ ކުޅުންތެރިން ވެސް އެއްބަސްވެގެން ދެކެވުނު ވާހަކައެއް ކަަމަށެވެ. ލެވަންޑޯސްކީ ބުނީ އޭނާ އަށް ޤަބޫލު ކުރެވޭ ގޮތުގައި އެ ފަދަ ވާހަަކަތަކަކީ ތަފަސީލްކޮށްދެވޭނެ ވާހަކަތަކެއް ނޫން ކަމަށާއި، އެއީ ޕްރައިވެޓް ވާހަކަ ކަމަށެވެ. ނަމަވެސް މެސީއާ ދެކެވުނީ ވަރަށް ރަނގަޅު ވާހަކައެއް ކަމަށެވެ.

މެސީ އާއި އާޖެންޓީނާ އިން ވޯލްޑް ކަޕް ކާމިޔާބު ކުރުމުން ލެވަންޑޯސްކީ ބުނީ، އެއީ މެސީގެ ހުވަފެނެއް ހަގީގަތަކަށްވުން ކަމަށެވެ. އަދި ފުޓުބޯޅައިގައި މެސީ އަށް ހުރިހާ ކާމިޔާބެއް ހާސިލުކުރެވިއްޖެ ކަމަށާއި، މެސީ އަކީ ދުނިޔޭގައި ހުރި އެންމެ މޮޅު ކުޅުންތެރިޔާ ކަމަށެވެ. އެކަމުގެ އުފާ މިހާރު މެސީ ލިބިގަނެ، އެކަން ފާހަގަކުރަމުންދާކަމަށާއި މެސީ އާއި އާޖެންޓީނާ އަށް އެއީ ކިހާ ބޮޑު ކާމިޔާބެއް ކަމަށް އިޙުސާސްކުރެވޭ ކަމަށެވެ. މީގެ އިތުރުން އޭނާ ބުނީ އާޖެންޓީނާ އަށް ވޯލްޑް ކަޕް ކާމިޔާބު ކޮށްދިނުމަށް މެސީ ވަރަށް މޮޅަށް ކުޅުނު ކަމަށާއި، މުޅި ދުނިޔެއަށް އެކަން ފެންނާނެ ކަމަށެވެ.

އިތުރަށް ވާހަކަ ދައްކަމުން ލެވަންޑޯސްކީ ބުނީ އާޖެންޓީނާ އިން ވޯލްޑް ކަޕް ކާމިޔާބު ކުރުމުން އޭނާ ހައިރާން ނުވާ ކަމަށެވެ. ސަބަބަކީ އާޖެންޓީނާ އަކީ މުބާރާތް ކާމިޔާބު ކުރާނެ ފޭވަރިޓުން ކަމަށް މުބާރާތުގެ ކުރިން ވެސް އޭނާ ބުނެފައިވާނެ ކަމަށެވެ. އަދި ފުރަތަމަ މެޗުގައި ސައުދީ އަރަބިޔާ އަތުން ބަލިވި ނަމަވެސް، ފައިނަލަށް ގޮސް އާޖެންޓީނާ އިން ތަށި ކާމިޔާބު ކުރާނެ ކަމަށް ޤަބޫލު ކުރެވުނު ކަމަށެވެ.

ލެވަންޑޯސްކީ ވަނީ އޭނާ ކުޅުން ހުއްޓާލުމުގެ ކުރިން މެސީއާ އެއް ޓީމަކަށް ކުޅެން ބޭނުންވާ ކަމަށް ވެސް ބުނެފަ އެެވެ.