ހއ. އަތޮޅުން މ. އަތޮޅަށް ވައިޓް އެލާޓް
ރާއްޖޭގެ ހުރިހާ ރަށަކަށް މި ދުވަސްވަރު ވިއްސާރަ ކުރާނެ
މޫސުން - މާލެއަށް ބޯކޮށް ވާރޭވެހެނީ
މޫސުން ގޯސްވާނެ ކަމަށް ލަފާކޮށް ހއ. އަތޮޅުން ފެށިގެން މ. އަތޮޅާ ހަމައަށް ވައިޓް އެލާޓް ނެރެފިއެވެ.
މޫސުމާ ބެހޭ ޤައުމީ އިދާރާއިން ރާއްޖޭގެ ބޮޑު ބަޔަކަށް ވައިޓް އެލާޓް ނެރެފައިވަނީ މިއަދު ހެނދުނު 11:00 އިން ފެށިގެން ހަވީރު 5:00 އަށެވެ.
އެލާޓުގެ މުއްދަތުގެ ތެރޭގައި ބޯކޮށް ވާރޭވެހި ގުގުރާނެ ކަމަށް މޫސުމާ ބެހޭ ޤައުމީ އިދާރާއިން ވަނީ ލަފާކޮށްފައެވެ. އަދި ވައި އެނބުރި އަދި މަޑުން، ހުޅަނގާއި ހުޅަނގުއުތުރުން ގަޑިއަކު 3 މޭލާއި 13 މޭލާ ދެމެދުގެ ބާރުމިނުގައި ވައިޖެހޭނެ ކަމަށް ލަފާ ކޮށްފައިވާއިރު ކަނޑުތައް އާދައިގެ ވަރަކަށް މަޑުވާނެ ކަމަށް ވަނީ ލަފާކޮށްފައެވެ.
އެ އިދާރައިން ލަފާ ކުރާ ގޮތުގައި ކުރިއަށް އޮތް ހަފްތާ ތެރޭގައި ވެސް ރާއްޖޭގެ ބޮޑު ބަޔަކަށް ވިއްސާރަ ކުރާނެއެވެ. އެގޮތުން، އަންނަ ހަފުތާ ބަންދުގައި ދެކުނުގެ އަތޮޅުތަކަށް ބޯކޮށް ވާރޭވެހުން އެކަށީގެންވާ ކަމަށް މޫސުމާ ބެހޭ ޤައުމީ އިދާރާއިން ބުނެއެވެ.
އިއްޔެ ވެސް ރާއްޖޭގެ އެކި ސަރަހައްދުތަކަށް ވިއްސާރަކޮށްފައިވާއިރު ބައެއް ރަށްތަކުގައި ވަނީ ފެންބޮޑުވެފައެވެ. އެގޮތުން، އެންމެ ބޮޑަށް ވާރޭ ވެހިފައިވަނީ ބ. ދަރަވަންދޫ އަށެވެ. އެ ރަށަށް 58 މިލިމީޓަރުގެ ވާރޭ ވެހުނެވެ.
މޫސުމާ ބެހޭ ޤައުމީ އިދާރާއިން ބުނާ ގޮތުގައި މި ދުވަސްވަރު ރާއްޖެއަށް ކުރަމުންދާ ވިއްސާރަ ކުރަނީ ހުޅަނގު މޫސުން ނިމި އިރުވައި މޫސުން ފެށޭ ދުވަސްވަރު ކަމަށްވާތީއެވެ. ވިއްސާރަ ރަނގަޅުވާނެ ކަމަށް ލަފާކުރަނީ މި މަހުގެ 10 ވަނަ ދުވަހުގެ ފަހުންނެވެ.
