ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި އާޖެންޓީނާ އާއި ޕޮލެންޑު ބައްދަލު ކުރާ މެޗު އެއީ ލިއޮނެލް މެސީ އާއި ރޮބާޓް ލެވަންޑޮސްކީގެ މެޗެއް ނޫން ކަމަށް ޕޮލެންޑުގެ ކޯޗު ޗެސްލޯ މިކްނިއޭވިޗް ބުނެފިއެވެ.

އާޖެންޓީނާ މެޗުގެ ކުރިން އޮތް ޕްރެސްގައި ވާހަކަ ދައްކަމުން މިކްނިއޭވިޗް ބުނީ، މެޗުގެ ފުރަތަމަ 11 އޭނާ އަށް އެނގޭ ކަމަށާއި، ނަމަވެސް މެޗުގެ ކުރިން އެއް ޓްރެއިނިން ސެޝަން އޮންނާނެ ކަމަށެވެ. އޭނާ ބުނީ އެ ޓްރެއިނިން ސެޝަންގައި ވާނެ ގޮތެއް ބަލަން ޖެހޭނެ ކަމަށެވެ. އޭނާ ބުނީ ދެން އޮތީ މެސީ އާއި ލެވަންޑޯސްކީއާ ގުޅިގެން ދެކެވޭ ވާހަކަތައް ކަމަށާއި މުޅި ދުނިޔެ ވެސް މިހާރު އިންތިޒާރު ކުރަމުން ދާނީ އެ މެޗަށް ކަމަށެވެ. އޭނާ ބުނީ އެއީ ޕޮލެންޑާއި އާޖެންޓީނާގެ މެޗެއް ކަމަށެވެ. އެއްވެސް ހާލެއްގައި މެސީ އާއި ލެވަންޑޯސްކީގެ މެޗެއް ނޫން ކަމަށެވެ.

އޭނާ ބުނީ މެސީ އަކީ ހުނަރުން ފުރިގެންވާ މޮޅު ކުޅުންތެރިޔެއް ކަމަށާއި، ލެވަންޑޯސްކީ އަކީ ވެސް މޮޅު ކުޅުންތެރިޔެއް ކަމަށެވެ. އެއްވެސް މީހަކަށް އެކަމާމެދު ސުވާލު ނުކުރެވޭނެކަން ފާހަގަ ކުރަމުން މިކްނިއޭވިޗް ބުނީ، އެ ދެ ކުޅުންތެރިންގެ ތެރެއިން މޮޅީ ކޮން ކުޅުންތެރިޔެއްކަން އޭނާ ބުނަން ބޭނުންނުވާ ކަމަށެވެ. މިކްނިއޭވިޗް ބުނީ އެކަހަލަ މައުޟޫއަށް އެ ޕްރެސްގައި ވާހަކަ ނުދެއްކޭނެ ކަމަށެވެ.

މީގެ އިތުރުން މިކްނިއޭވިޗް ބުނީ ބުދަ ދުވަހުގެ ރޭގެ މެޗުގައި ޕޮލެންޑުގެ ކުޅުންތެރިންގެ އިތުރުން ދަނޑަށް ވަންނަ އެންމެނަށް މެސީ ފެންނާނެ ކަމަށެވެ. މިކްނިއޭވިޗް ބުނީ ވަރަށް ގާތުން މެސީ ފެންނާނެ ކަމަށާއި، އެކަމާ އޭނާ ވަރަށް އުފާ ވެސް ވާކަމަށެވެ. އަދި އާޖެންޓީނާއާ ދެކޮޅަށް ކުޅުމަކީ ކޮންމެ ޤައުމަކަށް ވެސް ލިބޭނެ ފަޚުރެއް ކަމަށެވެ. އޭނާ ބުނީ މެޗުގެ ނަތީޖާ އަށް ފުރިހަމަ އަށް އިހުތިރާމު ކުރާނެ ކަމަށާއި، ޕޮލެންޑް މަސައްކަތް ކުރާނީ މެޗުން މޮޅުވާން ކަމަށެވެ.

ޕޮލެންޑްް އަދި އާޖެންޓީނާ ބައްދަލު ކުރާ މެޗު ފަށާނީ ބުދަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.