ޤުރުއާން ކިޔަވަން ދިޔަ ކުއްޖަކަށް ޖިންސީ ގޯނާ ކުރި މުދައްރިސަކު 15 އަހަރަށް ޖަލަށް
ބަންދުގައި ހޭދަކުރި މުއްދަތު އުނިކުރުމަށްފަހު ދެން އޭނާ ތަންފީޒު ކުރަން ޖެހޭނީ 13 އަހަރާއި އަށް މަސް ދުވަހުގެ ހުކުމެއް
ޖިންސީ ގޯނާގެ އަނިޔާ
ޤުރުއާން ކިޔަވަންދިޔަ ކުޑަ އަންހެން ކުއްޖަކަށް ޖިންސީ ގޯނާ ކުރި ކަމުގެ ދައުވާ ސާބިތުވެ އެކަން ކުރި މުދައްރިސު 15 އަހަރަށް ޖަލަށްލާން ހުކުމް ކޮށްފިއެވެ.
ކްރިމިނަލް ކޯޓުން އާދީއްތަ ދުވަހު ކުރި ހުކުމަކީ 2021 ވަނަ އަހަރުގެޖުލައި މަހާއި އޮގްސްޓްމަހާ ދޭތެރޭ އަލީ ޝާތިރު ނަމަކަށްކިޔާ ޤްރުއާން ކިޔަވައިދޭ މުދައްރިސަކު ކައިރިއަށް ކިޔަވަން ދިޔަ ދުވަހެއްގައި އެ ކުއްޖާ ގާތުގައި ލޯބިވާ ވާހަކަ ބުނެ މޭމަތީގައި އަތްލާފައިވާތީ ހުށަހެޅި މައްސަލައަކާ ގުޅިގެން ކުޑަކުދިންނަށް ޖިންސީ ގޯނާ ކުރާ މީހުންނާމެދު ހާއްސަ އުސޫލުތަކަކަށް އަމަލު ކުރުމުގެ ގާނޫނޫގެ ނުވަވަނަ މާއްދާގެ ދަށުން ދައުލަތުން ކުރި ދައުވާއަކާ ގުޅިގެން ކުރި ހުކުމެކެވެ.
ދައުލަތުން ހުށަހެޅި މި ދައުވާއަށް އަލީ ޝާތިރު ވަނީ ޝަރީއަތުގެ މަޖިލީހުގައި އިންކާރު ކޮށްފައެވެ. ނަމަވެސް އެ މައްސަލަ ސާބިތު ކުރުމަށް ދައުލަތުން ހުށަހަޅާފައިވާ ހެއްކާއި ގަރީނާއަށް ބަލައި ޤާނޫނު ަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުވާ ކަމަށް ކޯޓުން ވަނީ ކަނޑައަޅައިފައެވެ.
މި މައްސަލައިގައި އިތުބާރު ކުރެވޭ މަގާމެއްގައި ހުރެ ކުޑަކުއްޖަކާ މެދު ޖިންސީ އަމަލު ހިންގުމުގެ ކުށުގެ ދައުވާ ސާބިތުވެ އަލީ ޝާތިރުގެ މައްޗަށް އިއްވާފައިވަނީ 15 އަހަރު ދުވަހުގެ މުއްދަތަަށް ޖަލަށްލުމުގެ ހުކުމެކެވެ. ނަމަވެސް އޭނާ އެއް އަހަރާއި ހަތަރު މަސް ވަންދެން ބަންދުގައި ހޭދަކޮށްފައިވާތީ އެ މުއްދަތު އުނިކުރުމަށްފަހު ދެން އޭނާ ޖަލުގައި ހޭދަކުރަން ޖެހޭނީ 13 އަހަރާއި އަށް މަސް ދުވަހެވެ.
މި މައްސަލަ ބެއްލެވީ ގާޒީ އަލްއިސްތާޒު އާދަމް މުޙައްމަދު އެވެ.
