އިންގްލެންޑަކީ މުބާރާތް ކާމިޔާބުކުރާނެ އެއް ފޭވަރިޓުން: ބްރަހޯލްޓާ

އިންގްލެންޑަކީ މިއަހަރުގެ ފީފާ ވޯލްޑް ކަޕް ކާމިޔާބުކުރާނެ އެއް ފޭވަރިޓުންކަމަށް އެމެރިކާގެ ކޯޗު ގްރެގް ބްރަހޯލްޓާ ބުނެފިއެވެ.

ވޯލްޑް ކަޕްގެ ގްރޫޕް ސްޓޭޖުގެ ދެ ވަނަ މެޗުގައި އިންގްލެންޑާ ދެކޮޅަށް ނުކުތުމުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ބްރަހޯލްޓާ ބުނީ، އެމެރިކާގެ ކުޅުންތެރިން ވަރަށް ޑިސިޕްލިން ވާން ޖެހޭނެ ކަމަށެވެ. ހަމައެއާ އެކު ރަނގަޅު ފަރިތަކުރުންތަކެއް ކުރިއަށް ގެންގޮސް، މެޗުގައި ރަނގަޅަށް ކުޅުމަކީ ދައްކަން ޖެހޭނެ ކަމަށް އޭނާ ބުންޏެވެ. ބްރަހޯލްޓާ ބުނީ އިންގްލެންޑާ ދެކޮޅަށް ދަނޑު މައްޗަށް ނުކުންނައިރު، ވަރަށް ބޮޑަށް ތައްޔާރުވާން ޖެހޭނެ ކަމަށާއި، އެ ނޫނީ މޮޅުވުން އެއީ ނެތް ގޮތެއް ކަމަށެވެ.

މީގެ އިތުރުން ބްރަހޯލްޓާ ވަނީ އިންގްލެންޑުގެ ކޯޗު ގަރެތް ސައުތުގޭޓުގެ ވާހަަކަ ވެސް ދައްކާފައެވެ. އޭނާ ބުނީ އިނގިރޭސި ޓީމުގެ ކޯޗުގެ ގޮތުގައި ސައުތުގޭޓު ކުރަނީ ވަރަށް ރަނގަޅު މަސައްކަތެއް ކަމަށެވެ. ބްރަހޯލްޓާ ބުނީ ފާއިތުވި ދޮޅު ވަރަކަށް އަހަރުގެ ތެރޭގައި އޭނާ ވަރަށް ގިނައިން އެ ވާހަކަ ދައްކާ އަޑު އިވޭ ކަމަށެވެ. އޭނާ ބުނީ 2018 ވަނަ އަހަރުގެ މުބާރާތުން އިނގިރޭސިން ހަތަރު ވަނަ ހޯދި ކަމަށާއި، އޭގެ ފަހުން އެންމެ ފަހުގެ ޔޫރޯ އިން ދެ ވަނަ ހޯދި ކަމަށެވެ. އެއީ ސައުތުގޭޓުގެ މަސައްކަތް ރަނގަޅު ކަމުގެ ހެއްކެއްކަން ފާހަގަކުރަމުން ބްރަހޯލްޓާ ބުނީ ކުރިއަށް އޮތް މެޗު ވަރަށް އުނދަގޫ ވާނެ ކަމަށެވެ.

ބްރަހޯލްޓާ ވަނީ އޭނާގެ ކުޅުންތެރިންނަށް ޚާއްސަ ޝުކުރެއް ވެސް އަދާކޮށްފައެވެ. އޭނާ ބުނީ ކުޅުންތެރިން ވަރަށް ބުރަކޮށް މަސައްކަތް ކުރާ ކަމަށާއި، ޓީމުގައި އޮތީ ވެސް ވަރަށް އެކުވެރި ގުޅުމެއް ކަމަށެވެ. އަދި އެކުގައި ގުޅިގެން ކުރެވޭ މަސައްްކަތުގެ ނަތީޖާ ވެސް ރަނގަޅު ވާނެ ކަމަށެވެ.

ގްރޫޕް ބީ ގައި އެމެރިކާއިން އިންގްލެންޑާ ދެކޮޅަށް ކުޅޭނީ ހުކުރު ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.