42 ކިލޯ ޑްރަގް ކޭސްގައި ފުލުހުން އަމަލުކުރި ގޮތް ބެލުމަށް ހުށަހެޅިފައިވާ މައްސަލަ 241 ކޮމިޓީން ނިންމަނީ

މ. ލަވްނެސްޓު ގޭގެ ތަޅުންގަނޑު އަޑީގައި ފޮރުވާފައިހުރި 42 ކިލޯގެ މަސްތުވާތަކެތީގެ މައްސަލައިގައި ހައްޔަރުކުރިި ދެމީހުންގެ މައްޗަށް ދައުވާނުކުރަން ޕްރޮސެކިއުޓަރ ޖެނެރަލް އޮފީހުން ނިންމި މައްސަލައިގައި ފުލުހުން އަމަލުކޮށްފައިވާގޮތް ބެލުމަށް ހުށައަޅާފައިވާ މައްސަލަ އަވަހަށް ނިންމުމަށް ކޮމިޓީގެ މުޤައްރިރު އެދިވަޑައިގެންފިއެވެ.

މ. ލަވްނެސްޓް ގެއިން ފުލުހުން މަސްތުވާތަކެތި އަތުލައިގެންފައިވަނީ 24 މާޗު 2022 ވަނަ ދުވަހުއެވެ. އެ މައްސަލައިގައި ދެ މީހަކު ހައްޔަރުކުރިއެވެ. މި މައްސަލައިގައި ހައްޔަރުކުރީ ކ. މާލެ، ދަފްތަރު ނަންބަރު ރސ 3840، އުމުރުން 39 އަހަރުގެ އަހުމަދު ހުސައިނާއި ކ. މާލެ، މ. ނޫރުއް، އުމުރުން 46 އަހަރުގެ އަބްދުﷲ ނަޝީދުއެވެ.

Advertisement

މިމައްސަލައިގައި ހައްޔަރުކުރި ދެ މީހުންނަށް ދައުވާނުކުރުމަށް ޕީޖީ އޮފީހުން ނިންމައި ބުނެފައިވަނީ، މިގޮތަށް ނިންމީ، ކޯޓު އަމުރެއް ނެތި، ގާނޫނާ ޚިލާފަށް އެ ގެ ފާސްކުރުމުން ކަމަށެވެ. އެގޮތުން ފުލުހުންނަށް ކޯޓު އަމުރަކަށް އެދި ހުށަހެޅުމުގެ އެކަށީގެންވާ ވަގުތާއި ފުރުސަތު ލިބިފައި އޮއްވައި، ކޯޓު އަމުރަކާނުލައި ފާސްކޮށްފައިވާ ކަމަށާއި، ގޭގެ ވެރިފަރާތަކީ ކާކުކަން އެނގެން އޮތްއިރު، އެ ގެ ބަލައި ފާސްކުރުމުގެ ހުއްދަ އެހެން މީހެއްގެ އަތުން ހޯދާފައިވާތީ ލަވްނެސްޓް ގެއަށް ފުލުހުން ވަދެ ބަލައި ފާސްކޮށްފައިވަނީ ގާނޫނު އަސާސީގެ 149 ވަނަ މާއްދާއާއި، މަސްތުވާތަކެއްޗާބެހޭ ގާނޫނުގެ 47 ވަނަ މާއްދާއާ ޚިލާފަށްކަމަށް ޕީޖީ އޮފީހުން ވަނީ ބުނެފައެވެ.

މީގެ އިތުރުން އެ މައްސަލައިގައި ސީންގައި ކަންވީގޮތާމެދު ސުވާލުއުފެދޭ ގިނަ ކަންތައްތަކެއް ހުރިކަން ފާހަގަކުރެވިފައިވާ ކަމަށާއި، ތުހުމަތުކުރެވޭ މީހުންނާ ގުޅުންހުރި ތަންތަން ބަލައި ފާސްކުރިއިރު، އެ ތަންތަނުގައި ހުރި، ހެކީގެ ގޮތުގައި ބޭނުންކުރެވިދާނެކަމަށް ފެންނަ ބައެއް ތަކެތި ތަހުގީގަށް ނަގައި، ތަހުލީލުކޮށްފައިވާކަން ޕީޖީ އޮފީހަށް ހުށަހެޅި ލިޔުންތަކުން އެނގެން ނެތްކަމަށްވެސް ޕީޖީ އޮފީހުން ވަނީ ބުނެފައެވެ.

ޕީޖީ އޮފީހުން ބުނީ މި މައްސަލައިގައި، ހޯދިދާނެކަމަށް ފެންނަ މުހިންމު ހެކިތަކެއް ހޯދާފައިނުވާތީ، އެ މައްސަލައިގައި ތުހުމަތުކުރެވޭ މީހުންނާ ފެނުނު މަސްތުވާތަކެއްޗާ ގުޅުވައިދެވޭ މިންވަރަށް ހެތްކާއި ގަރީނާ ހޯދާފައިނުވާކަމަށެވެ.

މ. ލަވްނެސްޓު ގޭގެ ތަޅުންގަނޑު އަޑީގައި ފޮރުވާފައިހުރި 42 ކިލޯގެ މަސްތުވާތަކެތީގެ މައްސަލައިގައި ހައްޔަރުކުރިި ދެމީހުންގެ މައްޗަށް ދައުވާނުކުރަން ޕްރޮސެކިއުޓަރ ޖެނެރަލް އޮފީހުން ނިންމި މައްސަލައިގައި ފުލުހުން އަމަލުކޮށްފައިވާގޮތް އިތުރަށް ބެލުމަށް ރައްޔިތުންގެ މަޖިލީހުގެ 241 ކޮމިޓީއަށް އޮތީ ހުށައަޅާފައެވެ.

އެކަމުގެ ފަހުގެ މައުލޫމާތުތައް ބުދަ ދުވަހުގެ 241 ކޮމިޓީގައި ހިއްސާ ކޮށްފައިވާއިރު، ކޮމިޓީގެ މުޤައްރިރު ވިދާޅުވީ، ދެ އިދާރާއަކުން ފޯރުކޮށްދީފައިވާ މައުލޫމާތުތަކުގައިވާ ފުށުއެރުންތައް ފާހަގަ ކުރުމަށް ވިލިމާލޭ ދާއިރާގެ މެމްބަރު އަހުމަދު އުޝާމް އަދި ކެންދޫ ދާއިރާގެ މެމްބަރު އަލީ ހުސައިންއާ ޙަވާލު ކުރެވިފައިވާ ކަމަށެވެ.

އެ މައުލޫމާތުތައް ޖޫން މަހުގެ ފަހު ހަފްތާގައި މައި ކޮމިޓީއަށް ހުށައެޅުމަށް އޭރު އަންގާފައިވެއެވެ. މުޤައްރިރު ވަނީ އެކަމާ ގުޅޭ ތަފްސީލުތައް ބެއްލެވުމަށްފަހު، މައްސަލަ އަވަހަށް ނިންމަވާނެކަމަށް ވިދާޅުވެފައެވެ.