15 ރަށަކަށް އިސް މެޖިސްޓްރޭޓުން ހޯދަން އިއުލާނުކޮށްފި
20 ޑިސެމްބަރު 2022 | އަންގާރަ 06:2730 ޖަނަވަރީ 2023 ވަނަ ދުވަހުގެ 12:00 ގެ ކުރިން ހުށައެޅޭނެ
ޖުޑީޝަލް ސަރވިސް ކޮމިޝަން
15 ރަށަކަށް އިސް މެޖިސްޓްރޭޓުން ހޯދަން ޖުޑީޝަލް ސަރވިސް ކޮމިޝަން (ޖޭއެސްސީން ) އިއުލާނުކޮށްފިއެވެ.
މި މަޤާމުތަކަށް ހުޅުވާލާފައިވަނީ ހޯމަ ދުވަހު ޖޭއެސްސީން ކުރި އިއުލާނެއްގައެވެ. އެގޮތުން އިސް މެޖިސްޓްރޭޓުން ހޯދުމަށް ހުޅުވާލާފައިވާ ރަށްތަކަކީ ހދ. ނޮޅިވަރަމް
ށ. ކޮމަންޑޫ، ނ. ވެލިދޫ، ބ. ދަރަވަންދޫ، ބ. ގޮއިދޫ، ޅ. ހިންނަވަރު، ކ. ކާށިދޫ، އއ. މާޅޮސް، ވ. ފުލިދޫ، މ. މުލަށް، ފ. ފީއަލި، ގއ. ގެމަނަފުށި، ގއ. ދާންދޫ، ގދ. ރަތަފަންދޫ، އަދި ގދ. ފަރެސްމާތޮޑާ މެޖިސްޓްރޭޓު ކޯޓަށެވެ.
ކޮމިޝަނުން ވަނީ 30 ޖަނަވަރީ 2023 ވަނަ ދުވަހުގެ 12:00 ގެ ކުރިން ކޮމިޝަނުގެ ފަހިރެސް ޕޯޓަލް މެދުވެރިކޮށް މަޤާމަށް އެދި ހުށައެޅުމަށް އެދިފައެވެ.
އިސް މެޖިސްޓްރޭޓެއްގެ އަސާސީ މުސާރައަކީ 21،000 ރުފިޔާއެވެ. ލިވިންގ އެލަވަންސްއަށް 4000 ރުފިޔާ ލިބޭއިރު، ރިސްކް އެލަވަންސް ގޮތުގައި 600 ރުފިޔާ ލިބެއެވެ.
އޭގެ އިތުރުން، ރައްޔިތުންގެ މަޖިލީހުން ކަނޑައަޅާފައިވާ ގޮތުގެމަތިން ފޯނު އެލަވަންސް ލިބިދޭއިރު، ޤާނޫނު ނަންބަރު 2010/13 (ދިވެހިރާއްޖޭގެ ފަނޑިޔާރުންގެ ޤާނޫނު) ގައިވާ ގޮތުގެމަތިން ރައްޔިތުންގެ މަޖިލީހުން ކަނޑައަޅާފައިވާ ގޮތުގެމަތީން މެޑިކަލް އިންޝިއުރެންސްވެސް ލިބެއެވެ.
މި މަޤާމަށް ކުރިމަތިލައްވާ ފަރާތްތަކުގެ ޝަރުތުތަކުގެ ތެރޭގައި މުސްލިމަކު ކަމުގައިވުމާއި، ސުންނަތް ޖަމާޢަތުގެ މީހަކު ކަމުގައިވުމާއި، ބުއްދިހަމައަށް ހުރި މީހަކު ކަމުގައިވުމުގެ އިތުރުން، ޤާނޫނުއަސާސީގެ ދަށުން ނުވަތަ ޤާނޫނެއްގެ ދަށުން އިންތިޚާބުކޮށްފައިވާ ނުވަތަ ޢައްޔަންކޮށްފައިވާ ސިޔާސީ މަޤާމެއް ފުރަމުންދާ މީހަކު ކަމުގައި ނުވުމާއި، ސިޔާސީ ޕާޓީއެއްގެ މެންބަރަކު ކަމުގައި ނުވަތަ ސިޔާސީ ޕާޓީއެއްގައި ޙަރަކާތްތެރިވާ މީހަކު ކަމުގައި ނުވުން ހިމެނެއެވެ.
އޭގެ އިތުރުން، އިސްލާމްދީނުގައި ޙައްދެއް ކަނޑައެޅިފައިވާ ކުށެއް، ނުވަތަ ޚިޔާނާތުގެ ކުށެއް، ނުވަތަ ރިޝްވަތުގެ ކުށެއް ކުރިކަން ޝަރީޢަތަށް ސާބިތުވެފައިވާ މީހަކު ކަމުގައި ނުވުންވެސް ޝަރުތުތަކުގެ ތެރޭގައި ހިމެނެއެވެ.
