ޓީމުގައި ތިބި ކޮލެޓީ ކުޅުންތެރިންނާއެކު މެޗު ކާމިޔާބު ކުރެވޭނެ: ބާގްވިން

ފީފާ ވޯލްޑް ކަޕް ގްރޫޕް ސްޓޭޖުގެ ދެ ވަނަ މެޗުގައި އިކުއެޑޯއާ ދެކޮޅަށް ނުކުންނައިރު ޓީމުގައި ތިބި ކޮލެޓީ ކުޅުންތެރިންނާ އެކު މެޗު ކާމިޔާބު ކުރެވޭނެ ކަމަށް ނެދަލޭންޑްސްގެ ވިންގަރ ސްޓީވަން ބާގްވިން ބުނެފިއެެވެ.

ބާގްވިން މިހެން ބުނީ އިކުއެޑޯ މެޗުގެ ކުރިން ވާހަކަ ދައްކަމުންނެވެ. އޭނާ ބުނީ ކުރިން ވެސް ބުނި ގޮތަށް ވޯލްޑް ކަޕްގެ ކޮންމެ މެޗަކީ ވެސް އުނދަގޫ މެޗަކަށްވާނެ ކަމަށެވެ. އަދި ދެން ކުޅެން އޮތީ ވެސް ވަރަށް ވަރުގަދަ ޓީމަކާ ދެކޮޅަށް ކަމަށެވެ. ބާގްވިން ބުނީ އިކުއެޑޯގެ ކުޅުންތެރިންނަކީ ފިޒިކަލީ ވަރުގަދަ، އަދި ބުންވަރު ރަނގަޅު ކުޅުންތެރިން ކަމަށެވެ. އޭނާ ބުނީ އެ މެޗުގައި ނެދަލޭންޑްސްގެ ކުޅުންތެރިން ޖެހޭނީ ބޯޅަޔާއެކު ރަނގަޅު ކުޅުމެއް ދައްކަން ކަމަށެވެ. ހަމައެއާ އެކު ޓީމުގައި ހުނަރުވެރި ކޮލެޓީ ކުޅުންތެރިން ތިބިކަން ފާހަގަ ކުރަމުން އޭނާ ބުނީ މެޗު ކާމިޔާބު ކުރުމަކީ ކުރެވޭނެ ކަމެއް ކަމަށެވެ.

މީގެ އިތުރުން ނެދަލޭންޑްސްގެ މިޑްފީލްޑަރު ޑޭވީ ކްލާސެން ބުނީ ވާޖިން ވެންޑައިކަކީ ޓީމަށް ވަރަށް މުހިންމު ކުޅުންތެރިޔެއް ކަމަށާއި، އޭނާ އަކީ ނަމޫނާ ކެޕްޓަނެއް ކަމަށެވެ. އޭނާ ބުނީ ވެންޑައިކް ދަނޑު މަތީގައި ހުންނަ ވަގުތުގައި އިދިކޮޅު ޓީމުން ޖެހިލުން ވާނެ ކަމަށާއި، އޭނާ އަކީ ޓީމަށް ލިބޭ އިތުރު ހިތްވަރެއް ކަމަށެވެ.

ގްރޫޕްގެ ދެ ވަނަ މެޗަށް ނުކުންނައިރު މި ދެ ޓީމު ވެސް ވަނީ ކުޅުނު ފުރަތަަމަ މެޗު ކާމިޔާބުކޮށްފައެވެ. އެހެންކަމުން ގްރޫޕްގެ އެއް ވަނަ ހޯދުމަށް މިއީ ދެ ޓީމަށް ވެސް މުހިންމު މެޗަކަށްވާނެއެވެ.