މިއަހަރުގެ ގޯލްޑަން ފުޓް އެވޯޑު ލެވަންޑޯސްކީ އަށް

މިއަހަރުގެ ގޯލްޑަން ފުޓް އެވޯޑު ބާސެލޯނާ އަށް ކުޅެމުން އަންނަ ރޮބާޓް ލެވަންޑޯސްކީ އަށް ލިބިއްޖެ އެވެ.

ލެވަންޑޯސްކީ އަށް މި އެވޯޑު ލިބިފައިވަނީ ބުދަ ދުވަހުގެ ރޭ މޮނާކޯ ގައި ބޭއްވި ޚާއްސަ ރަސްމިއްޔާތެއްގަ އެވެ. އެވޯޑު ކާމިޔާބު ކުރި ލެވަންޑޯސްކީ ވަނީ ދާދި ފަހުން ޤަތަރުގައި ނިމުނު ފީފާ ވޯލްޑް ކަޕް މުބާރާތުގެ ގަދަ 16 އަށް ޕޮލެންޑް ގެންގޮސްދިނުމުގައި މުހިންމު ދައުރެއް އަދާކޮށްފަ އެވެ. މީގެ އިތުރުން މި ސީޒަންގައި އޭނާ ވަނީ ބަޔާން މިއުނިކް ދޫކޮށް، ސްޕެއިންގެ ބާސެލޯނާ އަށް ބަދަލުވެފަ އެވެ. ބާސެލޯނާ އަށް ބަދަލުވެ ލެވަންޑޯސްކީ މޮޅު ކުޅުމެއް ދައްކަމުން އަންނަ އިރު، މި ސީޒަންގެ ސްޕެނިޝް ލީގުގައި މިހާތަނަށް އެންމެ ގިނަ ލަނޑު ޖެހި ކުޅުންތެރިޔާއަކީ ވެސް އޭނާ އެވެ.

އަހަރަކު އެއް ފަހަރު ދެމުން އަންނަ މި އެވޯޑަކީ އުމުރުން 28 އަހަރުން މަތީގެ ކުޅުންތެރިންގެ ތެރެއިން، ފުޓުބޯޅަ ކުޅުމުން އަންނަ ކުޅުންތެރިޔަކަށް ދެމުން އަންނަ އެވޯޑެކެވެ. ސަޕޯޓަރުންގެ ވޯޓަކުން ހޮވާ މި އެވޯޑު ކޮންމެ ކުޅުންތެރިޔަކަށް ވެސް ލިބޭނީ އެއް ފަހަރު އެވެ. އެންމެ ފަހުން މި އެވޯޑު މިދިޔަ އަހަރު ކާމިޔާބުކޮށްފައި ވަނީ ލިވަޕޫލަށް ކުޅެމުން އަންނަ މިޞްރުގެ ފޯވާޑް މުޙައްމަދު ޞަލާޙު އެވެ.

އެންމެ ފުރަތަމަ ގޯލްޑަން ފުޓް އެވޯޑު ދޭން ފެށީ 2003 ވަނަ އަހަރު އެވެ. މި އެވޯޑު އެންމެ ފުރަތަމަ ކާމިޔާބު ކުރި ކުޅުންތެރިޔަކީ އިޓަލީގެ ރޮބާޓީ ބާޖިއޯ އެވެ. މި އެވޯޑު ކާމިޔާބު ކުރި ކުޅުންތެރިންގެ ތެރޭގައި ބްރެޒިލްގެ ރޮނާލްޑޯ، ރޮނާލްޑީނިއޯ، ރޮބާޓޯ ކާލޯސް، އައިވަރީ ކޯސްޓުގެ ޑިޑިއޭ ޑްރޮގްބާ، ސްޕެއިންގެ އިނިއެސްޓާ، އިކާ ކަސިޔަސް، އުރުގުއޭގެ އެޑިންސަން ކަވާނީ، ކްރޮއޭޝިއާގެ ލޫކާ މޮޑްރިޗް އަދި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ހިމެނެ އެވެ.