ރައްޔިތުންގެ މަޖިލީހުގެ ބައެއް މެންބަރުންނަކީ މިހާރު ރައްޔިތުން ބަލައިގަންނާނެ ފަރާތްތަކަށް ކަމަށް ގަބޫލުފުޅު ނުކުރައްވާ ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ބުރާސްފަތި ދުވަހު ކުރިއަށްދިޔަ "އާސްކް ސްޕީކަރ" ގެ 6 ވަނަ ޕްރޮގްރާމުގައި ރައްޔިތަކު ދެންނެވި ސުވާލަށް ޖަވާބުދެއްވަމުންނެވެ. އެގޮތުން، އެމަނިކުފާނު ނިސްބަތްވެވަޑައިގަންނަވާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ މަޖިލިސް މެންބަރުން އެމަނިކުފާނަށް ފާޑުވިދާޅުވަމުންގެންދަވާ ކަމަށާއި އެ މެންބަރުން ހޮވަން ދެވަނަ ފަހަރަކަށް މަސައްކަތް ކުރައްވަފާނަންތޯ އާއްމުންގެ ފަރާތުން ވަނީ ނަޝީދާ ސުވާލެއް ކުރައްވާފައެވެ.

އެ ސުވާލަށް ޖަވާބު ދެއްވަމުން ނަޝީދު ވިދާޅުވީ އެމަނިކުފާނު ކުރައްވާ މަސައްކަތުގެ ސަބަބުން ކާމިޔާބީއާއި ނާކާމިޔާބީއާވެސް ކުރިމަތިލައްވަން ޖެހިވަޑައިގަންނަވާ ކަމަށާއި، ބައެއް މެންބަރުންގެ ޚިޔާލު ވަކި ހިސާބަކުން ބަދަލުވެ ނަފްރަތުގެ ނަޒަކުރުން ދެކޭފަހަރުވެސް އަންނަ ކަމަށެވެ. އެކަމާ ދެރަފުޅުވެވަޑައިގަންނަވާ ކަމަށާއި އެފަދަ މެންބަރުންނާއެކު ދެވަނަ ފަހަރަށް މަސައްކަތް ކުރުމުގެ ފުރުސަތު ގެއްލިފައިވާ ކަމަށް ވެސް އެމަނިކުފާނު ވިދާޅުވިއެވެ.

ބައެއް މެންބަރުން މަޖިލީހުގެ އިދާރީ މުވައްޒަފުންނާ ވެސް ހަރުކަށިކޮށް މުއާމަލާތް ކުރައްވާކަން ފާހަގަކުރައްވައި ނަޝީދު ވަނީ އެކަމާ ހިތާމަކުރައްވާ ކަމަށް ވިދާޅުވެފައެވެ. އަދި މަޖިލީހުގެ އިދާރާއިން ކަންކަން ކުރަނީ މަޖިލީހުގެ ގަވާއިދާ އެއްގޮތަށް ކަމަށާއި އެ މުވައްޒަފުންނަށް އިތުރު ގޮތަކަށް ކަންކަން ކުރުމުގެ އިހުތިޔާރު ނޯންނާނެ ކަންވެސް އެމަނިކުފާނު ފާހަގަކުރެއްވިއެވެ.

ރައީސް ނަޝީދު ވަނީ މަޖިލީހުގެ ނިމިދިޔަ ދައުރުގައި މުހިންމު މަސައްކަތްތަކެއް މަޖިލީހުން ކޮށްފައިވާ ކަން ފާހަގަކުރައްވައި ދައުރުގެ މަސައްކަތާ މެދު ހިތްހަމަޖެހިވަޑައިގަންނަވާ ކަމަށް ވެސް ވިދާޅުވެފައެވެ.

ދައުރު ނިންމާ މަޖިލިސް ޗުއްޓީއަށް ގޮސްފައި ވަނީ ނިމުނު ހަފްތާގެ ތެރޭގައެވެ. މަޖިލީހުން ނިމުނު ދައުރުގައި 54.7 އިންސައްތަ މަސައްކަތް ނިންމާފައިވާ ކަމަށް މަޖިލީހުގެ އިދާރާއިން ބުނެއެވެ.