އަނިޔާކުރުން ހުއްޓުވޭނީ އިދާރާތަކަށް ދިމާވާ ދަތިތައް ދެނެގަނެ ގުޅިގެން މަސައްކަތްކޮށްގެން: އެޗްއާރުސީއެމް
24 ނޮވެމްބަރު 2022 | ބުރާސްފަތި 13:48އެއްބަސްވުމުގައި ސޮއިކޮށްފައި ވަނީ އެޗްއާރުސީއެމް - އޭޕީޓީ ހައި-ލެވެލް ޑައިކޮގްގެ ހަވާސާގެ ތެރޭގައި
އެޗްއާރުސީއެމް އާއި އެސޯސިއޭޝަން ފޯރ ދަ ޕްރިވެންޝަން އޮފް ޓޯޗަރ ރިނިއު ކޯޕަރޭޝަނާ އެކު އެއްބަސްވުމެއް އެކުލަވާލީ 2008 ވަނަ އަހަރު
އަނިޔާކުރުން ހުއްޓުވޭނީ އިދާރާތަކަށް ދިމާވާ ދަތިތައް ދެނެގަނެ ގުޅިގެން މަސައްކަތްކޮށްގެންކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ބުނެފިއެވެ.
އެޗްއާރްސީއެމްގެ ރައީސް މަރިޔަމް މުނާ އެ ފަދައިން ވިދާޅުވީ އެޗްއާރުސީއެމް އާއި އެސޯސިއޭޝަން ފޯރ ދަ ޕްރިވެންޝަން އޮފް ޓޯޗަރ ރިނިއު ކޯޕަރޭޝަން (އޭޕީޓީ) އާ އެކު ގުޅިގެން މަސައްކަތްކުރުމުގެ އެއްބަސްވުން އައު ކުރުމަށް ބޭއްވި ރަސްމިއްޔާތުގައެވެ. މުނާ ވަނީ ޓޯޗަރކުރުން ނުވަތަ އަނިޔާކުރުން ހުއްޓުވުމަށްޓަކައި ކުރަން ޖެހޭ ގިނަ މަސައްކަތްތަކެއް ހުރިކަން ފާހަގަކުރައްވާފައެވެ. އަދި އެ މަސައްކަތް ކާމިޔާބުކަމާ އެކު ކުރުމަށްޓަކައި އިދާރާތަކުގެ މެދުގައި ވާހަކަ ދެއްކުމަކީ ވަރަށް މުހިންމު ކަމެއްކަން އޭނާ ފާހަގަކުރެއްވިއެވެ. އެގޮތުން އެ ވާހަކަތަކުގެ އަލީގައި ލިބޭ ހުށަހެޅުންތަކަކީ ކަންކަން ހަރުދަނާކޮށް އަނިޔާކުރުން ހުއްޓުވުމަށް އަޅަން ޖެހޭ ޤާނޫނީ އަދި އެހެން ފިޔަވަޅުތަައް އެޅުމަށް އެކުލަވާލެވޭ މައިބަދަ ކަމަށް ވެސް މުނާ ވިދާޅުވިއެވެ. މުނާ ވަނީ ރާއްޖޭގައި އަނިޔާކުރުން ހުއްޓުވުމަށް އެކި ފެންވަރުގައި ކުރަމުންދާ ބައެއް މަސައްކަތްތަކުގެ މުހިންމުކަމަށް އަލިއަޅުވާލައްވާފައެވެ.
އެޗްއާރުސީއެމް އާއި އެސޯސިއޭޝަން ފޯރ ދަ ޕްރިވެންޝަން އޮފް ޓޯޗަރ ރިނިއު ކޯޕަރޭޝަން (އޭޕީޓީ) އާ އެކު ގުޅިގެން މަސައްކަތްކުރުމުގެ އެއްބަސްވުން އައު ކުރުމުގެ އެއްބަސްވުމުގައި ސޮއިކޮށްފައި ވަނީ އެޗްއާރުސީއެމް - އޭޕީޓީ ހައި-ލެވެލް ޑައިކޮގްގެ ހަވާސާގެ ތެރޭގައެވެ. އެ އެއްބަސްވުމުގައި ސޮއިކުރައްވާފައި ވަނީ އެޗްއާރްސީއެމްގެ ރައީސް މަރިޔަމް މުނާ އާއި އޭޕީޓީގެ ޕޮލިސީ ސީނިއަރ އެޑްވައިޒަރ ވެރޯނިކާ ފިލިޕެސްކީ އާއި ދެ ބޭފުޅުންނެވެ.
އެޗްއާރުސީއެމް އާއި އެސޯސިއޭޝަން ފޯރ ދަ ޕްރިވެންޝަން އޮފް ޓޯޗަރ ރިނިއު ކޯޕަރޭޝަނާ އެކު އެއްބަސްވުމެއް އެކުލަވާލީ 2008 ވަނަ އަހަރެވެ. އެ އެއްބަސްވުމަކީ ރާއްޖޭގައި ލާއިންސާނީ އަދި ދަށު ދަރަޖައިގެ އަމަލުތައް ހުއްޓުވުމަށް ގުޅިގެން މަސައްކަތްކުރުމުގެ މަގްސަދުގައި އެކުލަވާލި އެއްބަސްވުމެކެވެ. އެ އެއްބަސްވުން އެކުލަވާލުމުގައި ކެނެޑާ ސަރުކާރުން ވެދެއްވާ އެހީތެރިކަން އޭޕީޓީ އާއި ރާއްޖެއިން ވެސް ފާހަގަކުރެއެވެ.
