އުސޫލާ ޚިލާފަށް ތިނަދޫ ޑްރަގް ޑިޓޮކްސިފިކޭޝަން ސެންޓަރު މަރާމާތުކުރަން ހަވާލުކުރި މައްސަލާގައި 3 މީހަކަށް ދައުވާކުރަން ޕީޖީއަށް

އުސޫލުތަކާ ޚިލާފަށް ގދ. ތިނަދޫ ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރީހެބިލިޓޭޝަން ސެންޓަރު މަރާމާތުކުރަން އަމިއްލަ ކުންފުންޏަކާ ހަވާލުކުރި މައްސަލާގައި، ޖެންޑަރ މިނިސްޓްރީގެ ކުރީގެ އިސް ތިން ވެރިއެއްގެ މައްޗަށް ދައުވާކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ފޮނުވައިފިއެވެ.

އެންޓި ކޮރަޕްޝަން ކޮމިޝަން (އޭސީސީ)ން ޕީޖީއަށް ހުށަހެޅި މިމައްސަލައަކީ، ދައުލަތުގެ މުވައްޒަފަކަށްވެ ހުރެ ޖެންޑަރ މިނިސްޓްރީގެ ބިޑު ކޮމިޓީގެ މެމްބަރުން، ނޭޝަނަލް ޑްރަގް އޭޖެންސީން ކުރި އިއުލާނާ ގުޅިގެން ބިޑް ހުށަހެޅި ފަރާތްތަކުގެ ތެރެއިން ދެވަނައަށް އެންމެ މަތިން މާކްސް ލިބުނު ކުންފުންޏަށް މަސައްކަތް އެވޯޑްކޮށްފައި އޮތުމުން، ދައުލަތަށް ފައިދާވާން އޮތްކަމެއްގައި އެ ނޫން ގޮތަކަށް އަމަލުކުރިކަމުގެ ތުހުމަތާ ގުޅިގެން އެ ކޮމިޝަނަށް ހުށައަޅައި ތަހުގީގުކޮށްފައިވާ މައްސަލައެކެވެ.

އޭސީސީން ބުނިގޮތުގައި މި މައްސަލާގައި ދައުވާކުރުމަށް އެދި ޕީޖީއަށް ފޮނުވާފައިވަނީ އޭރު ޖެންޑަރ މިނިސްޓްރީގެ ބިޑު ކޮމިޓީގެ މެމްބަރުންގެ ގޮތުގައި ތިބި އެ މިނިސްޓްރީގެ ސްޓޭޓް މިނިސްޓަރު، ސ. ހިތަދޫ ހަނދުވަރީގެ، އާއިޝަތު ރަޝީދުއާއި އޭރުގެ ޑިރެކްޓަރު ގދ. ތިނަދޫ ނޫވިލު، ހުދޫދާ ވަހީދުގެ އިތުރުން ޑިރެކްޓަރު، ގދ. ގައްދޫ ވިލިގަލާ، އާމިނަތު ޝިހާމާގެ މައްޗަށެވެ.

މި މައްސަލައިގެ ތަހުގީގަށް، ތިނަދޫ ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރީހެބިލިޓޭޝަން ސެންޓަރުގައި ކުރަންހުރި މަރާމާތުގެ މަސައްކަތްކޮށްދޭނެ ފަރާތެއް ހޯދުމަށް ނޭޝަނަލް ޑްރަގް އެޖެންސީން ކުރި އިއުލާނާ ގުޅިގެން ހުށަހެޅި ބިޑުތައް އެ އޭޖެންސީން އިވެލުއޭޓުކޮށް، އިއުލާނާގުޅޭ މައުލޫމާތު ކަރުދާހުގައި ބަޔާންކޮށްފައިވާ ކްރައިޓީރިއާއާ އެއްގޮތަށް ޕޮއިންޓް ދިނުމުން، އިވެލުއޭޝަނުން އެންމެ މަތިން ޕޮއިންޓް ލިބުނު ފަރާތަށް އެ މަސައްކަތް ހަވާލުކުރުމުގެ ބަދަލުގައި، ޖެންޑަރ މިނިސްޓްރީގެ ބިޑު ކޮމިޓީން އެ މަސައްކަތް ހަވާލުކޮށްފައިވަނީ އިވެލުއޭޝަނުން ދެވަނައަށް ދިޔަ ކުންފުންޏައްކަން ތަހުގީގަށް އެނގިފައިވާކަމަށް އޭސީސީން ބުންޏެވެ.

އިވެލުއޭޝަނުން އެއްވަނަ ލިބޭ ފަރާތަށް އެ މަސައްކަތް އެވޯޑުކުރުމުގެ ބަދަލުގައި ދެވަނައަށް ދިޔަ ފަރާތަށް އެ މަސައްކަތް ހަވާލުކުރުމަށް ޖެންޑަރ މިނިސްޓްރީގެ ބިޑު ކޮމިޓީން ނިންމީ، އެ ނިންމުމުގެ ސަބަބުން އިވެލުއޭޝަނުން ދެވަނައަށް ދިޔަ ފަރާތަށް ލިބެން ނުޖެހޭ ނާޖާއިޒު މަންފާއެއް އެ ފަރާތަށް ލިބޭނެކަން އެނގިތިބެ، މަސައްކަތް ހަވާލުކުރި ފަރާތަށް ނާޖާއިޒު މަންފާއެއް ހޯދައިދިނުމުގެ މަގުދުގައިކަން ތަހުގީގަށް އެނގޭތީކަމަށާއި، އިވެލުއޭޝަނުން ދެވަނައަށް ދިޔަ ކުންފުންޏާ އެ މަސައްކަތް ހަވާލުކުރުމަށް ނިންމާފައިވަނީ އިވެލުއޭޝަނުން އެއްވަނައަށް ދިޔަ ފަރާތަށްވުރެ 657,846.60 (ހަލައްކަ ފަންސާސް ހަތްހާސް އަށްސަތޭކަ ސާޅީސް ހަ ރުފިޔާ ފަސްދޮޅަސް ލާރި) ބޮޑު އަގުގައިކަން ތަހުގީގަށް އެނގިފައިވާތީ ކަމަށްވެސް އޭސީސީން ބުންޏެވެ.

މިމައްސަލާގައި ހިމެނޭ ތިން މީހުންގެ މައްޗަށް ކުރަނީ، ދިވެހިރާއްޖޭގެ ގާނޫނުލްއުގޫބާތުގެ 513 ވަނަ މާއްދާގެ (ށ)ގެ ދަށުން، ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ކުށުގެ ދައުވާއާއި، ކޮރަޕްޝަން ހުއްޓުވުމާއި މަނާކުރުމުގެ ގާނޫނުގެ 13 ވަނަ މާއްދާގެ ދަށުން، ދައުލަތަށް ފައިދާއެއް ލިބެން އޮތްކަމެއްގައި އެ ނޫންގޮތަކަށް އަމަލުކުރުމުގެ ކުށުގެ ދައުވާއެވެ.