އެއްބަސްވުން އާ ނުކުރަން ނިންމި ކަމެއްވެސް، މުވައްޒަފުން ނަގާނެކަމެއް ވެސް ސިޓީ ކައުންސިލުން ނާންގާ – ވެމްކޯ
ސިޓީ ކައުންސިލުން މިހާތަނަށް އައި އިރުވެސް އެއްބަސްވުން އައު ނުކުރާނެ ކަމަށް ރަސްމީ ސިފައެއްގައި އަންގާފައެއް ނުވޭ
ވިލިމާލޭގައި މަގުތައް ސާފްކުރާ މުވައްޒަފުން
މާލެ ސިޓީގެ މަގުތައް ފޮޅާ ސާފުކުރުމަށް ސީޓީ ކައުންސިލާއި، ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާއި ދެމެދު ވެފައިވާ އެއްބަސްވުން އާ ނުކުރަން ނިންމި ކަމެއް ރަސްމީކޮށް އަދިވެސް ނާންގާ ކަމަށް ވެމްކޯއިން ބުނެފިއެވެ.
މި މަހުގެ 26 ގެ ފަހުން މާލެ އާއި ވިލިމާލޭގެ އާންމު ތަންތަނުން ސިޓީ ކައުންސިލުން އަމިއްލައަށް ކުނި ނަގަން ނިންމައި ވެމްކޯއާއެކު ވެފައިވާ އެއްބަސްވުން އައު ނުކުރުމަށް އެ ކައުންސިލުން ވަނީ ފާސްކޮށްފައެވެ. ސިޓީ ކައުންސިލުން މިގޮތަށް ފާސްކޮށްފައިވަނީ އެ ކައުންސިލްގެ ބައްދަލުވުމެއްގައެވެ. ވެމްކޯއާއެކު ވެފައިވާ އެއްބަސްވުން އައު ނުކުރަން މިދިޔަ ސެޕްޓެމްބަރު މަހު ސިޓީ ކައުންސިލުން ނިންމައި އެކަން އިއުލާންވެސް ކުރިއެވެ.
މި މައްސަލައާއި ގުޅޭގޮތުން ވެމްކޯގެ މެނޭޖިންގ ޑިރެކްޓަރ ޔޫސުފް ސިރާޖު ވިދާޅުވީ، މާލޭގެ މަގުތަކަށް އަޅާފައި ހުންނަ ކުނި ނުނަގާކަމަށް ބުނެ ސިޓީކައުންސިލުން އެއްބަސްވުން ބާތިލްކުރާނެކަމަށް މީގެ ކުރިން އެތައްފަހަރަކު ވިދާޅުވެފައިވާ ކަމަށެވެ. ނަމަވެސް މާލެ ފޮޅާ ސާފުކުރާ މީހުންނަކީ ގޭގެއިން މަގުތަކަށް ނެރޭ އަދި އުކާލާ ކުނި ނަގާ މީހުން ނޫންކަމަށާއި، ސިޓީ ކައުންސިލާއެކު ވެފައިވާ އެއްބަސްވުމުގައި އޮންނާނީ މާލޭގެ މަގުތަކާއި އާންމު ތަންތަން ފޮޅާ ސާފުކުރުން ކަމަށެވެ.
އަދި އެއްބަސްވުން ބާތިލްކުރަން ސިޓީ ކައުންސިލުން ނިންމީ ސިޔާސީ ބޭނުމަކަށް ކަމަށާއި، ސިޓީ ކައުންސިލުން މިހާތަނަށް އައި އިރުވެސް އެއްބަސްވުން އައު ނުކުރާނެ ކަމަށް ރަސްމީ ސިފައެއްގައި އަންގާފައި ނުވާ ކަމަށެވެ. އަދި އެ މައުލޫމާތު ލިބިފައިވަނީ ނޫސްތަކުން ކަމަށާއި، 200 އެތައް މުވައްޒަފުންގެ ވަޒީފާ ގެއްލިގެން ދާއިރު މިއީ ސިޓީ ކައުންސިލުން ޒިންމާދާރުކަން ކުޑަގޮތަކަށް ކޮށްފައިވާ ކަމެއް ކަމަށް ސިރާޖު ވިދާޅުވިއެވެ.
ސިރާޖު ވިދާޅުވީ 200 އެއްހާ މުވައްޒަފުން ނަގައިގެން މާލެ ފޮޅާ ސާފުކުރުމުގެ މަސައްކަތް ސިޓީ ކައުންސިލުން ކުރަމުން އަންނަ އިރު އެ މުވައްޒަފުން ސިޓީ ކައުންސިލުން ބޭނުންކުރާނެ ކަމެއް ނުވަތަ ނޫންކަމެއް ވެސް އަންގާފައި ނުވެއެވެ. ސިޓީ ކައުންސިލުން ބުނެފައިވަނީ ފޮޅާ ސާފުކުރާނީ ކައުންސިލްގެ މުވައްޒަފުން ކަމަށެވެ. ސިޓީ ކައުންސިލުން މާލޭގެ ބައެއް އާންމު ތަންތަން ސާފުކުރަނީ ބިދޭސީން ލައްވައެވެ. ނަމަވެސް ސިޓީ ކައުންސިލާއި ވެމްކޯއާއި ދެމެދުވެފައިވާ އެއްބަސްވުމުގެ ދަށުން ވެމްކޯއިން ގެންގުޅެނީ މި މަސައްކަތް ކުރުމަށް 100 އިންސައްތަ ދިވެހިންނެވެ.
ސިރާޖު ވިދާޅުވީ މުވައްޒަފުންގެ ވަޒީފާ ގެއްލިގެންދާތީ ކަންބޮޑުވާ ކަމަށާއި، ނަމަވެސް ސިޓީ ކައުންސިލުން އެކަމުގައި ވާހަކަ ދައްކަން ބޭނުން ނުވާ ކަމަށެވެ. ވެމްކޯއިން އެ ހުރިހާ މުވައްޒަފުންނަށް ދާއިމީ ވަޒީފާއެއް ނުދެވޭނެކަމަށާއި، އެހެންކަމުން މި މައްސަލައިގައި ސަރުކާރުގެ ޕޮލިސީ ލެވެލްގައި ގޮތެއް ނިންމަންޖެހޭނެކަމަށް ސިރާޖު ވިދާޅުވިއެވެ.
ސިރާޖު ވިދާޅުވެފައިވަނީ މާލެ އާއި ވިލިމާލޭގެ މަގުތަކާއި އާންމު ތަންތަން ސާފުކުރުމަށް ވެމްކޯއާ އެކު ހަދާފައިވާ އެއްބަސްވުން އައު ނުކުރުމަށް މާލެ ސިޓީ ކައުންސިލުން ނިންމި މައިގަނޑު ސަބަބަކީ ގަވާއިދާ ޚިލާފަށް މަގުތަކަށް އަޅާފައި ހުންނަ ކުނި ނެގުން މާނަކުރުމުގައި އުޅޭ މައްސަލައަކާއި ގުޅިގެން ކަމަށެވެ.
ވެމްކޯއާ އެކު ސިޓީ ކައުންސިލުން ހަދާފައިވާ އެއްބަސްވުން މިއަހަރުގެ ޑިސެމްބަރު މަހު 26ށް ހަމަވާއިރު ސިޓީ ކައުންސިލުން ބޭއްވި ބައްދަލުވުމެއްގައި ވަނީ އެއްބަސްވުން އައުނުކޮށް މާލެއިން ކުނި ނެގުމުގެ މަސައްކަތް ކައުންސިލުން ކުރާގޮތަށް ފާސްކޮށްފައެވެ. އެއްބަސްވުން އައުނުކުރުމަށް ސިޓީ ކައުންސިލުން ނިންމުމާއެކު ވެމްކޯގައި ކުނި ކެހުމުގެ މަސައްކަތްކުރާ 200އެއް ހާ މުވައްޒަފުންގެ ވަޒީފާއާ މެދު ވަނީ ސުވާލުތަކެއް އުފެދިފައެވެ.
