ޓީޓޭގެ އުންމީދަކީ ނޭމާ އާއި ޑެނީލޯ އަށް ވޯލްޑް ކަޕްގައި ކުޅެވުން

ބްރެޒިލްގެ ތަރި ނޭމާ ޖޫނިއާ އަދި ޑެނީލޯ އަށް މިއަހަރުގެ ވޯލްޑް ކަޕްގައި ކުޅެވޭނެ ކަމަށް އުއްމީދު ކުރާ ކަމަށް ބްރެޒިލްގެ ކޯޗު ޓީޓޭ ބުނެފިއެވެ.

ޓީޓޭ މިހެން ބުނީ މުބާރާތުގެ ގްރޫޕް ސްޓޭޖުގެ ދެ ވަނަ މެޗުގައި ސްވިޒަލެންޑާ ދެކޮޅަށް ނުކުތުމުގެ ކުރިން އޮތް ޕްރެސްގައި ވާހަކަ ދައްކަމުންނެވެ. ބްރެޒިލް އިން ސާބިއާއާ ދެކޮޅަށް ކުޅުނު މެޗުގައި ފައިގެ ކުޑަހުޅަށް ލިބުނު އަނިޔާގެ ސަބަބުން ނޭމާ ވަނީ ބަދަލުކޮށްފައެވެ. އެއަށްފަހު ހެދި މެޑިކަލް ރިޕޯޓުތަކުން ދައްކާ ގޮތުގައި ނޭމާ އަށް ގްރޫޕް ސްޓޭޖުގައި ބާކީ އޮތް ދެ މެޗު ގެއްލޭނެއެވެ.

ޓީޓޭ ބުނީ، އޭނާގެ އުއްމީދަކީ ނޭމާ އާއި ޑެނީލޯ އަށް މިއަހަރުގެ ވޯލްޑް ކަޕްގައި ކުޅެވޭނެ ކަމެވެ. ނަމަވެސް ޓީޓޭ ބުނީ މެޑިކަލީ އަދި ކްލިނިކަލީ އޭނާ އަށް އެއްވެސް އެއްޗެއް ބުނަން ނޭންގޭ ކަމަށާއި، އެ މަގާމުގައި އޭނާ އަށް ވާހަކަ ނުދެއްކޭނެ ކަމަށެވެ. ނަމަވެސް މެޑިކަލް ރިޕޯޓުތައް އޭނާ އަށް ލިބޭކަން ޓީޓޭ ފާހަގަކުރިއެވެ. ޓީޓޭ ބުނީ އެ ދެ ކުޅުންތެރިން ވެސް މިހާރު ތިބީ އަނިޔާވި ނަމަވެސް، ރަނގަޅު ހާލަތެއްގައި ކަމަށެވެ.

ޕްރެސްގައި ބައިވެރިވެ ވާހަކަ ދައްކަމުން ބްރެޒިލްގެ އެސިސްޓެންޓް ކޯޗު ސެސާ ސަމްޕައިއޯ ބުނީ، ސްވިޒަލެންޑަކީ އިދިކޮޅަށް ކުޅެން ނުރައްކާ ޓީމެއް ކަމަށެވެ. އޭނާ ބުނީ ސާބިއާ އަށް ވުރެ ވެސް ސްވިޒަލެންޑުގެ ކުޅުން ތަފާތު ކަމަށެވެ. އަދި ސްވިޒަލެންޑާ ގުޅޭ ގޮތުން މާ ގިނަ ވާހަކަތަކެއް ނުދެއްކޭނެ ކަމަށާއި، ޔަގީނުން ވެސް ބުނަން އެނގޭ ވާހަކަ އަކީ ފުރަތަމަ މެޗުން ބްރެޒިލް މޮޅުވެފައި އޮތުމުން އިތުބާރެއް އޮތް ކަމަށެވެ.

ޕްރެސްގައި ވާހަކަ ދައްކަމުން ބްރެޒިލްގެ ޑިފެންޑަރު މާކީނިއޯސް ބުނީ ޓީމުގައި 100 އިންސަައްތަ އިތުބާރު އޮތް ކަމަށެެވެ. އޭނާ ބުނީ ކުރިއަށް އޮތް މެޗަށް ނޭމާ އަދި ޑެނީލޯ އަށް ވެސް ކުޅެވުމަކީ ކުޅުންތެެރިން ވެސް އެދޭ ގޮތް ނަމަވެސް، ޓީމުގެ ކުޅުންތެރިންގެ ހާލަތާއި ޓީމުގެ ހާލަތު އެންމެ ރަނގަޅަށް އެނގޭނީ ކޯޗަށް ކަމަށެވެ.

ގްރޫޕް ސްޓޭޖުގެ ދެ ވަނަ މެޗުގައި ބްރެޒިލުން ސްވިޒަލެންޑާ ދެކޮޅަށް ނުކުންނާނީ ހޯމަ ދުވަހުގެ ރޭ ރާއްޖެ ގަޑިން 21:00 ގައެވެ.