އާދިއްތަ ދުވަހުން ފެށިގެން ޅ އަތޮޅުގައި އާރުޓީއެލް ފެރީން ދަތުރުކުރެވޭނީ ޓިކެޓް ނަގައިގެން

އާދިއްތަ ދުވަހުން ފެށިގެން ޅ އަތޮޅުގެ އާރުޓީއެލް ފެރީގައި ދަތުރުކުރެވޭނީ ޓިކެޓް ނަގައިގެންކަމަށް ޕްލޭނިންގ މިނިސްޓްރީން ބުނެފިއެވެ.

ދިވެހިރާއްޖޭގެ ރަށްތައް ހައި ސްޕީޑް ފެރީ ވިއުގައަކުން ގުޅާލުމަށް ފަރުމާކޮށްފައިވާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫޢުގެ ދެވަނަ ފިޔަވަހީގެ ދަށުން، ޒޯން 2 ގައި ހިމެނޭ ޅ. އަތޮޅުގައި ރާއްޖެ ޓްރާންސްޕޯޓް ލިންކު ނުވަތަ އާރުޓީއެލް ފެރީ ޚިދުމަތް ފަށާފައިވަނީ ނޮވެމްބަރު މަހުގެ 21 ވަނަ ދުވަހުއެވެ. އެންމެ ފުރަތަމަ ކުރިޔަށް ގެންދިޔައީ އަހުލުވެރިކުރުވުމުގެ ދަތުރުތަކެވެ. އެދަތުރުތައް ކޮށްފައިވަނީ ހިލެއެވެ. އަހުލުވެރިކުރުވުމުގެ ދަތުރުތައް ކުރަން އެންމެ ފުރަތަމަ ޕްލޭންކުރީ ނޮވެމްބަރު 21ން 27ށެވެ. ނަމަވެސް ފަހުން ނޮވެމްބަރު 27 ގައި ވަނީ އަހުލުވެރިކުރުވުމުގެ ދަތުރުތައް ކުރާ މުއްދަތު އިތުރުކޮށްފައެވެ.

އޭގެފަހުން ޑިސެމްބަރު މަހުގެ 8 ވަނަ ދުވަހު ޕްލޭނިންގ މިނިސްޓްރީން ވަނީ ޑިސެމްބަރު 11 ވަނަ ދުވަހުން ފެށިގެން ޅ އަތޮޅުގެ އާރުޓީއެލް ފެރީގެ ޚިދުމަތް ބޭނުންކުރެވޭނީ ޓިކެޓު ގަނެގެންކަން ހާމަކޮށްފައެވެ. ޓިކެޓު ނެގޭނީ އާރް.ޓީ.އެލް އެޕްލިކޭޝަން ނުވަތަ ވެބް ޕޯޓަލްއިންނެވެ.

ޅ.އަތޮޅުގެ އާރް.ޓީ.އެލް ފެރީ ޚިދުމަތް ހަފުތާއަކު ހަތް ދުވަހު، 2 އާރް.ޓީ.އެލް ސްޕީޑް ފެރީ މެދުވެރިކޮށް 3 ރޫޓަކުން ލިބިގެންދާނެއެވެ. އެއް ރޫޓް ޚާއްސަކޮށްފައިވަނީ ޅ އަތޮޅުގައި އެއާޕޯޓް ހުޅުވާފައިވާ މަޑިވަރަށެވެ.

ޓިކެޓު އަގުތައް އުޅެނީ 35 ރުފިޔާ އާއި 120 ރުފިޔާ އާ ދެމެދުއެވެ. އަގުނަގައިގެން ޙިދުމަތް ދޭން ފެށުނުކަމުގައިވީނަމަވެސް، ތިން އަހަރުން ދަށުގެ ކުޑަކުދިންނަށާއި، ނޭޝަނަލް ސޯޝަލް ޕްރޮޓެކްޝަން އޭޖެންސީ ނުވަތަ އެންސްޕާގައި ރަޖިސްޓްރީވެފައިވާ ޙާއްޞަ އެހީއަށް ބޭނުންވާ ފަރާތްތަކަށް ހިލޭ ދަތުރުކުރެވޭނެއެވެ.

އެމްޓީސީސީ އިން ވަނީ އާރުޓީއެލްގެ ޚިދުމަތް ޒޯން އެކެއްގައި ހިމެނޭ ހއ، ހދ، ގެ އިތުރުން ށ، އަތޮޅުގައި ފަށާފައެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ ކުރިއަށް އޮތް 24 މަސް ދުވަސް ތެރޭގައި ރާއްޖޭގެ ހުރިހާ ރަށަކަށް ސްޕީޑް ފެރީގެ ޚިދުމަތް ލިބޭނެ ކަމަށެވެ.

މި ނެޓްވޯކަކީ މުޅި ރާއްޖެއަށް އަމާޒުކޮށް ފަސިންޖަރުންނާއި މުދާ އުފުލާ ފެރީ ހިމެނޭ ގޮތުން، ނޭޝަނަލް ސްޕެޝަލް ޕްލޭން (2020-2040) ގައި ހިމެނޭ ތިން ޒޯނާއި ހަ ރީޖަން ގުޅުވައިދިނުމަށް ފަރުމާކޮށްފައިވާ ވިއުގައެކެވެ. މި ގޮތުން ފެރީ ނެޓްވޯރކުން ހަ ރީޖަންގައި އެކުލެވޭ ހުރިހާ ރަށްތަކެއް ގުޅާލެވޭއިރު، އެއް ރީޖަން އަނެއް ރީޖަނާ ވެސް ގުޅިގެންދާނެއެވެ. މި ގޮތަށް ފަސިންޖަރުން އުފުލާ ފެރީ ގުޅުވާލެވޭނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް"، "ނަން-ކޮމިއުޓް ލިންކް"، އަދި "ހައިވޭ ލިންކް" މެދުވެރިކޮށެވެ.