ތިލަމާލެ ބްރިޖް އެޅުމަށް ބޭނުންކުރި ޕްލެޓްފޯމެއް ވިލިމާލެ ފަރަށް އަރައި ލިބުނު ގެއްލުންތަކާ ގުޅިގެން، އެފްކޮންސް ޖޫރިމަނާކުރަން ނިންމި ނިންމުން އިސްތިއުނާފުކުރުމާ ގުޅޭގޮތުން ގޮތެއް ނިންމާފައި ނުވާކަމަށް މައުލޫމާތު ލިބިއްޖެއެވެ.

އެންވަޔަރަމަންޓް މިނިސްޓްރީގެ އޮފިޝަލަކު ރާއްޖެ އެމްވީއަށް ވިދާޅުވީ، އެފްކޮންްސް ޖޫރިމަނާ ކުރި މައްސަލަ އަދި އޮތީ ރިވިއު މަރުހަލާގައި ކަަމަށެވެ. އެންވަޔަރަމަންޓް މިނިސްޓްރީން މީގެ ކުރިން ބުނިގޮތުގައި، އެފްކޮންސް ޖޫރިމަނާކުރުމަށް ނިންމި ނިންމުން އިސްތިއުނާފުކުރުމަށް ހުށަހަޅާފައިވަނީ މި ހިނގާ ޑިސެމްބަރު މަހުގެ 11 ވަނަ ދުވަހުއެވެ. އެކަމާގުޅިގެން ބަލަންޖެހޭ ކަންކަން ބަލަމުން އަންނަކަމަށް އެ މިނިސްޓްރީން ވަނީ ބުނެފައެވެ.

ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ ސެލްފް އެލެވޭޓިންގ ޕްލެޓްފޯމް (އެސްއީޕީ) ވިލިމާލެ ފަރަށް އެރުމާގުޅިގެން ލިބުނު ގެއްލުންތައް ބެލުމަށްފަހު، ބްރިޖްގެ މަސައްކަތްކުރަމުންދާ އެފްކޮންސް ޖޫރިމަނާކުރަން އީޕީއޭއިން ނިންމީ 69,411,800.00 (ފަސްދޮޅަސް ނުވަ މިލިއަން ހަތަރުލައްކަ އެގާރަހާސް އަށްސަތޭކަ) ރުފިޔާއިންނެވެ. އޭރު އީޕީއޭއިން ވަނީ ސަރުކާރު ބަންދު ދުވަސްތައް ހިމެނޭހެން 30 ދުވަހުގެ ތެރޭގައި މި ފައިސާ އީޕީއޭއަށް ދެއްކުމަށް އެފްކޮންސްއަށް އަންގާފައެވެ. އީޕީއޭއިން އެ ނިންމުން ނިންމާފައިވަނީ ނޮވެމްބަރު މަހުގެ 13ގައެވެ.

އީޕިއޭއިން ނެރުނު ބަޔާނެއްގައި ބުނެފައިވަނީ، ޕްލެޓްފޯމުގެ ވެރިފަރާތާއި އެ އިދާރާ ގުޅިގެން ސަރވޭއެއް ކުރިކަމަށާއި، 14-22 އޮކްޓޯބަރަށް އެފްކޮންސްއިން ކުރި ދިރާސާގައި އެ އެޖެންސީގެ އޮބްޒަރވަރުން ބައިވެރިވެފައި ވާނެކަމަށެވެ. އެގޮތުން ބެލި ބެލުމުން، ޕްލެޓްފޯމްގެ ބައިތަކުންނާއި އެތަކެތި ނެގުމަށް ކުރި މަސައްކަތުން އެ ސަރަހައްދުގެ ފަރުގެ އެކި ދިމަދިމާއިން އެކިވަރުގެ ގެއްލުން ލިބިފައިވާކަން އެނގިފައިވާކަމަށް އީޕީއޭއިން ބުނެއެވެ. އީޕީއޭއިން ބުނީ 2755 އަކަމީޓަރުގެ ސަރަހައްދަކަށް ގެއްލުން ލިބިފައިވާކަމަށް ކަނޑައަޅާފައިވާނެ ކަމަށެވެ. މީގެ އިތުރުން، ފަރުގައި 10 ފޫޓުގެ ފުންމިނުގެ ބޮޑެތި ވަޅުގަނޑުތައްވެސް ވަނީ ހެދިފައެވެ.

ފަރަށް އެރި ޕްލެޓްފޯމް ފުންކޮށްފައިވަނީ ޕްލެޓްފޯމު ފަރަށް އެރިތާ 12 ދުވަސް ފަހުން، އޮގަސްޓް މަހުގެ 28 ވަނަ ދުވަހުއެވެ.