"ރާއްޖޭގެ ސަގާފަތާއި ތާރީޚަށް ދިވެހިންގެ އޮތް ލޯބި ބޮޑު"
26 ނޮވެމްބަރު 2022 | ހޮނިހިރު 13:14ހީނުކުރާ އަދަދަކަށް އާންމުން ގައުމީ ދާރުލް އާސާރަށް ޒިޔާރަތް ކުރި
ގައުމީ ދާރުލްއާސާރަށް 70 އަހަރު ފުރުމާއި ގުޅިގެން ގައުމީ ދާރުލްއާސާރަށް ވަނުމުގެ ފުރުޞަތު ހުޅުވާލުމާ ގުޅިގެން ގިނަ ބަޔަކު ޒިޔާރަތް ކުރަނީ
ގައުމީ ދާރުލް އާސާރަށް 70 އަހަރުފުރުމުގެ މުނާސަބާ ފާހަގަކުރުމަށް އާންމުންނަށް އެއްދުވަހު ހިލޭ ވަދެވޭގޮތަށް ހުޅުވާލުމުން އާންމުންގެ ތަރުހީބު ވަރަށް ބޮޑަށް ލިބިގެންދިޔަ ކަމަށް ދާރުލް އާސާރުގެ ވެރިޔާ ހާތިމް އިބްރާހިމް ވިދާޅުވެއްޖެއެވެ.
ރާއްޖެއެމްވީއަށް ދެއްވި އިންޓަވިއުއެއްގައި ހާތިމް ވިދާޅުވީ ފީއަކާއި ނުލާ ގައުމީ ދާރުލް އާސާރަށް ވަނުމުގެ ފުރުސަތު އާންމުންނަށް ހުޅުވާލީ ހޮނިހިރު ދުވަހުގެ ހެނދުނު 10:00ން އިރުއޮއްސި 6:00ށް ކަމަށެވެ. އަދި މިކަމަށް ހީނުކުރާވަރުގެ ބޮޑު ތަރުހީބެއް ލިބިގެންދިޔަ ކަމަށާއި އެގޮތުން 1228 މީހުން ޒިޔާރަތްކުރި ކަމަށް ވިދާޅުވިއެވެ.
ހާތިމް ވިދާޅުވީ މިކަމުން ވެސް އެނގިގެން ދިޔައީ ރާއްޖޭގެ ތާރީޚާއި ސަގާފަތަށް ދިވެހިންގެ އޮތް ލޯބި ކަމަށާއި މިއީ ވަރަށް ރަނގަޅު ހެޔޮ ފާލެއް ކަމަށެވެ.
ދާރުލް އާސާރުގައި ވަރަށް ދުވަސްވީތަކެތި އެބަހުރިކަން ފާހަގަކުރައްވާ ހާތިމް ވިދާޅުވީ އޭގެތެރޭގައި ހުކުރު މިސްކިތުން ނެގުނު ޝިހާބުއްދީން ފިލަޔާއި ރާއްޖޭގެ އެންމެ ދުވަސްވީ ލިޔުން ކަމަށްވާ ލަންދޫ އިން ފެނުނު ގައު އަދި ލޯމާފާނުތައް ވެސް އެބަހުރި ކަމަށެވެ.
ގައުމީ ދާރުލްއާސާރަކީ ގިނަ އަދަދަކަށް ފަތުރުވެރީންނާއި އާއްމުން ޒިޔާރަތްކުރަމުންއަންނަ ތަނަކަށް ވާއިރު އެ ތަނަށް ވަދެވެނީ ޓިކެޓް ނަގައިގެންނެވެ. ދާރުލް އާސާރަށް އާންމުކޮށް ވަދެވެނީ 16 އަހަރުން މަތީގެ ދިވެހިން ނަމަ 20 ރުފިޔާ، 5-16 އަހަރާއި ދެމެދުގެ ދިވެހިން ނަމަ 10 ރުފިޔާ އެވެ. އަދި 5 އަހަރުން ދަށުގެ ކުޑަކުދިންނާއި 65 އަހަރުން މަތީގެ ކުޑަކުދިންނަށް ހިލޭ ދާރުލް އާސާރަށް ވަދެވެއެވެ. މީގެ އިތުރުން 16 އަހަރުން މަތީގެ ބިދޭސީންގެ އަތުން 100 ރުފިޔާ، 5-16 އަހަރާއި ދެމެދުގެ ބިދޭސީންގެ އަތުން 20 ރުފިޔާ އަދި ފްލޭޝް ނުލާ ފޮޓޯ ނެގުމަށް 10 ރުފިޔާގެ ފީއެއް ނަގައެވެ.
