ކުރިއަށް އޮތީ ފީފާ ވޯލްޑް ކަޕް ގްރޫޕް ސްޓޭޖުގެ އެންމެ މުހިންމު މެޗުކަމަށް އާޖެންޓީނާގެ ކޯޗު ލިއޮނެލް ސްކަލޯނީ ބުނެފިއެވެ.
ސްކަލޯނީ މިހެން ބުނީ މުބާރާތުގެ ގްރޫޕް ސްޓޭޖުގެ ފަހު މެޗުގައި ޕޮލެންޑާ ދެކޮޅަށް ނުކުތުމުގެ ކުރިން އޮތް ޕްރެސްގައި ވާހަކަ ދައްކަމުންނެވެ. އެ މެޗަށް ކުރިމަތިލާއިރު ދެ ވަނަ ބުރުގެ ޖާގައެއް ބޭނުންނަމަ އާޖެންޓީނާ އަށް ޖެހެނީ ޕޮލެންޑު ބަލި ކުރަންށެވެ. ޕްރެސްގައި ވާހަކަ ދައްކަމުން ސްކަލޯނީ ބުނީ، އަބަދުވެސް އެންމެ މުހިންމު މެޗަކަށްވާނީ ކުރިއަށް އޮންނަ މެޗު ކަމަށެވެ. ސަބަބަކީ މުބާރާތުގައި ދެން ވާނެ ގޮތެއް އެނގޭނީ އެ މެޗުން ކަމަށް ވާތީ އާއި އެހެން ހުރިހާ ކަމެއް ހަނދާން ނައްތާލައި ވޯލްޑް ކަޕަށް ވިސްނަން ޖެހޭތީ ކަަމަށެވެ. ސްކަލޯނީ ބުނީ އާޖެންޓީނާ ގަދަ 16 އަށް ދާން ޖެހޭ ކަމަށެވެ. އެގޮތުން ގަދަ 16 އަށް ދެވިއްޖެ ނަމަ، ދެން އޮންނަ މެޗަކީ މާ މުހިންމު މެޗެއް ކަމަށެވެ.
މީގެ އިތުރުން ސްކަލޯނީ ބުނީ އޭނާ އަކީ ދެކުނު އެމެރިކާ އަށް ނިސްބަތްވާ މީހެއް ކަަމަށާއި، މުބާރާތުގެ ގަދަ 16 އިން ބްރެޒިލް ޖާގަ ހޯދުމަކީ އުފާވާ ކަމެއް ކަމަށެވެ. ސްކަލޯނީ ބުނީ އެކަމާމެދު އެހެން ގޮތަކަށް މީހަކު ވިސްނައިފިނަމަ އެއީ ވަރަށް ބޮޑު ގޯހެއް ކަމަށެވެ. އެކަން ފާހަގަކޮށް ސްކަލޯނީ ބުނީ އޭނާ އަކީ ދެކުނު އެމެރިކާގެ ފުޓުބޯޅައިގެ އެންމެ ބޮޑު އެއް ސަޕޯޓަރު ކަމަށާއި، ބްރެޒިލްގައި އޭނާގެ ރަހުމަތްތެރިން ވެސް ތިބޭނެ ކަމަށެވެ. އަދި އާޖެންޓީނާ އަށް މުބާރާތް ކާމިޔާބު ނުކުރެވިއްޖެ ނަމަ، އޭނާ އެދެނީ ދެކުނު އެމެރިކާގެ ޓީމަކަށް އެކަންވުން ކަމަށެވެ. އެއީ އެއްވެސް ސުވާލެއް އޮތް ކަމެއް ނޫންކަން ފާހަގަ ކުރަމުން ސްކަލޯނީ ބުނީ، ބްރެޒިލުން އަންނަނީ މޮޅަށް ކުޅެމުން ކަމަށާއި، ގްރޫޕް ސްޓޭޖުގެ ދެ މެޗު ކާމިޔާބުކޮށްފައިވުމުން ބްރެޒިލަށް މަރުހަބާ ކިޔާ ކަމަށެވެ.
އަހަރެންނަކީ ސައުތު އެމެރިކާ ފުޓުބޯޅައިގެ އެންމެ ބޮޑު އެއް ސަޕޯޓަރު، ބްރެޒިލްގައި އަހަރެންގެ ރައްޓެހިން ވެސް ތިބޭނެ. އާޖެންޓީނާއަށް ނުވެއްޖެ ނަމަ، އަހަރެން އެދެނީ ސައުތު އެމެރިކާގެ ޓީމަކަށްވުން. އެއީ އެއްވެސް އޮޅުމެއް ނެތް ކަމެއް. އެ ނޫން ގޮތަކަށް މީހަކު ވިސްނާނަމަ އެއީ ވަރަށް ބޮޑު ގޯހެއް.ލިއޮނަލް ސްކަލޯނީ / އާޖެންޓީނާގެ ކޯޗު
މީގެ އިތުރުން ސްކަލޯނީ ބުނީ ޕޮލެންޑުގެ ކެޕްޓަން ރޮބާޓް ލެވަންޑޯސްކީ އަކީ މޮޅު ކުޅުންތެރިޔެއް ކަމަށާއި، ފުޓުބޯޅަ ސަޕޯޓަރެއްގެ ހައިސިއްޔަތުން ލެވަންޑޯސްކީއާ މިހާގާތުން މަސައްކަތް ކޮށްލަން ލިބުމަކީ ވެސް އުފަލެއް ކަމަށެވެ. ސްކަލޯނީ ބުނީ ދެން ކުރެވޭ ސުވާލަކީ ލެވަންޑޯސްކީ އަކީ އާޖެންޓީނާގެ ކެޕްޓަން ލިއޮނެލް މެސީއާ އެއް ފެންވަރެއްގެ ކުޅުންތެރިޔަކުތޯ ކުރެވޭ ސުވާލު ކަމަށެވެ. އޭނާ ބުނީ ލެވަންޑޯސްކީ އަކީ މޮޅު ކުޅުންތެރިޔެއް ކަމަށާއި، އެއް ކުޅުންތެރިޔަކު އަނެއް ކުޅުންތެރިޔަކާ އަޅާ ނުކިޔާނެ ކަމަށެވެ. އަދި އެއީ ރަނގަޅަށް ކުރެވޭ ކަމެއް ނޫން ކަމަށެވެ.
އެ ޕްރެސްގައި ވާހަކަ ދައްކަމުން އާޖެންޓީނާގެ ޑިފެންޑަރު ލިސާންދްރޯ މާޓިނޭޒް ބުނީ، ވޯލްޑް ކަޕްގައި ކުރިމަތިލާން ޖެހެނީ ވަރަށް އުނދަގޫ މެޗުތަކާ ކަމަށެވެ. އެގޮތުން މެކްސިކޯ މެޗުގައި މެސީ ޖެހި ހިތްގައިމު ލަނޑު ފެނުނު ކަމަށާއި، މެޗުގެ ފުރަތަމަ ލަނޑު ޖެހި ކަމަށްޓަކައި މެސީ އަށް ޝުކުރު އަދާ ކުރާ ކަމަށެވެ. މާޓިނޭޒް ބުނީ އާޖެންޓީނާ އަށް މޮޅަށް ކުޅެވޭނެކަން އެނގޭ ކަމަށާއި، އަދިވެސް އާޖެންޓީނާ އަށް އެންމެ މޮޅު ލެވެލްއަށް ނުދެވޭ ކަމަށެވެ. ނަމަވެސް އާޖެންޓީނާ އިން އަދިވެސް މަސައްކަތް ކުރަމުން އަންނަނީ އެ ލެވެލްގައި ކުޅުމަށް ކަމަށް މާޓިނޭޒް ބުންޏެވެ.
މުބާރާތުގެ ގްރޫޕް ސްޓޭޖުގެ ފަހު މެޗުގައި އާޖެންޓީނާ އިން ޕޮލެންޑާ ދެކޮޅަށް ނުކުންނާނީ ބުދަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.
