ފުންކޮށް، ފުޅާކޮށް ވިސްނުމުގެ ގާބިލްކަން އިތުރުކުރަންޖެހޭ - އެޑިއުކޭޝަން މިނިސްޓަރު

ކްރިޓިކަލް ތިންކިންގގެ ހުނަރު ނުވަތަ ފުންކޮށް، ފުޅާކޮށް ވިސްނުމުގެ ގާބިލްކަން އިތުރުކުރުމަށް އިސްކަންދޭންޖެހޭ ކަމަށް އެޑިއުކޭޝަން މިނިސްޓަރ ޑރ. އާއިޝަތު އަލީ ވިދާޅުވެއްޖެއެވެ.

6 ވަނަ އިންޓަރނޭޝަނަލް ޓީޗަރސް ކޮންފަރެންސް ފެށުމުގެ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު ވިދާޅުވީ، ދުނިޔެ ބަދަލުކޮށްލި ފުރަތަމަ ސިނާއީ އިންގިލާބަކީ، އާވިން މެޝިން ހިންގައިގެން ގެނައި އިންގިލާބު ކަމަށެވެ. އަދި ދެވަނަ އިންގިލާބަކީ، އިލެކްޓްރިކް ބާރު ގެނުވި އިންގިލާބު ކަމަށެވެ. ތިންވަނަ އިންގިލާބަކީ، ކޮމްޕިއުޓަރުން ގެނައި އިންގިލާބު ކަމަށާއި، ހަތަރުވަނަ ސިނާއީ އިންގިލާބަކީ ދެމެހެއްޓެނިވި ހަކަތައާއި އިންޓަރނެޓުން ގެންނަ ބަދަލުތައް ކަމަށެވެ. މި ހަތަރުވަނަ ސިނާއީ އިންގީލާބަށް ދަރިވަރުން ތަމްރީނުކުރުމަށް އަޅުގަނޑުމެން އިސްކަންދޭންވީ ކޮންކޮން ކަމަކަށްތޯ މިނިސްޓަރު ވަނީ ސުވާލު އުފައްދަވާފައެވެ.

މިނިސްޓަރު ވިދާޅުވީ، ކޮންމެ މަދަރުސާ ކުއްޖަކާ މިއަދު ކުރިމަތިވަނީ ތަފާތު އެތައް ވީޑިއޯތަކަކާއި މަންޒަރުތަކެއް ކަމަށެވެ. ބައެއް މީހުން ރީތިކަމަށް، ހުތުރު ކަންތައްތައް ހަދައި، ހަރާމްކަންކަން ހަލާލު ކަންކަމުގެ ގޮތުގައި ދައްކުވައި، ނިޔާއާއި އަނިޔާ އެއްގޮތްކުރަން އުޅޭކަމަށެވެ. އަދި އިންފޮމޭޝަނާއި ޑިސްއިންފޮމޭޝަން ވަނީ ލާމެހިފައި ކަމަށާއި، ފޭކު ޚަބަރާއި ހަގީގީ ޚަބަރު ވަނީ އެކުވެފައި ކަމަށެވެ. ސައްހަ ނޫން އެތައް މައުލޫމާތުގެ ބޯ ވާރެއިން، ހަގީގަތުގެ މަލަމަތިވެސް ގެއްލޭކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ، މީހަކަށް ފުންކޮށް ފުޅާކޮށް ވިސްނޭނީ އޭނާއަށް އެނގޭ މައުލޫމާތުގެ މިންވަރަކުން ކަމަށެވެ. އަދި ވިސްނާއިރު، މައުލޫމާތު ހިތުގައި ނެތްނަމަ، އެ މައުލޫމާތު ހިމަނައިގެން ވިސްނޭކަށް ނޯންނާނެ ކަމަށާއި، ވީމާ، އެކި ދާއިރާތަކުން ދަރިވަރުންނަށް އެނގެންޖެހޭ މައުލޫމާތު މިވަނީ އިތުރުކުރަން ޖެހިފައި ކަމަށެވެ.

ގިނަ މައުލޫމާތުތަކެއް ހިތުގައި ބެހެއްޓޭނީ، އަދި ބޭނުންވާ ހިނދަކު ހޯދޭނީ، ހިތުގައި އެ ގުދަންކޮށް ތަރުތީބުކުރާ އިންތިޒާމެއްގެ ސަބަބުން ކަމަށާއި، ދަރިވަރުންނަށް ދަސްކޮށްދޭންޖެހެނީ އޮއްޓަރުގެ އިތުރަށް ތަކެތި ދަސްކުރާނޭ ގޮތްކަމަށާއި، ތަކެތި ދަތުމަށްފަހު، އެ ބޭނުންވާ ހާލަތްތައް ދެނެގަނެ، އެ ބޭނުންކުރާނޭ ގޮތްކަމަށް މިނިސްޓަރު ވިދާޅުވިއެވެ.