އެލްޖީއޭގެ ނައިބު ރައީސަކަމަށް މިންނާ އިންތިޚާބުވެއްޖެ

ލާމަރުކަޒީ ނިޒާމުން ރާއްޖެ ހިންގުމާއި ގުޅޭ މައި އިދާރާ، ލޯކަލް ގަވަމަންޓް އޮތޯރިޓީ (އެލްޖީއޭ) ގެ އައު ބޯޑުގެ ނައިބު ރައީސް ކަމަށް މިންނާ ރަޝީދު އިންތިޚާބުކޮށްފިއެވެ.

އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އެންމެ ފަހުން ގެނައި އިސްލާހާއެކު، އެލްޖީއޭގެ ބޯޑު އަލުން އެކުލަވައިލިއިރު، މި ބޯޑުގައި ހިމެނިވަޑައިގަންނަވާ ފ. ނިލަންދޫ ހަތިކޮޅު، މިންނާ ރަޝީދަކީ، ޖިންސީ ހަމަހަމަކަމުގެ ދާއިރާއިން ތަޖުރިބާ ލިބިވަޑައިގެންފައިވާ ބޭފުޅެކެވެ.

އެލްޖީއޭއިން ހާމަކޮށްފައިވާ ގޮތުގައި، ލާމަރުކަޒީ ޤާނޫނުގައި ވާފަދައިން، އެލްޖީއޭގެ ބޯޑުގެ މެންބަރުންގެ މެދުގައި ނެގި ވޯޓަކުން، މިންނާ މި މަޤާމަށް އިންތިޚާބުކޮށްފައިވަނީ ހޯމަ ދުވަހުއެވެ.

އެލްޖީއޭގެ ބޯޑަށް ނައިބު ރައީސަކު އިންތިޚާބު ކުރިއިރު، އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި ބުނެފައިވަނީ، އެ ބޯޑުގެ ރައީސްކަން ކުރައްވަނީ ރައީސުލްޖުމްހޫރިއްޔާ ކަނޑައަޅުއްވާ ކެބިނެޓް މިނިސްޓަރެއް ކަމަށެވެ.

އެގޮތުން މިހާރު އެ ބޯޑުގެ ރައީސްކަން، ރައީސް ޔާމީން ހަވާލުކުރައްވާފައިވަނީ ހޯމް މިނިސްޓަރ އަޒްލީން އަޙުމަދާއެވެ.

އެލްޖީއޭގެ ބޯޑުގައި ކުރިން 9 މެންބަރުން ތިއްބެވި ނަމަވެސް، އެލްޖީއޭގެ ފުރިހަމަ ބާރު ރައީސުލްޖުމްހޫރިއްޔާއަށް ލިބޭގޮތަށް މިހާރު އެ ބޯޑުގެ މެންބަރުންގެ އަދަދު ވަނީ ފަހަކަށް މަދުކޮށްފައެވެ. އެގޮތުން، އެ ބޯޑުގެ ރައީސް، ހޯމް މިނިސްޓަރ އަޒްލީން އަޙުމަދާއި، ނައިބު ރައީސް މިންނާ ރަޝީދުގެ އިތުރުން ދެން އެ ބޯޑުގައި ހިމެނިވަޑައިގަންނަވަނީ، ސ. ހިތަދޫ ފަރުދާބަގީޗާގޭ އަހުމަދު ހަސަން (ޗާނދަލިޔާ ހަސަން) އާއި ގއ. ކަނޑުހުޅުދޫ ހެޕީކޯނަރު އާމިރު އަލީ އަދި އެ ބޯޑުގެ ސީއީއޯއެވެ.

މައުލޫމާތު ލިބިފައިވާ ގޮތުގައި އެލްޖީއޭގެ ބޯޑުގެ ނައިބު ރައީސަކަށް އިންތިޚާބުކުރި މިންނާ އަކީ ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު، ޑރ. ޢަބްދުﷲ ޚަލީލް އާއި ދެބެންގެ ދެދަރި ބޭފުޅެކެވެ.