ޣާޒީ ސްކޫލުގެ މުދަލާއި ފައިސާ ގަވާއިދާ ހިލާފަށް ބޭނުންކުރި މައްސަލަ ތަހުގީގުކޮށްދިނުމަށް އެދި ފުލުހަށް ހުށަހަޅައިފި
ސްކޫލުގެ މުވައްޒަފުންތަކެއް އިޙްތިޖާޖު ކުރި މައްސަލަ ވެސް ދަނީ ބަލަމުން
ޣާޒީ ސްކޫލް
ޣާޒީ ސްކޫލުގެ 2 މުވައްޒަފެއްގެ މައްސަލަ ތަހުގީގުކޮށްދިނުމަށް އެދި ފުލުހަށް ހުށަހަޅައިފިއެވެ.
އެޑިއުކޭޝަން މިނިސްޓްރީން ބުނީ ޣާޒީ ސްކޫލުގައި ގަވާއިދާއި ޚިލާފަށް ހިގި ބައެއް ކަންކަމާއި ގުޅޭގޮތުން އެ މިނިސްޓްރީއަށް ހުށަހެޅުނު ޝަކުވާތަކުގެ ތެރެއިން ސްކޫލުގެ މުދަލާއި ފައިސާ ބެލެހެއްޓުމާ ގުޅުންހުރި މައްސަލަތައް ފާހަގަކުރެވި އެކަންކަން އިތުރަށް ބެލުމަށް މިނިސްޓްރީން އިންޓަރނަލް އޮޑިޓް ސެކްޝަނުން އޮޑިޓެއް ހަދާފައިވާ ކަމަށެވެ.
މި އޮޑިޓުގެ ތެރޭގައި ސްކޫލުގެ މުދަލާއި ފައިސާ ހަަރަދުކުރުމުގައި މާލިއްޔަތު ގަވާއިދާ ހިލާފަށް ބައެއް ކަންކަން ހިނގާފައިވާކަން ފާހަގަކުރެވި އެ މައްސަލަތައް ބެލުމަށް އިދާރީ ތަހުގީގެއް ހިންގާފައިވާ ކަމަށެވެ. އަދި މި އިދާރީ ތަހުގީގު ކުރިއަށްދިޔަ މަރުހަލާގައި، ބަލަމުންދިޔަ ކަންކަމުގެ އިތުރުން، އިތުރު ކަންކަމުގެ މައުލޫމާތު ލިބި ބަޔާންތައް ނެގުމުގެ މަރުހަލާ ދިގުލައިގެން ދިޔަކަމަށެވެ. ނަމަވެސް މައްސަލައިގެ އިދާރީ ތަހުގީގު ނިމި މައްސަލައިގެ ރިޕޯޓް އެކުލަވާލާ، ރިޕޯޓުން ފާހަގަކުރެވުނު ކަމަކަމަށް ރިއާޔަތްކޮށް އިހުމާލުވާ މުވައްޒަފުންނަށް އިސްލާހީ ފިޔަވަޅު އެޅުމުގެ މަސައްކަތް ފެށިފައިވާ ކަމަށެވެ.
މިނިސްޓްރީން ބުނީ މި މައްސަލަތަކުގެ ރިޕޯޓް ނިމުނުފަހުން ސްކޫލް މެދުވެރިކޮށް ސްލޫކުގެ 2 މުވައްޒަފަކާ ގުޅޭ ޑޮކިއުމެންޓް ފޯޖްކުރި މައްސަލައެއް މިނިސްޓްރީއަށް ހުށަހެޅި އެ މައްސަލަވެސް ބަލަމުންދާ ކަމަށެވެ. އަދި ސްކޫލުގެ މުވައްޒަފެއް، ސްކޫލަށް ލިބިފައިވާ ޓީވީއެއް ގެއަށް ގެންދިޔަ މައްސަލައެއް މިނިސްޓްރީއަށް ހުށަހެޅި، އެ މައްސަލަވެސް ބަލަމުން އަންނަ ކަމަށް މިނިސްޓްރީގެ ބަޔާނުގައި ބުނެފައިވެއެވެ. މި ދެކަމަކީ ވެސް އޭގައި ޖިނާއީ ކުށްތަކެއް ހިމެނޭ މައްސަލަތަކަށްވާތީ އެ މައްސަލަތައް އިތުރަށް ތަހުގީގުކޮށްދިނުމަށް އެދި މޯލްޑިވްސް ޕޮލިސް ސަރވިސްއަށް ހުށަހަޅާފައިވާ ކަމަށް މިނިސްޓްރީގެ ބަޔާނުގައި ބުނެފައިވެއެވެ.
މީގެ އިތުރުން ސްކޫލުގެ އެޑްމިނިސްޓްރޭޓަރ، މިނިސްޓްރީގެ ޑިޕާޓްމަންޓަކަށް މި މަހުގެ 6 ވަނަ ދުވަހުން ފެށިގެން ވަގުތީގޮތުން ބަދަލުކުރެވުނީ، ދިވެހި ސިވިލްސަރވިސްގެ ގަވާއިދުގެ 86 ވަނަ މާއްދާގައި ބުނާގޮތަށް "އިދާރީގޮތުން ގެނެވޭ ބަލެއްގެ ސަބަބުން ސަރުކާރުގެ އޮފީހެއްގެ ހިންގުމަށް އެދެވޭ ބަދަލެއް ގެނެވިދާނެކަމަށް މިނިސްޓަރަށް ނުވަތަ ޒިންމާދާރު އިސްވެރިއަކަށް ގަބޫލުކުރެވުން" މި ނުކުތާއަށް ރިއާޔަތްކޮށް ކަމަށެވެ.
އަދި އެފަރާތާ ގުޅޭގޮތުން ފާހަގަކުރެވޭ ކަންކަމުގައި މުވައްޒަފު ޖަވާބުދާރީ ކުރުވުމުގެ މަރުހަލާ ކުރިއަށްދާއިރު ސްކޫލުގެ އެޑްމިނިސްޓްރޭޓަރުގެ މަގާމުގައި އެ ފަތާތް ހުރުމަކީ އެކަމުން ސްކޫލަށް އިތުރު މައްސަލަތައް ކުރިމަތިވެދާނެ ކަމެއްކަމުގައި ފާހަގަކުރެވޭކަމަށެވެ. އަދި މި ބަދަލު މިގޮތަށް ގެނެވުނީ ސްކޫލް ހިންގުމާ ހަވާލުވެ ހުންނެވި ޑެޕިއުޓީ ޕްރިންސިޕަލާ ފޯނުން ގުޅައި އެކަމުގެ މައުލޫމާތު އެފަރާތާ ހިއްސާކޮށް މަޝްވަރާކުރުމަށްފަހުގައި ކަމަށް މިނިސްޓްރީން ބުނެއެވެ.
މީގެ އިތުރުން އެޑްމިނިސްޓްރޭޓަރ، މިނިސްޓްރީގެ ޑިޕާޓްމަންޓަކަށް ވަގުތީގޮތުން ބަދަލުކުރެވުނީ ދެވުނު ޕްރޮމޯޝަނެއްގެ ގޮތަކު ނޫން ކަމަށާއި، އެފަރާތުގެ ވަޒީފާ މިނިސްޓްރީއަށް ބަދަލުކުރި ކުރުމެއްގެ ގޮތަކުވެސް ނޫން ކަމަށް މިނިސްޓްރީގެ ބަޔާނުގައި ބުނެފައިވެއެވެ.
އަދި މި މައްސަލަތަކާ ގުޅިގެން ސްކޫލްގެ އެޑްމިނިސްޓްރޭޓަރ ހިމެނޭގޮތަށް އިސްލާހީ ފިޔަވަޅުއަޅަންޖެހޭ ފަރާތްތަކަށް އިސްލާހީ ފިޔަވަޅު އެޅުމުގެ ކުރިން، ސިވިލް ސަރވިސްގެ ގަވާއިދުގައި ބަޔާންކކުރާ ޖަވާބުދާރީވުމުގެ ފުރުސަތު އެފަރާތްތަކަށް ދެވޭނެކަމަށެވެ. އަދި ޖަވާބުދާރިއާއެކު މުވައްޒަފުންނަށް އިސްލާހީ ފިޔަވަޅު އެޅުމުގެ ކަންކަން ސިވިލްސަރވިސް މަޝްވަރާގެ މަތިން ކުރިއަށް ގެންދެވޭނެކަމަށް މިނިސްޓްރީން ވަނީ ބުނެފައެވެ.
އަދި މިގޮތަށް މިނިސްޓްރީން އަމަލުކުރަމުން ދަނިކޮށް، އަދި މިނިސްޓްރީން އަޅަމުންދާ ފިޔަވަޅުތައް ސްކޫލް ހިންގުމާއި ހަވާލުވެހުރި ފަރާތާ ހިއްސާކުރަމުން ގެންދަނިކޮށް، އެޑްމިނިސްޓްރޭޓަރަށް ޕްރޮމޯޝަނެއް ދީފައިވާކަމަށް ބުނެ ސްކޫލުގެ މުވައްޒަފުންތަކެއް އިޖްތިޖާޖު ކުރި މައްސަލައެއް ބަލަންފަށާފައިވާ ކަމަށް މިނިސްޓްރީން ބުނެއެވެ.
އަދި ކަމުގެ ހަގީގަށް އޮޅުވާލާ، ސްކޫލާއި މިނިސްޓްރީ ބަދުނާމުވާ ގޮތަށް ދޮގު މައުލޫމާތު މީޑިއާތަކާއި އެހެނިހެން ޕްލެޓްފޯމްތަކުގައި ނުފެތުރުމަށް މިނިސްޓްރީން ވަނީ އިލްތިމާސްކޮށްފައެވެ. އަދި މިނިސްޓްރީއަށް ހުށަހެޅިފައިވާ މައްސަލަތައް ބަލާ ނިމުމަށްފަހު ސިވިލް ސަރވިސްގެ ގަވާއިދާއެގޮތަށް އެކަންކަމުގައި ޝާމިލުވާ ފަރާތްތަކަށް އިސްލާހީ ފިޔަވަޅުއަޅާނެ ކަމަށްވެސް މިނިސްޓްރިގެ ބަޔާނުގައި ބުނެފައިވެއެވެ.
