އެމްޑީޕީގެ 12 ވަނަ އަހަރީ ދުވަސް ފާހަގަކުރުމަށް ލަންކާގައި ހާއްސަ ހަރަކާތެއް ބާއްވަނީ
26 ޖޫން 2017 | ހޯމަ 12:24އަހަރީ ދުވަސް ފާހަގަކުރަނީ ޓެންޓެން ކެފޭގައި
އެމްޑީޕީގެ 12 ވަނަ އަހަރީ ދުވަސް ފާހަގަކުރުމަށް ލަންކާގައި ބާއްވާ ހަރަކާތައް ތައްޔާރު ވަނީ
އެމްޑީޕީގެ 12 ވަނަ އަހަރީ ދުވަސް ފާހަގަކުރުމުގެ ގޮތުން އަވައްޓެރި ސްރީ ލަންކާގައި ހާއްސަ ހަރަކާތެއް މިރޭ ކުރިއަށް ގެންދަން ނިންމާފައިވާ ކަމަށް އެޕާޓީން ބުނެފިއެވެ.
ލަންކާގައި މި ހަރަކާތް އިންތިޒާމް ކުރުމުގައި އިސްކޮށް ހަރަކާތެރިވާ އަލީ ޖަވާދު އިބްރާހިމް ބުނީ އެމްޑީޕީގެ އަހަރީ ދުވަހާއި ގުޅިގެން ކުރިއަށް ގެންދާ ހަރަކާތް ބާއްވަން ނިންމާފައި ވަނީ ހޯމަ ދުވަހުގެ ރޭ (މިރޭ) ޓެންޓެން ކެފޭގައި ކަމަށެވެ. އެމްޑީޕީގެ ހަރަކާތައް ތައްޔާރުކުރާ ބޮނޑި ބަތާއެކު މިރޭގެ ހަރަކާތް ކުރިއަށްދާއިރު އަހަރީ ދުވަހުގެ ކޭކު ފެޅުމުގެ ހާއްސަ ރަސްމިޔާތެއް ވެސް ކުރިއަށް ދާނެ ކަމަށް އޭނާ ބުންޏެވެ.
މި ހަރަކާތުގައި އެމްޑީޕީ ސަރަކާރުގެ ކުރީގެ ފޮރިން މިނިސްޓަރ އަހުމަދު ނަސީމާއި، ރައީސް ނަޝީދުގެ ކުރީގެ ތަރުޖަމާން މުހައްމަދު ޒުހޭރާއި ، އެޕާޓީގެ އިންޓަރނޭޝަނަލް ސްޕޯކްސް ޕާސަން ހާމިދު އަބްދުލް ޣަފޫރުގެ އިތުރުން އިލެކްޝަންސް ކޮމިޝަންގެ ކުރީގެ ރައީސް ފުއާދު ތައުފީގް ބައިވެރިވަޑައިގަންނަވާނެއެވެ.
މީގެ 12 އަހަރުކުރިން އެމްޑީޕީން އުފެއްދުމަށް އިސްލާހީ ގިނަ މަސައްކަތްތަކެއް ވަނީ ލަންކާގައި ކޮށްފައެވެ. މިއަދު އެޕާޓީއަށް ބާރަ އަހަރުވީއިރު ، އެކި އެކި ސަބަބުތަކާއި ހެދި ރާއްޖެ ނާދެވިފައި ލަންކާގައި އެޕާޓީގެ ލީޑަރޝިޕްގެ އިސްބޭފުޅުން ތިބިކަން ފާހަގަކޮށްލެވެއެވެ.
