ފެމިލީ ކޯޓު ރިސެސްއަށް، ކައިވެނިކޮށްދޭނެ
ރިސެސްގެ މުއްދަތުގައި މައްސަލަތައް ހިނގުން މަދު ކުރެވޭނެ
ފެމިލީ ކޯޓް
ފެމިލީ ކޯޓުވެސް ރިސެސްއަށް ގޮސްފިއެވެ.
ފެމިލީ ކޯޓުން ކުރި އިއުލާނެއްގައި ބުނީ، މިހިނގާ ޑިސެމްބަރު މަހުގެ 16ން ފެށިގެން، 31 ވަނަ ދުވަހުގެ ނިޔަލަށް އެ ކޯޓު އޮންނާނީ ރިސެސްގައި ކަމަށެވެ.
ރިސެސްގެ މުއްދަތުގައި މައްސަލަތައް ހިނގުން މަދު ކުރެވޭނެކަމަށް އެ ކޯޓުން މައުލޫމާތު ދެއެވެ.
އެހެންނަމަވެސް، ފޯމު ބަލައިގަތުމާއި، ކައިވެނި ކޮށްދިނުމާއި، އެނޫންވެސް އިދާރީ ކަންކަން މެދުނުކެނޑި ކުރިއަށްދާނެކަން ފެމިލީ ކޯޓުން ފާހަގަކޮށްފައިވެއެވެ.
އޭގެ އިތުރުން، ރިސެސްގެ މުއްދަތުގެ ތެރޭގައި ކޯޓުގެ ގާޒީންނާއި މުވައްޒަފުންނަށް ތަފާތު ތަމްރީނު ޕްރޮގްރާމްތައް ހިންގުމަށް ރޭވިފައިވާކަމަށްވެސް ފެމިލީ ކޯޓުން މައުލޫމާތުދެއެވެ.
މި ޑިސެމްބަރު މަހު ކްރިމިނަލް ކޯޓާއި ހައިކޯޓުވެސް ރިސެސްއަށް ގޮސްފައިވާއިރު، ޑިސެމްބަރު މަހުގެ 1 ވަނަ ދުވަހުން ފެށިގެން އަންނަ ޖެނުއަރީ މަހުގެ 1 ގެ ނިޔަލަށް ސުޕްރީމްކޯޓުވެސް ވަނީ ރިސެސްއަށް ގޮސްފައެވެ.
