ކުޅުދުއްފުށީގައި އިތުރު ހައުސިންގ ޔުނިޓުތަކެއް އަޅާނެކަމުގެ އިޝާރާތެއް
2 ޑިސެމްބަރު 2022 | ހުކުރު 02:07ކުޅުދުއްފުށީގެ ބޯހިޔާވަހިކަމަށް ބޭނުންވެފައި ތިބީ 400 މީހުން ނޫން ކަމަށް ރައީސް އިބްރާހިމް މުހައްމަދު ޞާލިހަށް އަދި ސަރުކާރަށް އެނގިވަޑައިގަންނަވާ
ހައުސިންގ މިނިސްޓަރު މުހައްމަދު އަސްލަމް
ކުޅުދުއްފުއްޓަށް ބޭނުންވަނީ 400 ހައުސިންގ ޔުނިޓު ނޫން ކަމަށާއި، އިތުރު ހައުސިންގ ޔުނިޓުތައް ވެސް ގެންނަވާނެކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
މިނިސްޓަރު އަސްލަމް މިހެން ވިދާޅުވީ ކުޅުދުއްފުށީގައި ސަރުކާރުން އިމާރާތްކުރި ރޯހައުސްތައް ހަވާލުކުރުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
މިނިސްޓަރު އަސްލަމް ވިދާޅުވީ، ކުޅުދުއްފުށީގެ ބޯހިޔާވަހިކަމަށް ބޭނުންވެފައި ތިބީ 400 މީހުން ނޫން ކަމަށް ރައީސް އިބްރާހިމް މުހައްމަދު ޞާލިހަށް އަދި ސަރުކާރަށް އެނގިވަޑައިގަންނަވާ ކަމަށެވެ. އަދި ބޯހިޔާވަހިކަމަށް ބޭނުންވާ 1200 އެއްހާ މީހުން ކުޅުދުއްފުށީގައި އެބަތިބި ކަމަށާއި އިތުރު ހައުސިންގ ޔުނިޓުތައް ކުޅުދުއްފުއްޓަށް ގެންނާވާނެ ކަމަށެވެ. މިނިސްޓަރު ވިދާޅުވީ އެ ގެނައުމުގެ ބާރު އޮތީ ރައްޔިތުންގެ އަތުގައި ކަމަށާއި، ވެރިކަމެއް ދެމި އޮންނާނީ ރައްޔިތުން އެގޮތަށް ނިންމުމުން ކަމަށެވެ. އަދި ކުރިއަށްދާންވީ ގޮތް ނިންމާނީ ވެސް ރައްޔިތުން ކަމަށެވެ.
މިނިސްޓަރު ވިދާޅުވީ ކަން ހިނގަމުންދާގޮތް ފެންނަމުންދާ ކަމަށާއި، ކަން ހިނގާފައި އޮތް ގޮތް ވެސް ފެންނަމުންދާ ކަމަށެވެ. ރައްޔިތުން ގޮތް ނިންމަވާނީ ކަންކަން ބެލުމަށްފަހުގައި ކަމުގެ އިތުބާރު ޔަގީންކަން އެބައޮތް ކަމަށް މިނިސްޓަރު ވިދާޅުވިއެވެ.
މިނިސްޓަރު އަސްލަމް ވިދާޅުވީ ދިވެހި ރައްޔިތުން ވެސް އަދި ކުޅުދުއްފުށީ ރައްޔިތުން ވެސް މިހާރު މިދާ މިސްރާބު އެއީ ގިނަ ރައްޔިތުންނަށް ކަމުދާނެ މިސްރާބެއްކަމާ މެދު އެއްވެސް ޝައްކެއް ނެތް ކަމަށެވެ.
އެހެންނަމަވެސް ނިންމުމެއް ނިންމީމަ ކަން އޮންނާނީ އެގޮތަކަށް ކަން އެނގިގެންދާނެ ކަމަށާއި، އުއްމީދުކުރައްވަނީ އެގޮތަށް ރައްޔިތުން އެކަން ނިންމަވާނެ ކަމަށެވެ.
