ޗައިނާގެ ކޮވިޑް ހާލަތާމެދު ޑަބްލިއުއެޗްއޯއިން އިންތިހާއަށް ކަންބޮޑުވުން ފާޅުކޮށް، ތަފާސް ހިސާބުތަކާމެދު ސުވާލު އުފައްދައިފި

ޗައިނާގައި ކޮވިޑް-19ގެ ކޭސްތައް އިތުރުވަމުން ދާ ދިއުމާމެދު ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ)އިން އިންތިހާއަށް ކަންބޮޑުވާ ކަމަށާއި، ބަލީގެ ނުރައްކާ އެންމެ ބޮޑު މީހުންނަށް ވެކްސިން ޖެހުމަށް ޗައިނާގެ ސަރުކާރުން ކުރަމުންދާ މަސައްކަތްތަކަށް އެއްބާރުލުން ދެމުން ދާކަމަށް، ޑަބްލިއުއެޗްއޯގެ އިސްވެރިޔާ ޑރ. ޓެޑްރޯޒް އެޑަނޮމް ގެބްރިޔޭސޫސް ވިދާޅުވެއްޖެއެވެ.

މި ދުވަސްވަރަކީ، ދުނިޔޭގެ 2 ވަނައަށް އެންމެ ވަރުގަދަ އިގްތިސާދުގެ މަގާމުގައި އޮތް ޗައިނާގައި ކޮވިޑް-19ގެ ކޭސްތަކާއި އެ ބަލީގައި މަރުވާ މީހުންގެ އަދަދު، ރެކޯޑް މިންވަރަކަށް އިތުރުވަމުންދާ ދުވަސްވަރެކެވެ. އަންދާޒާތަކުން ދައްކާގޮތުގައި އެ ގައުމުގައި އަނެއްކާވެސް ބަލީގެ ހުޅުގަނޑު ފަޅައިގެން ގޮސް، ކޮވިޑް ޖެހިގެން އަންނަ އަހަރު މިލިއަނަކަށްވުރެ ގިނަ މީހުން މަރުވާނެކަމަށް ލަފާކުރެވެއެވެ.

ޑރ. ޓެޑްރޯޒް ވިދާޅުވީ ޗައިނާގައި ބަލި ފެތުރިފައިވާ މިންވަރާއި، ހޮސްޕިޓަލުތަކުގައި އެޑްމިޓްކޮށްގެން ފަރުވާ ދެމުންދާ އަދަދުތަކުގެ ތަފްސީލާއި، ޚާއްސަ ފަރުވާ ދޭންޖެހޭ މީހުންގެ އަދަދުތައްފަދަ، ހާލަތުގެ ފުރިހަމަ ތަފްސީލު މިހާރަށްވުރެ ފުރިހަމައަށް ޑަބްލިއުއެޗްއޯއަށް ބޭނުންވާ ކަމަށެވެ.

ޗައިނާއަކީ ކޮވިޑްގެ ތަފާސް ހިސާބުތައް އާންމު ކުރުމުގައި ހިސާބެއްގެ ކޮންޓްރޯލެއް ގެންގުޅޭ ގައުމެކެވެ. އަދި ޗައިނާއިން އާންމު ކުރަމުންދާ ތަފާސް ހިސާބުތަކަކީ ބަލީގެ ހަގީގީ އަދަދުތައްކަމާމެދު އެހެން ބައެއް ގައުމުތަކުން ސުވާލުވެސް އުފައްދައެވެ.

ޗައިނާގައި އެންމެ އެކަށީގެންވާ ގޮތެއްގައި ކޮވިޑް ވެކްސިން ޖަހަމުން ދާ ކަމާ މެދުވެސް ކަންބޮޑުވުންތަކެއް އެބަހުއްޓެވެ.

ޑަބްލިއުއެޗްއޯގެ ވާހަކަ މިފަދަ ގޮތަކަށް ހުރިއިރު، ޖަރުމަނުވިލާތުގެ ސަރުކާރުން ވަނީ، ކޮވިޑް-19ން ދިފާއުވުމަށް ތަރައްގީކޮށްފައިވާ ވެކްސިންތަކުގެ ތެރެއިން ބަޔޯއެންޓެކް ކޮވިޑް-19 ވެކްސިންގެ ޝިޕްމަންޓެއް ޗައިނާއަށް ފޮނުވާފައިވާކަން ކަށަވަރު ކޮށްދީފައެވެ. މިއީ ޗައިނާއަށް ފޮނުވި މިފަދަ ފުރަތަމަ ޝިޕްމަންޓް ކަމަށް ވާއިރު، މި ވެކްސިން ޝިޕްމަންޓަކީ ޗައިނާގައި ދިރިއުޅެމުންދާ ޖަރުމަނުވިލާތުގެ މީހުންނަށް ޖެހުމަށް ފޮނުވި ޝިޕްމަންޓެއް ކަމަށްވެސް މައުލޫމާތު ލިބެއެވެ.

މުޅި ދުނިޔެ އިނދަޖައްސާލި ކޮވިޑް-19ގެ ކޭސްތައް އެންމެ ފުރަތަމަ ރިޕޯޓްކުރަން ފެށީ ޗައިނާގެ ސީފުޑް ބާޒާރަކުން، 2019 ވަނަ އަހަރުގެ ފަހުކޮޅުގައެވެ. ނަމަވެސް އެއީ ބައިނަލްއަގުވާމީ ފެންވަރުގައި ނުރައްކާ ފެތުރިފައިވާ ކުއްލި ނުރައްކަލުގެ ހާލަތުގައި އޮތް ބަލިމަޑުކަމެއްގެ އިންޒާރު، ޑަބްލިއުއެޗްއޯއިން ނެރުނީ 2020 ވަނަ އަހަރުގެ ޖެނުއަރީ މަހުއެވެ. ކޮވިޑް-19ގެ ކޭސްތައް އެންމެ ފުރަތަމަ ރިޕޯޓްކުރީ ޗައިނާއިން ކަމުގައި ވީނަމަވެސް، ބަލީގެ ވައިރަހުގެ އަސްލަކީ ޗައިނާ ކަމަށް ކުރާ ދައުވާއަށް އެ ގައުމުން އިންކާރު ކުރެއެވެ. ބަލީގެ އަސްލު ހޯދުމަށް ބައިނަލްއަގުވާމީ ފެންވަރުގައި ހިސާބެއްގެ ތަހުގީގުތަކެއް ހިންގިކަމުގައި ވީނަމަވެސް، ކަނޑައެޅިގެން ވަކި ނިންމުމެއް ނިންމިފައެއް ނުވެއެވެ.