އެމްއެންޑީއެފް އިން ތޮއްޑޫގައި ޕެރޭޑެއް ބާއްވައިފި
އއ.ތޮއްޑޫ ސްކޫލަށް 55 އަހަރު ފުރުމުގެ މުނާސަބަތުގައި، އެމްއެންޑީއެފުން އެރަށުގައި ޕެރޭޑު ބާއްވައިފި
އެމްއެންޑީއެފް އިން ތޮއްޑޫގައި ޕެރޭޑެއް ބާއްވައިފި
އއ.ތޮއްޑޫ ސްކޫލަށް 55 އަހަރު ފުރުމުގެ މުނާސަބަތުގައި، އެމްއެންޑީއެފުން އެރަށުގައި ޕެރޭޑު ބާއްވައިފިއެވެ.
އެމްއެންޑީއެފް އިން ބުނީ ޕެރޭޑް ބާއްވާފައި ވަނީ ތޮއްޑޫ ކައުންސިލުގެ އެދުމުގެ މަތިން ކަމަށެވެ. އެމްއެންޑީއެފުން ބޭއްވި ޕެރޭޑުގެ ހަރަކާތް، މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީއާއި، ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް ވަނީ ބައްލަވާލައްވާފައެވެ. އަދި މިނިސްޓަރގެ އަރިހުގައި އެމްއެންޑީއެފް މެރިން ކޯރގެ ކޮމަޑާންޓް، ބްރިގޭޑިއަރ ޖެނެރަލް ވައިޘް ވަޙީދާއި، އެމްއެންޑީއެފް މާލޭ އޭރިއާ ކޮމާންޑްގެ ކޮމާންޑަރ، ކާނަލް އަޙްމަދު ޣިޔާސްއާއި، ރައްޔިތުން މަޖިލީހުގެ ހިތަދޫ އުތުރު ދާއިރާގެ މެންބަރު މުޙައްމަދު އަސްލަމްގެ އިތުރުން އއ.ތޮއްޑޫގެ ކައުންސިލް މެންބަރުން ވަނީ ބައިވެރިވެވަޑައިގަންނަވާފައެވެ.
އެމްއެންޑީއެފުން ބުނީ އއ.ތޮއްޑޫ ސްކޫލް ދަރިވަރުންނާއި، ތޮއްޑޫގެ ގިނަ އަދަދެއްގެ އާންމު ރައްޔިތުން ހުކުރު ދުވަހުގެ ޕެރޭޑު ބަލާލުމަށް މަގުތަކަށް ނިކުތްކަމުގައެވެ. އޭގެތެރޭގައި ގިނަ އަދަދެއްގެ ކުޑަކުދިން ވެސް ހިމެނޭ ކަމަށް އެމްއެންޑީއެފް އިން ބުނެއެވެ. އއ.ތޮއްޑޫގައި ޕެރޭޑް ކުރިއަށްދިޔަ ވަގުތުތަކުގައި އެމްއެންޑީއެފް އާޓްސް އެންޑް ސެރެމޯނިއަލް ސަރވިސްގެ މިލިޓަރީ ބޭންޑުގައި ވަނީ ރާގު ކުޅެފައެވެ.
އެމްއެންޑީއެފުން ހޮނިހިރު ދުވަހު ހަވީރު އއ.އުކުޅަހުގައި ވެސް ޕެރޭޑް ބާއްވާގޮތަށް ވަނީ ހަމަޖެހިފައެވެ.
އެމްއެންޑީއެފުން ބާއްވާ މިލިޓަރީ ޕެރޭޑަކީ، ވަރަށް ގިނަ ރައްޔިތުންގެ ތަރުހީބު ލިބެމުންދާ، އަދި، އެ ހަރަކާތްތައް ބަލާލުމަށް ބޭނުންވާ ހަރަކާތެކެވެ. އެމްއެންޑީއެފްގެ ޕެރޭޑްތައް އާންމުކޮށް ބާއްވަމުންދަނީ މާލޭގައި ނަމަވެސް، ފަހަކަށް އައިސް އަތޮޅުތަކުގެ ރަށްރަށުގައި ޕެރޭޑްތައް ބޭއްވުން ވަނީ އިތުރުކޮށްފައެވެ. އެމްއެންޑީއެފްގެ ލީޑަރޝިޕުގެ ވިސްނުންފުޅު ހުރީ، ވަގުތު ލިބުނު ވަރަކުން މި ފަދަ ހަރަކާތްތައް ޖަޒީރާވަންތަ ރާއްޖޭގައި ދިރިއުޅޭ ރައްޔިތުންނާ ކައިރިއަށް ގެންގޮސް، ގިނަ ބަޔަކަށް މި ހަރަކާތްތައް ދައްކާލުމެވެ.
