ޖުޑީޝަރީ ފޯރ ޖޫނިއަރ އިފްތިތާހުކުރުމުގެ ރަސްމިއްޔާތު ބާއްވައިފިއެވެ.

8 ދުވަހުގެ މުއްދަތަށް ކުރިއަށް ގެންދާ މި ޕްރޮގްރާމް ފަށާފައިވަނީ ހޮނިހިރު ދުވަހުއެވެ.

މި ޕްރޮގްރާމް ފެށުމަށްޓަކައި ބޭއްވި ރަސްމިއްޔާތުގައި ދެއްކެވި ވާހަކަފުޅުގައި ޖޭއެސްސީގެ ރައީސް ހިސާން ހުސައިން ވިދާޅުވީ، ޖޭއެސްސީގެ މަސައްކަތްތަކަކީ ފަސޭހަ މަސައްކަތްތަކެއް ނޫން ކަމަށެވެ. މިއީ އެއް ބައެއްގެ ހިތްހަމަޖެހުމާއި އަނެއް ބައެއްގެ ނުރުހުމާއެކު، ތައުރީފާއި ފާޑުކިއުމުގެ ތެރެއިން ކުރާ ބުރަ މަސައްކަތެއްކަން ހިސާން ފާހަގަ ކުރެއްވިއެވެ.

ހިސާން އިތުރަށް ވިދާޅުވީ، ކޯޓުގެ ކުރިމަތީގައި ހުއްޓޭ ކޮންމެ ފަރުދަކީވެސް, އިންސާފުވެރި، އަދުލުވެރި ފަނޑިޔާރަކު ހައްގުވާ ފަރާތެއްކަމަށެވެ. ޖޭއެސްސީގެ މަސައްކަތްތައް ބައްޓަންވެފައިވަނީވެސް އެގޮތަށްކަން ހިސާން ފާހަގަކުރެއްވިއެވެ.

މިއީ ޒުވާނުން ޖުޑީޝަލް ދާއިރާއަށް ޝައުގުވެރިވާ މިންވަރު އިތުރުކޮށް، މި ދާއިރާގެ ތެރެއަށް ވެއްދުމަށްޓަކައި ކުރިއަށްގެންދާ ޕްރޮގްރާމެކެވެ. މި ޕްރޮގްރާމްގައި ދެ ޖިންސުން ގިނަ އަދަދެއްގެ ޒުވާނުން ބައިވެރިވެފައިވެއެވެ.

މިއީ ޖޭއެސްސީއާއި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި ޔޫއެންޑީޕީ ގުޅިގެން ކުރިއަށްގެންދާ ޕްރޮގްރާމެކެވެ. މި ޕްރޮގްރާމް ހިންގުމަށް ބްރިޓިޝް ހައިކޮމިޝަނުންވެސް އެހީތެރިކަން ފޯރުކޮށްދީފައިވެއެވެ.

މި ރަސްމިއްޔާތުގައި ޔޫއެންޑީޕީން ރާއްޖެއަށް ކަނޑައަޅާފައި ހުންނަވާ ރެސިޑެންޓް ރެޕްރެޒެންޓޭޓިވް، އެންރިކޯ ގަވޭލިއާ ވަނީ، ޔޫއެންޑީޕީން ރާއްޖޭގެ ޝަރުއީ ދާއިރާއަށް ވެދެމުންދާ އެހީތެރިކަން ފާހަގަކުރައްވާފައެވެ. އަދި އަދުލު އިންސާފު ގާއިމުކޮށްދިނުމުގައި ރައްޔިތުންނަށް ބަލައިގަނެވޭނެފަދަ މުއައްސަސާތަކެއް ހުރުމުގެ މުހިއްމުކަމުގެ މައްޗަށް އޭނާ ވަނީ އަލިއަޅުވާލައްވާފައެވެ.

މި ޕްރޮގްރާމްގައި ރާއްޖޭގެ ކޯޓުތަކުގެ ފަނޑިޔާރުންގެ އިތުރުން، ޕްރޮސެކިއުޓަރ ޖެނެރަލް ހުސައިން ޝަމީމާއި، ޝަރުއީ ދާއިރާގެ އިސް ބައެއް ފަރާތްތަކުން ބައިވެރިވެވަޑައިގެންނެވިއެވެ.