ހދ.ނޮޅިވަރަމްފަރުގެ ސަހަރާ ބަލާ ފާސްކޮށްފައި ވަނީ ފުލުހުންނަށް ހުށަހަޅާފައިވާ މައްސަލަ އަކާއި ގުޅިގެން ކަމަށް ފުލުހުން ބުނެފިއެވެ.

ނޮޅިވަރަމްފަރު ގައި ޑިސެމްބަރު މަހުގެ 12 ވަނަ ދުވަހުގެ ރޭ 23:30 އެހާކަންހާއިރު ފުލުހުން ތިބެގެން އާންމުންގެ ބަޔަކު އެރަށު ސަހަރާ ކޮނެފައިވާ މައްސަލަ އެއް ވަނީ ފެންމަތިވެފައެެވެ. އެކަން އެފަރާތްތަކުން ކޮށްފައިވަނީ "ރުގްޔާ" ކުރުމުގެ ނަމުގައި ކަމަށް އެ ރަށު ކައުންސިލުން ބުނެއެވެ. ސަހަރާ ކޮނެފައި ވަނީ އެ ރަށު އަންހެނަކަށް ސިހުރު ޖެހުމުން ރުޖްޔާ ކުރަން ކަމަށް ކައުންސިލުން ބުނެއެވެ. ކައުންސިލުން ބުނީ އެ މަސައްކަތް ކުރީ ކައުންސިލްގެ ހުއްދައަކާއި ނުލާ، ކައުންސިލުން ތަކުރާރުކޮށް އެކަން އެގޮތަށް ނުކުރުމަށް ގޮވާލަމުން ދަނިކޮށް ކަަމަށެވެ. ، ސަހަރާ ކޮނުމަށްފަހު، މިހާރު ކޮނުނު ވަޅަށް ވެލި އަޅާފައިވާ ކަމަށް ވެސް ކައުންސިލުން ބުނެއެވެ.

"ރާއްޖެ އެމްވީ" އިން ކުރި ސުވާލަކަށް ޖަވާބުދެމުން ފުލުހުންގެ މީޑިއާ އޮފިޝަލް ވިދާޅުވީ ނޮޅިވަރަމްފަރުގެ ސަހަރާ ބަލާފާސްކޮށްފައި ވަނީ އެ މުއައްސަސާ އަށް ހުށހަޅާފައިވާ ސިހުރުހެދިކަމަށް ބުނާ މައްސަލައަކާއި ގުޅިގެން ކަމަށެވެ. ފުލުހުންނަށް ހުށަހަަޅާ މައްސަލަތައް ތަހުގީގުކުރުމުގައި އާއްމުކޮށް އަމަލުކުރާ އުސޫލާއި އެއްގޮތަށް އެ މައްސަލަ ތަހުގީގުކުރަމުންދާކަމަށް އޭނާ ވިދާޅުވިއެވެ. އޭނާ ވިދާޅުވީ ސަހަރާ ބަލާ ފާސްކޮށްފައި ވަނީ ކައުންސިލް އަށް އެންގުމަށް ފަހުގައި ކަމަށެވެ.

މި މައްސަލަ އާއި ގުޅިގެން ނޮޅިވަރަމްފަރު ކައުންސިލްގެ ރައީސް އަބްދުﷲ ނަދީމް "ރާއްޖެ އެމްވީ" އަށް ވިދާޅުވީ ފުލުހުން ސަހަރާ ބަލާ ފާސްކުރީ ފޮރެންސިކް ބޭނުމުގައި ކަމަށް އެ މަސައްކަތުގައި އުޅުނު ފުލުހުން ކައުންސިލްގައި ބުނެފައިވާ ކަމަށެވެ. ސަރަހާ ކޮނުމުގެ ހުއްދަ އަށް ކައުންސިލްގައި އެދުނީ ސިހުރު ޖެހުނު ކަމަށް ބުނާ އަންހެން މީހާގެ އާއިލާގެ ފަރާތުން ކަމަށް އޭނާ ވިދާޅުވިއެވެ. އެކަމާއި ގުޅިގެން އިސްލާމިކް މިނިސްޓްރީގެ ދީނީ ކަންތައްތަކާއި ގުޅޭ ޔުނިޓުގައި ލަފައަކަށް އެދުމުން ޝަރުއީ ގޮތުން ބަލާ އިރު އެގޮތަށް ސަހަރާ ކޮނުމަކީ އޮންނަ ކަމެއް ނޫން ކަމަށާއި ހުއްދަ ދިނުން ރަނގަޅު ނޫން ކަމަށް އެ މިނިސްޓްރީ އިން ލަފާދީފައިވާ ކަމަށް އޭނާ ވިދާޅުވިއެވެ. އެހެންކަމުން ކައުންސިލުން ވާނީ ސަހަރާ ނުކޮނުމަށް އަންގާފައި ކަމަށް އޭނާ ވިދާޅުވިއެވެ.

އެހެންނަމަވެސް އާއްމުންގެ ބަޔަކު ފުލުހުންގެ ހާޒިރުގައި ސަހަރާ ކޮނެފައިވާތީ އެކަން ހިނގި ގޮތް ބަލާ ދިނުމަށް އެދި ޕޮލިސް އިންޓަރގްރިޓީ ކޮމިޝަނާއި، ހޯމް މިނިސްޓްރީގެ އިތުރުން އިސްލާމިކް މިނިސްޓްރީ އަށް މައްސަލަ ހުށަހެޅުމަށް ކައުންސިލުން މިހާރު ނިންމާފައިވާ ކަމަށް ވެސް އޭނާ ވަނީ ފާހަގަކުރައްވާފައެވެ. ނަދީމް ވަނީ މި މައްސަލައިގައި ފުލުހުންގެ އަމަލުތަކާއި މެދު ސުވާލު އުފައްދަވާފައެވެ. އެގޮތުން ފޮރެންސިކްގެ ބޭނުމަށް ސަހަރާ ކޮނުނުކަމަށް ބުނާ އިރު އާއްމުންގެ ބަޔަކު ސަހަރާ ކޮނުނީ ކީއްވެތޯ އޭނާ ސުވާލު އުފެއްދިއެވެ. އަދި ފޮރެންސިކް ތަހުލީލަށް އެ ސަރަހައްދުން އެއްވެސް އެއްޗެއް ނަގާފައި ނުވާ ކަމަށާއި، ފޮރެންސިކް އިން އާއްމުކޮށް އަމަލުކުރާ އުސޫލަށް އަމަލުކޮށްފައި ނުވާ ކަަމަށް އޭނާ ތުހުމަތުކުރެއެވެ. ކައުންސިލުން މިހެން ބުނި ނަމަވެސް ފުލުހުން ވަނީ މި މައްސަލައިގެ ތަހުގީގު ކުރިއަށް ދަނީ ފުލުހުންގެ އުސޫލާއި އެއްގޮތަށް ކަމަށް ބުނެފައެވެ. ނަމަވެސް މައްސަލަ އާއި ގުޅޭ އިތުރު ތަފްސީލެއް ފުލުހުން ހާމައެއް ނުކުރެއެވެ.

ސަރަހާ ކޮނެގެން ނަގާފައިވަނީ ސިހުރު ހަދާފައިވާ ހިރި ގަލެއް ކަމަށް ނޮޅިވަރަމްފަރު ކައުންސިލުން ބުނެއެވެ. އަދި އެ ހިރިގާ ނެގުމުން ސިހުރު ޖެހިފައިވާ ކުއްޖާގެ ހާލު ރަނގަޅުވަމުންދާ ކަމަށް ވެސް ކައުންސިލުން ވަނީ ބުނެފައެވެ. ނޮޅިވަރަމްފަރުގައި ސަހަރާ ތެރޭގައި މަހާނަ އެއް ކައިރި ކޮންނަ މަންޒަރު ފެންނަ ފޮޓޯ އާއި ވީޑިއޯތައް މީސްމީޑިއާގައި ވަނީ ދައުރުވެފައެވެ.