ޖިިނާއީ އަދުލުގެ ނިޒާމު ހިނގާ ގޮތް އާންމުންނަށް އެނގުން މުހިއްމު: ޝުޖޫން

ޖިިނާއީ އަދުލުގެ ނިޒާމު ހިނގާ ގޮތް އާންމުންނަށް އެނގުން މުހިއްމުކަމަށް ސުޕްރީމް ކޯޓުގެ ފަނޑިޔާރު އައިޝާ ޝުޖޫން މުޙައްމަދު ވިދާޅުވެއްޖެއެވެ.

ޕީޖީ އޮފީހުގެ ނިއުސްލެޓަރ "އުންސުރު" ލޯންޗު ކުރުމުގެ ރަސްމިއްޔާތުގައި ދެއްކެވި ވާހަކަފުޅުގައި ޝުޖޫން ވިދާޅުވީ، ޖިނާއީ އަދުލުގެ ނިޒާމަކީ ދިވެހިރާއްޖޭގައި އުޅޭ އެންމެންގެ ރައްކާތެރިކަމާއި، މުޖުތަމައުގެ ސުލްޙަމަސަލަސްކަމާ ގުޅިފައިވާ ނިޒާމެއް ކަމަށެވެ.

ވުމާއެކު، މި ނިޒާމު ހިނގަމުން އަންނަ ގޮތް މީހުންނަށް އެނގުމަކީ މުހިއްމު ކަމެއްކަން ޝުޖޫން ފާހަގަ ކުރެއްވިއެވެ.

އެގޮތުން ބަލާއިރު، މީހުންގެ މައްޗަށް ދައުވާ ކުރުމަށް މެދުވެރިވާ ކަންކަމާއި، އެމީހުންގެ މައްޗަށް ޙުކުމް އިއްވުމުގައި ރިއާޔަތް ކުރަންޖެހޭ ކަންކަމަކީ ކޮބައިކަން އެނގޭ ގޮތަށް ދިރާސާ ކުރެވި، އެ ދިރާސާތައް އާންމު ކުރުމަކީ، ނިޒާމުގައި ހުރި ހުސްކަން އާންމުންނަށް ދެނެގަތުމުގައި ލިބިގެންދާނެ ލުއިފަސޭހަ ކަމެއްކަމަށް ޝުޖޫން ވިދާޅުވިއެވެ.

ޝުޖޫން ވިދާޅުވީ، ކުށުގެ ތުހުމަތު ކުރެވޭ މީހުން ހައްޔަރު ނުކުރެވުމުން، ނުވަތަ ހައްޔަރުކޮށްފައި ހުއްޓައި ދޫކޮށްލުމުން ވަރަށް ގިނަ ފަހަރު އާންމުންގެ މެދުގައި އެފަދަ ކަންކަމުގެ ހިތްހަމަނުޖެހުން އޮންނަކަމަށެވެ.

އެއީ އާންމު އުސޫލުން ކަން ހިނގާނެވެސް ގޮތްކަން ފާހަގަ ކުރައްވައި ޝުޖޫން ވިދާޅުވީ، އެކަން އެހެން ހިނގަނީ ޖިނާއީ އަދުލުގެ ނިޒާމު ރޭވިފައިވާ ގޮތާއި، އެ ނިޒާމުގެ ތެރެއިން ފުރިހަމަވާން ޖެހޭ ކަންކަމަކީ ކޮބައިކަން އާންމުންނަށް އެނގިފައި ނޯންނާތީ ކަމަށެވެ.

ޝުޖޫން އިތުރަށް ވިދާޅުވީ، މައްސަލަ ރިޕޯޓު ކުރުމާ ހިސާބުން އެ މައްސަލައިގެ ތަހުގީގާއި، ދައުވާ ކުރުމާއި، ޝަރީއަތް ކުރުމުގައި އެތައް ކަމެއް ހިމެނޭ ކަމަށެވެ. އެކަންކަމުގެ ތެރޭގައި ޚިދުމަތް ފޯރުކޮށްދޭ ފަރާތުން އުފުލަން ޖެހޭ ޒިންމާވެސް ކުޑަ ނޫންކަމަށް ޝުޖޫން ވިދާޅުވިއެވެ.

ޝުޖޫން ވިދާޅުވީ، އުންސުރު ނިއުސްލެޓަރ އަކީ މި ކަންކަން ޙާސިލު ކުރުމަށް ކޮށިގެންދިޔަ މަގެއް ކަމަށެވެ.