ފެންނަ ނުފެންނަ ވޯޓު ނަގައިފިނަމަ، ނިޒާމު ބަދަލުކުރުމަށް ރައްޔިތުންގެ ބޮޑު ތާއީދެއް އޮންނާނެ: ނަޝީދު
ނިޒާމީ ވޯޓަކަށް ނުގޮސް ރައްޔިތުން ކައިރިއަށް އަނެއްކާ ދިއުމަކީ އެމަނިކުފާނު ދެކެވަޑައިގަންނަވާގޮތުގައި ރަނގަޅު ގޮތެއް ނޫންކަމަށް ވިދާޅުވި
ރައީސް މުހައްމަދު ނަޝީދު
ރާއްޖޭގެ ވެރިކަމުގެ ނިޒާމު ބަދަލުކުރުމަށް ވޯޓު ނަގައިފިނަމަ ވެރިކަން ބަދަލުކުރުމަށް ރައްޔިތުންގެ ބޮޑު ތާއީދެއް އޮންނާނެކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ގދ. ތިނަދޫއަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެން ވާހަކަފުޅުދައްކަވަމުން ނަޝީދު ވިދާޅުވީ، އެމަނިކުފާނު އަބަދުވެސް ފާހަގަކުރައްވަމުން ގެންދަވާކަމަކީ އެމްޑީޕީން ރައްޔިތުންނަށް ވަރަށް ބޮޑު ވައުދެއް ވެފައިވާކަމަށެވެ. އެއީ ނިޒާމީ ވޯޓަކަށް ދިއުންކަމަށާއި އެކަން ނުކޮށް ރައްޔިތުން ކައިރިއަށް އަނެއްކާ ދިޔުމަކީ އެމަނިކުފާނު ދެކެވަޑައިގަންނަވާގޮތުގައި ރަނގަޅު ގޮތެއް ނޫންކަމަށެވެ.
މިވަގުތު ކުރަންވީ ކަމަކީ ފެންނަ ނުފެންނަ ވޯޓު ނެގުންކަމަށާއި، އެވޯޓު ނަގައިފިނަމަ ނިޒާމު ބަދަލުކުރުމަށް ގިނަ ބަޔަކު ތާއީދުކުރާނެކަމަށް ނަޝީދު ވިދާޅުވިއެވެ. އަދި ނިޒާމު ބަދަލުވެއްޖެނަމަ ކުރިޔަށް އޮތް ރިޔާސީ އިންތިޚާބުގައި އެމަނިކުފާނަށް ކުރިމަތިލައްވަން ޖެހިވަޑައިނުގަންނަވާނެކަމަށް ވިދާޅުވިއެވެ.
ރައީސް ނަޝީދުގެ ތިނަދޫ ދަތުރުފުޅަކީ ކުރިއަށް އޮތް އެމްޑީޕީ ޕްރައިމަރީއަށް އެމަނިކުފާނުގެ ކެމްޕެއިން ލޯންޗުކުރުމަށް ކުރައްވާ ދަތުރުފުޅެއްގެ ގޮތުގައި ވަނީ އަޑުތައް ފެތުރިފައެވެ.
ރައީސް ނަޝީދުގެ މި ދަތުރުފުޅުގައި ޔޫމެޓް ސްކޫބާ ޑައިވިން ސެންޓަރުގެ ދައުވަތަކަށް، އެ ސެންޓަރުގައި ޑައިވް މާސްޓަރ ލެވެލްއަށް ކިޔަވައިދިން ކޯސް ނިންމުމުގެ ރަސްމިއްޔާތުގައި ބައިވެރިވެވަޑައިގަންނަވާފައިވެއެވެ. އަދި ތިނަދޫ އެމްޑީޕީ ހަރުގޭގައި ބޭއްވި ޖަލްސާގައި ވާހަކަފުޅުދައްކަވާފައިވާއިރު ތިނަދޫގެ ގޭގެއަށް ޒިޔާރަތްކުރައްވައި ރައްޔިތުންނާ ބައްދަލުކުރައްވާފައިވެއެވެ. މީގެއިތުރުން ތިނަދޫ ކައުންސިލާވެސް އެމަނިކުފާނު ބައްދަލުކުރެއްވިއެވެ.
