ރާއްޖެއިން ބޭރުގައި ވޯޓު ފޮށި ބަހައްޓާނީ 150 އަށް ވުރެ ގިނަ މީހުން ރެޖިސްޓްރީ ވާނަމަ: އިލެކްޝަން

2023 ވަނަ އަަހަރުގެ ރިޔާސީ އިންތިޚާބުގައި ރާއްޖެއިން ބޭރުގައި ވޯޓު ފޮށި ބަހައްޓާނީ 150 އަށްވުރެ ގިނަ މީހުން ވޯޓުލުމަށް ރަޖިސްޓްރީކުރާ ޤައުމުތަކުގައި އެކަނިކަމަށް  އިލެކްޝަން ކޮމިޝަންގެ މެންބަރު އިސްމާއިލް ހަބީބު ވިދާޅުވެއްޖެއެވެ.

"ރާއްޖެއެމްވީ" އަށް ދެއްވި ބަސްތީގަތުމެއްގައި ހަބީބް ވިދާޅުވީ ކުރިއަށް އޮތް އަހަރުގެ ރިޔާސީ އިންތިޚާބަށް ތައްޔާރުވުމަށްޓަކާ އިލެކްޝަންސް ކޮމިޝަނުން ގިނަ މަސައްކަތްތަކެއް ކުރަމުންދާކަމަށެވެ. އެގޮތުން ރާއްޖެއިން ބޭރުގައި ވޯޓުފޮށި ބަހައްޓާނެ ޤައުމުތަކަކީ ކޮބާކަން ކަނޑައެޅުމުގެ މަސައްކަތްވެސް ކުރަމުންދާ ކަމަށް އޭނާ ވިދާޅުވިއެވެ. ބޭރު ގައުމުތަކުގައި ވޯޓު ފޮށިތައް ބަހައްޓާނީ އެޤައުމެއްގެ ޤަވާއިދުތަކާއި، އުސޫލުތަކާއި އެއްގޮތަށް ކަމަށް ވާއިރު ބޭރު ގައުމުތަކުގައި ވޯޓް ފޮށި ބެހެއްޓުމާއި މެދު އިލެކްޝަންސް ކޮމިޝަނުން ވަނީ ފޮރިން މިނިސްޓްރީ އާއި އެކު ބައްދަލުވުމެއް ބާއްވާފައެވެ.

މިދިޔަ ރިޠާސީ އިންތިޚާބުގައި ރާއްޖެއިން ބޭރުގައި ވޯޓު ފޮށި ބެހެއްޓީ 200 މީހުން ރެޖިސްޓްރީވުމުންނެވެ. ނަމަވެސް މަޖިލިސް އިންތިޚާބުގައި އެ އަދަދު 150 އަށް ވަނީ މަދުކޮށްފައެވެ. ހަބީބް ވިދާޅުވީ ރާއްޖެއިން ބޭރުގައި ދިވެހިން ދިރިއުޅޭ ގައުމުތަކުގެ ތެރެއިން، ރާއްޖެގެ އެމްބަސީ ހުރި ހުރިހާ ގައުމެއްގައި ވެސް 150 މީހުން ރެޖިސްޓްރީ ވާނަމަ ވޯޓު ފޮށި ބަހައްޓާނެ ކަަމަށެވެ.

އަންނަ އަހަރު ރިޔާސީ އިންތިޚާބު ބޭއްވުމަށް، ބަޖެޓުގައި ހިމަނާފައި ވަނީ 90 މިލިއަން ރުފިޔާއެވެ. ރިޔާސީ އިންތިޚާބުގައި އެންމެ ބޮޑު ޚަރަދެއް ހިނގާނެ ކަމަށް އިލެކްޝަންސް ކޮމިޝަނުން ބަޔާންކޮށްފައި ވަނީ، އިންތިޚާބުގައި ހަރަކާތްތެރިވާ އޮފިޝަލުންނަށެވެ. އެގޮތުން އިންތިޚާބުގައި މަސައްކަތްކުރާނެ އޮފިޝަލުންގެ ޓްރެއިނިންއަކީ ވެސް ބޮޑު ޚަރަދެއް ހިނގާ ކަމަށް ކޮމިޝަނުން އަންދާޒާކުރެއެވެ. އަދި ވޯޓު ކަރުދާސްތައް ޗާޕުކުރުމަށް ވެސް ބޮޑު ޚަރަދެއް ހިނގާނެ ކަމަށް ވަނީ ލަފާކޮށްފައެވެ.

އިންތިޚާބުގެ ބަޖެޓުގެ ގޮތުގައި 90 މިލިއަން ރުފިޔާ ކަނޑައަޅާފައިވާއިރު، އިލެކްޝަންސް ކޮމިޝަނުން ބުނެފައިފާގޮތުގައި އެ ބަޖެޓުން ބޭއްވޭނީ އިންތިޚާބުގެ އެންމެ ބުރެކެވެ. ދެވަނަ ބުރަކަށް ހިނގައްޖެނަމަ އިތުރު ފައިސާ ބޭނުންވާނެ ކަމަށްވެސް އެ އިދާރާއިން ވަނީ ބުނެފައެވެ.