މަރުގެ މެޗަކުން ސަލާމަތްވީ އާޖެންޓީނާގެ ހުރިހާ ކުޅުންތެރިން ދެއްކި މޮޅު ކުޅުމުގެ ސަބަބުން ކަމަށް އެ ޓީމުގެ ކޯޗު ލިއޮނަލް ސްކަލޯނީ ބުނެފިއެވެ.

އޭނާ މިހެން ބުނީ ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި 2-0 އިން ޕޮލެންޑް ބަލިކޮށް، ގްރޫޕްގެ އެއް ވަނަ ޓީމުގެ ގޮތުގައި ދެ ވަނަ ބުރަށް ދަތުރުކުރުމަށްފަހު ޕްރެސްގައި ވާހަކަ ދައްކަމުންނެވެ. އެގޮތުން ޓީމަށް އަނިޔާގެ މައްސަލަތަކެއް ދިމާވެފައިވާ ކަމަށާއި، ނަމަވެސް އެކަންކަަމަށް ހައްލު ހޯދާނެ ކަމަށާއި އާޖެންޓީނާގައި ތަފާތު ކުޅުންތެރިން ތިބި ކަމަށް އޭނާ ބުންޏެވެ. ނަމަވެސް ޕޮލެންޑް މެޗުގެ ނަތީޖާ ހައިރާން ނުވާ ކަމަށާއި ޕޮލެންޑަކީ ކައުންޓަ އެޓޭކްގައި ވަރަށް މޮޅަށް ކުޅޭ ޓީމެއް ކަމަށެވެ. މީގެއިތުރުން އާޖެންޓީނާ އިން ޕޮލެންޑަށް މެޗުގައި އެ ފުރުސަތު ނުދިނީ ކަމަށާއި ޕޮލެންޑަށް ގޯސްތަކެއް ހެދުމަށްވުރެ އެއީ އާޖެންޓީނާގެ ކުޅުންތެރިބް ކުރި މަސައްކަތް ކަމަށް ވެސް އޭނާ ބުންޏެވެ.

މީގެ އިތުރުން އޭނާ ބުނީ އާޖެންޓީނާގެ ސަޕޯޓަރުން ކާމިޔާބީގައި ބައިވެރިވެ އުފާ ފާޅުކުރުން އެދޭ ކަމަށެވެ. ސްކަލޯނީ ބުނީ އަނެއްކާ ދެ ދުވަސް ފަހުން ގަދަ 16 ގެ މެޗަށް ކުރިމަތިލާން ޖެހޭނެ ކަމަށެވެ. އަދި ކުރިން ވެސް ފާހަގަ ކުރިހެން ސައުދީ ޓީމަކީ ވަރަށް ވަރުގަދަ ޓީމެއް ކަމަށާއި، އެމީހުން އާޖެންޓީނާގެ މައްޗަށް ކުރި ހޯދި ކަމަށެވެ. އެކަން ފާހަގަ ކުރަމުން ސްކަލޯނީ ބުނީ ސައުތު ޔޫރަޕިއަން ޓީމަކަށް ވެސް، ޔޫރަޕުގެ ޓީމަކަށް ވެސް އަދި ކޮންމެ ޓީމަކަށް ވެސް އެކަން ކުރެވިދާނެ ކަމަށާއި، ފުޓުބޯޅަ އަކީ އެއީ ކަމަށެވެ.

ސްކަލޯނީ ބުނީ ޕޮލެންޑް މެޗާއެކު މުޅި އާޖެންޓީނާ އޮތީ ހަމަޖެހިގެން ކަމަށެވެ. އޭނާ ބުނީ އެއީ ފަސޭހަ މެޗެއް ނޫން ކަމަށެވެ. އަދި އެއީ މޮޅުވާން މަޖުބޫރު މެޗަކަށްވި ކަމަށާއި، ކުޅުނު ޓީމަކީ ރަނގަޅު ނަތީޖާއެއް އޮތް ޓީމެއް ކަމަށެވެ. އޭނާ ބުނީ ޕޮލެންޑް ކުޅުނު ދެ މެޗުގެ ތެރެއިން އެއް މެޗުން މޮޅުވެ، އަނެއް މެޗު އެއްވަރުވެފައި އޮތުމަކީ މެޗު އުނދަގޫވީ ސަބަބެއް ކަމަށެވެ. ނަމަވެސް އާޖެންޓީނާގެ ކުޅުންތެރިން ވަރަށް މޮޅަށް ކުޅުނުކަން ފާހަގަކުރަމުން ސްކަލޯނީ ބުނީ ކުޅުންތެރިންނާމެދެ އޭނާ ވަރަށް ފަޚުރުވެރިވާ ކަމަށެވެ.

މުބާރާތުގެ ގަދަ 16 ގައި އާޖެންޓީނާ ވާދަކުރަން ޖެހޭނީ ގްރޫޕް ޑީގެ ދެ ވަނަ ޓީމު އޮސްޓްރޭލިޔާއާއެވެ. އެ މެޗު ކުޅެނީ ހޮނިހިރު ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.