މުނާޒް ވަނީ، ރިލްވާން މަރާލުމުގައި ކަން ހިނގައިދިޔަގޮތް ރައީސް ޔާމީނަށް ދަންނަވާފައި، ފުރީވެސް ޔާމީންގެ އެހީއާއެކު
މުނާޒް ރައީސް ޔާމީނަށް އެ ވާހަކަތައް ދަންނަވާފައިވަނީ އޭނާގެ ބައިވެރިވުން ނުހިމެނޭ ގޮތަށް
ރިލްވާން އަހުމަދު
ނޫސްވެރިޔާ އަހްމަދު ރިލްވާން އަބްދުﷲ މަރާލުމާގުޅިގެން ބޮޑެތި ތުހުމަތުތަކެއް ކުރެވޭ ތ. އޮމަދޫ މުހައްމަދު މުނާޒު، ކުރީގެ ރައީސް އަބްދުﷲ ޔާމީނާ ބައްދަލުކޮށް، ރިލްވާން މަރާލިގޮތުގެ ތަފްސީލް ހިއްސާކޮށްފައިވާކަމަށް، "މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގު ކުރާ ކޮމިޝަނު"ން ބުނެފިއެވެ.
ބުރާސްފަތި ދުވަހު އެ ކޮމިޝަނުން ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ މެމްބަރު މިސްބާހް އައްބާސް ވިދާޅުވީ، މުނާޒު ރާއްޖެއިން ފުރުމުގެ ކުރިން ކުރީގެ ރައީސް ޔާމީނާ ބައްދަލުކުރިކަން ކޮމިޝަނަށް އެނގިފައިވާކަމަށެވެ. އަދި މުނާޒް ރާއްޖެއިން ބޭރަށް ފުރާފައިވަނީވެސް ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ އެހީތެރިކަމާއެކުގައިކަން އޭނާ ވަނީ ފާހަގަކުރައްވާފައެވެ. މިސްބާހު ވިދާޅުވީ މުނާޒް ރައީސް ޔާމީނަށް އެ ވާހަކަތައް ދަންނަވާފައި ވަނީ އޭނާގެ ބައިވެރިވުން ނުހިމެނޭގޮތަށް ކަމަށެވެ. އެގޮތުން، ރިލްވާން ގަދަކަމުން ކާރަކަށް ލައިގެން ގެންގޮސް މަރާލުމުގައި ބައިވެރިވި މީހުންނާއި އެކަން ކުރިގޮތް ރައީސް ޔާމީނަށް މުނާޒް ދަންނަވާފައިވާކަން ކޮމިޝަންގެ ތަހުގީގަށް އެނގިފައިވާކަަމަށް މިސްބާހު ވިދާޅުވިއެވެ.
އިތުރަށް ވާހަކަފުޅުދައްކަވަމުން މިސްބާހު ވިދާޅުވީ، އެ މައުލޫމާތު ކޮމިޝަނާ ހިއްސާކުރި ފަރާތަކީ މުނާޒުއާ ވަރަށް ގާތް މީހެއް ކަމަށެވެ. މުނާޒް ރާއްޖެއިން ބޭރަށް ސީރިއާއަށް ފުރީ 2017 ވަނަ އަހަރު ކަމަށްވެސް، މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުން ވަނީ ބުނެފައެވެެ. އަދި މުނާޒަކީ ސީރިއާގައި ހުރެގެން، އެމީހުންނާ ބައިވެރިވެ ހަނގުރާމަކުރުމަށް ސީރިއާއަށް ދާން ރެކްރޫޓްކުރަން އުޅުނު މީހެއްކަމަށް އެ ކޮމިޝަނުން ވަނީ ބުނެފައެވެ.
