މިދިޔަ މަހު 4.6 ބިލިއަން ރުފިޔާގެ މުދާ އެތެރެކޮށްފި

މިދިޔަ މަހު 4.6 ބިލިއަން ރުފިޔާގެ މުދާ އެތެރެކޮށްފިއެވެ.

ކަސްޓަމްސް އިން އާންމުކޮށްފައިވާ ތަފާސްހިސާބުތައް ދައްކާގޮތުން ފާއިތުވި ނޮވެމްބަރު މަހު ރާއްޖެއަށް އިމްޕޯޓް ކުރެވުނު މުދަލުގެ ސީ.އައި.އެފްއަގު 2021 ވަނަ އަހަރުގެ ނޮވެމްބަރު މަހާ އަޅާބަލާއިރު 15 އިންސައްތަ ވަނީ އިތުރުވެފައެވެ. 2021 ވަނަ އަހަރުގެ ނޮވެމްބަރު މަހު ދިވެހިރާއްޖެއަށް 4 ބިލިއަން ރުފިޔާގެ މުދާ އިމްޕޯޓް ކޮށްފައިވާއިރު، މި އަހަރުގެ ނޮވެމްބަރު މަހު މި ޢަދަދުވަނީ 4.6 ބިލިއަން ރުފިޔާ އަށް އިތުރުވެފައެވެ.

Advertisement

މީގެއިތުރުން، ފާއިތުވި ނޮވެމްބަރު މަހު ދައުލަތަށް ލިބުނު އާމްދަނީ 2021 ވަނަ އަހަރުގެ ނޮވެމްބަރު މަހާ އަޅާބަލާއިރު 11 އިންސައްތަ ވަނީ އިތުރުވެފައެވެ. 2021 ވަނަ އަހަރުގެ ނޮވެމްބަރު މަހު 322 މިލިއަން ރުފިޔާ ދައުލަތަށް ލިބިފައިވާއިރު، މި އަހަރުގެ ނޮވެމްބަރު މަހު މި ޢަދަދުވަނީ 359 މިލިއަން ރުފިޔާއަށް އިތުރުވެފައެވެ.

ވޭތުވެދިޔަ ނޮވެމްބަރު މަހު ރާއްޖެއަށް އިމްޕޯޓް ކުރެވުނު މުދަލާއި އެކްސްޕޯޓް ކުރެވުނު މުދާ އަދި ކަސްޓަމްސްއަށް ލިބުނު އާމްދަނީގެ ތަފާސް ހިސާބުތަކަށް ބަލާއިރު މިދިޔަ އަހަރު ދައުލަތަށް ލިބުނީ 322 މިލިއަން ރުފިޔާއެވެ. އަދި މިއަހަރުގެ ނޮވެމްބަރު މަހު 359 މިލިއަން ރުފިޔާ ލިިބިފައިވާ އިރު މިއީ 11 އިންސައްތަ އިތުރުވުމެއް ކަމަށް ކަސްޓަމްސް އިން ބުނެއެވެ.

އެކްސްޕޯޓް ކުރެވުނު މުދާ (އެފް.އޯ.ބީ އަގު) ބަލާއިރު މިދިޔަ އަހަރު 176 މިލިއަން ރުފިޔާއަށް އަރައެވެ. އަދި މިއަހަރުގެ ނޮވެމްބަރު މަހު މި އަދަދު 168 މިލިއަނަށް އަރާއިރު މިއީ 5 އިންސައްތައިގެ ދަށްވުމެކެވެ. އިމްޕޯޓް ކުރެވުނު މުދާ  (ސީ.އައި.އެފް އަގު) ބަލާއިރު މިދިޔަ އަހަރުގެ ޑިސެމްބަރު މަހު 4 ބިލިއަން ރުފިޔާގެ މުދާ އެތެރެކޮށްފައިވެއެވެ. އަދި މިއަހަރުގެ ނޮވެމްބަރ މަހު 4.6 ބިލިއަން ރުފިޔާގެ މުދާ ވަނީ އެތެރެކޮށްފައެވެ. މިއީ 15 އިންސައްތައިގެ ކުރިއެރުމެކެވެ.

ފާއިތުވި މަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ އޮމާން، އިންޑިއާ،  ޔޫ.އޭ.އީ، ސިންގަޕޯ އަދި ޗައިނާއެވެ. އޮމާން އިން 761 މިލިއަން ރުފިޔާގެ މުދާ އެތެރެކޮށްފައިވާއިރު، އިންޑިއާ އިން 760 މިލިއަން ރުފިޔާގެ މުދާ ވަނީ އެތެރެކޮށްފައެވެ. މީގެއިތުރުން ޔޫ.އޭ.އީ އިން 594 މިލިއަން ރުފިޔާގެ މުދާ ވަނީ އެތެރެކޮށްފައެވެ. ސިންގަޕޫރުން 472 މިލިއަން ރުފިޔާގެ މުދާ އަދި ޗައިނާ އިން 420 މިލިއަން ރުފިޔާގެ މުދާ ފާއިތުވި މަހު ވަނީ އެތެރެކޮށްފައެވެ.

ވޭތުވެދިޔަ ނޮވެމްބަރ މަހު އަގުގެގޮތުން ރާއްޖެއަށް އެންމެ ގިނައިން މުދާ އިމްޕޯޓްކުރި ގައުމުތަކަކީ އޮމާން، އިންޑިއާ، ޔޫއޭއީ އަދި ސިންގަޕޫރާއި ޗައިނާއެވެ. އަދި އެކްސްޕޯޓްކުރި ޤައުމުތަކުގެ ތެރޭގައި ހިމެނެނީ ތައިލޭންޑް، ޖަރުމަނުވިލާތް، އިނގިރޭސިވިލާތް އަދި އެމެރިކާއާއި ފްރާންސެވެ.

މީގެ އިތުރުން 21،335 ޕްރޮސެސް ޑިކްލަރޭޝަން، ކްލިއަރަންސް ދެވުނު އުޅަނދުފަހަރުތަކުގެ ތެރެއިން ރާއްޖެއިން ބޭރުން އައި 116 އުޅަނދު އަދި ރާއްޖެއިން ފުރާފައިވާ 99 އުޅަނދު ހިމެނެއެވެ.

2022 ނޮވެމްބަރު މަހު ރޯޔަލްޓީގެ ގޮތުގައި 1,227,010.75 ރުފިޔާ ލިބިފައިވެއެވެ.