ރައްޔިތުންގެ ކިބައިން ނިގުޅައިގެންފައި ހުރި އެތައް އަސާސީ ހައްގުތަކެއް، މިނިވަންކަމެއް ހޯދައިދެވިއްޖެ: ރައީސް

ރައްޔިތުންގެ ކިބައިން ނިގުޅައިގެންފައި ހުރި އެތައް އަސާސީ ހައްގުތަކަކާއި މިނިވަންކަމެއް ހޯއްދަވައިދެއްވިއްޖެ ކަމަށް ވިދާޅުވެ، މީގެ 4 އަހަރު ކުރިން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ގައުމާ ހަވާލުވެވަޑައިގެންނެވިއިރު އޮތް ހާލަތާއި މިހާރުގެ ހާލަތް ރައީސް ބަޔާންކުރައްވައިފިއެވެ.

ގއ އަތޮޅުގެ ތިން ރަށަކަށް މިހާރު ރައީސް ކުރައްވަމުން ގެންދަވާ ދަތުރުފުޅުގައި، ދާންދޫގައި ބޭއްވި ޖަލްސާގައި ދެއްކެވި ވާހަކަފުޅު ފެއްޓެވީ، ފާއިތުވި ހަތަރު އަހަރުގެތެރޭގައި، އޭރު އޮތް ހާލަތު ބަދަލުކުރުމަށް މިސަރުކާރުން ކޮށްފައިވާ ކަންކަން ކުރުގޮތަކަށް ވިދާޅުވެދެއްވަމުންނެވެ. އެގޮތުން ރައީސް ވިދާޅުވީ ރައްޔިތުން މިސަރުކާރު އިންތިޚާބުކުރިތާ ހަތަރު އަހަރު ވެއްޖެކަމަށާއި، 2018 ވަނަ އަހަރު ރައްޔިތުން އެމަނިކުފާނަށް ވޯޓުދީ ސަރުކާރެއް އެކުލަވާލުމަށް ފުރުސަތު އެރުވީ ވަރަށް ގިނަ ކަންތައްތަކެއް ރައްޔިތުން ބޭނުންވެގެންކަމަށެވެ.

Advertisement

ފުރަތަމަ ކަމަކަށް، އޭރު ރާއްޖޭގައި އޮތް ހަލަބޮލިކަން (ޚާއްސަކޮށް ސިޔާސީ ހަލަބޮލިކަމާއި، ނުތަނަވަސްކަމާއި، އިޖުތިމާއީގޮތުން އޮތް ބިރުވެރިކަން) ނައްތާލަން ރައްޔިތުން ބޭނުންވިކަމަށް ރައީސް ވިދާޅުވިއެވެ. އޭރު ގެއްލިފައި އޮތް ރައްޔިތުންގެ ހައްގުތައް ހޯދައިދޭން ރައްޔިތުން ބޭނުންވިކަމަށް ރައީސް ވިދާޅުވިއެވެ.

އެކަންކަން ރައްޔިތުން އިންތިޚާބުތެރޭގައި އެމަނިކުފާނާ ހިއްސާކުރެއްވިކަމަށް ރައީސް ވިދާޅުވިއެވެ.

ރައީސް ވިދާޅުވީ އޭރު ވިޔަފާރިވެރިންނަށް އޮތް ހުރަސްތަކާއެކު، ކޮންމެ މީހަކަށް އެފުރުސަތު ނުލިބޭކަމަށެވެ. އޭރު، ޓޫރިޒަމް ދާއިރާގައި ބޮޑެތި އިންވެސްޓްމަންޓްތައް ކުރަން ބޭނުންވާ މީހާ ކަންކަން ކޮށްފައިވާގޮތާއި ކުރިގޮތް މިއަދު އޮތީ ފެންނަން ކަމަށް ރައީސް ވިދާޅުވިއެވެ.

މީގެއިތުރުން އެމަނިކުފާނު ވެރިކަމާ ހަވާލުވެވަޑައިގެންނެވިއިރު އަސާސީ ޚިދުމަތްތައް އޮތް ގޮތަށް އަލިއަޅުވާލައްވަމުން ރައީސް ވިދާޅުވީ، އެންމެ ދުވަހެއްވެސް ކޮންމެސް ރަށެއްގައި ކަރަންޓު ކެނޑިގެން އިންޖީނު ބަދަލުކުރަން ނުޖެހި ނުދާކަމަށެވެ.

މީގެއިތުރުން، ސާފު ބޯފެނާއި ނަރުދަމާއަކީ އަސާސީ ޚިދުމަތެއްކަމަށާއި، އެއީ ވަކި ރަށެއްގައި ނުވަތަ ވަކި ގެއެއްގައި ވަކި މީހަކު އުޅޭތީ ތަފާތުކޮށްގެން ދެވެންޖެހޭނެ އެއްޗެއް ނޫންކަމަށް ރައީސް ވިދާޅުވިއެވެ. ދައުލަތުގެ ކެރިފޯރުންތެރިކަން ހުރި މިންވަރަކުން ރައްޔިތުންނަށް ސާފު ބޯފެނާއި ނަރުދަމާގެ ޚިދުމަތް ފޯރުކޮށްދޭންޖެހޭކަމަށް ރައީސް ވިދާޅުވިއެވެ.

ރައީސް ވިދާޅުވީ މިސަރުކާރުގެ ފަސް އަހަރު ނިމިގެންދާއިރު، ރާއްޖޭގެ ކޮންމެ ތަނެއްގައި ކޮންމެ ރަށެއްގައި ދިރިއުޅޭ މީހަކަށްވެސް ސާފު ބޯފެނާއި ނަރުދަމާގެ ޚިދުމަތް ސަރުކާރުން ފޯރުކޮށްދޭނެކަމަށެވެ.