ކްރިމިނަލް ކޯޓަށް ގާޒީއަކު އައްޔަނުކުރުމުގެ މަސައްކަތްތައް ޑިސެމްބަރު މަހު ނިންމޭނެކަމަށް ބެލެވޭ: ޖޭއެސްސީ
ކްރިމިނަލް ކޯޓުގެ ގާޒީކަމުގެ މަޤާމު ހުސްވެފައިވާތާ 4 މަހަށްވުރެ ގިނަދުވަސްވެފައިވޭ
ކްރިމިނަލް ކޯޓް
ކްރިމިނަލް ކޯޓަށް ގާޒީއަކު އައްޔަނު ކުރުމުގެ މަސައްކަތްތައް ޑިސެމްބަރު މަހުގެ ތެރޭގައި ނިންމާލެވޭނެކަމަށް ބެލެވޭކަމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ބުނެފިއެވެ.
އޮގަސްޓު މަހުގެ 9 ވަނަ ދުވަހުން ފެށިގެން އެ ކޯޓުގެ ގާޒީ ދީބާނާޒް ހައިކޯޓަށް ބަދަލުކުރެއްވުމާ އެކު އެ ސެކްޝަނުގެ މައްސަލަަތައް ބަލަމުން ގެންދަނީ އެކިއެކި ސެކްޝަންތަކުގެ ގާޒީންނަށް ބަހާލައިގެންނެވެ. އެގޮތުގެ މަތިން މައްސަލަތައް ކުރިއަށް ގެންދާއިރު އަޑުއެހުންތައް ތާވަލު ނުކުރެވިވެސް ގިނަ ދުވަސް ވޭތުވެގެންދާން ޖެހެއެވެ.
ކްރިމިނަލް ކޯޓުގެ ގާޒީކަމުގެ މަޤާމު ހުސްވެފައިވާތާ 4 މަހަށްވުރެ ގިނަދުވަސްވެފައިވާއިރު، އަދިވެސް ޖޭއެސްސީން އެ މަޤާމަށް ގާޒީއަކު ހޮވާފައެއް ނުވެއެވެ.
އެކަމާ ގުޅޭގޮތުން ރާއްޖެއެމްވީން ސުވާލުކޮށްލުމުން ޖޭއެސްްސީގެ މީޑިއާ އޮފިޝަލު ވިދާޅުވީ، ކްރިމިނަލް ކޯޓާއި ސިވިލް ކޯޓުގެ ހުސްވެފައިވާ މަޤާމުތަކަށް ގާޒީން އައްޔަނު ކުރުމަށް ކުރަންޖެހޭ މަސައްކަތްތައް އެ ކޮމިޝަނުން ކުރަމުންދާ ކަމަށެވެ. އެގޮތުން ސިވިލް ކޯޓަށް ވެސް 2 ގާޒީއަކު ހޮވުމަށް ސެޕްޓެމްބަރު މަހުގެ ތެރޭގައި ކޮމިޝަނުން އިއުލާނު ކުރިއެވެ.
ޖޭއެސްސީން މެޖިސްޓްރޭޓު ކޯޓުތަކަށް ގާޒީން އައްޔަނު ކުރުމުގެ މަސައްކަތްތައް ކޮށްފައިވާއިރު، މިހާރު ކުރިއަށްދަނީ ސުޕީރިއަރ ކޯޓުތަކަށް ގާޒީން އައްޔަނު ކުރުމުގެ މަސައްކަތްތައްކަން އޭނާ ފާހަގަކުރެއްވިއެވެ.
ޖޭއެސްސީން މައުލޫމާތު ދޭ ގޮތުގައި މިހާރު ގާޒީން އައްޔަނު ކުރުމަށްޓަކައި ހުރިހާ ކެނޑިޑޭޓުންގެ ސްކްރީނިންގ ޕޮރޮސެސް އެއްކޮށް ވަނީ ނިންމާލާފައެވެ. އަދި ކުރިއަށް އޮތީ އިންޓަރވިއު މަރުޙަލާކަމަށް ޖޭއެސްސީން ބުނެއެވެ. އެގޮތުން ޑިސެމްބަރު މަހުގެ ތެރޭގައި ގާޒީގެ މަޤާމަށް އިންޓަރވިއުކޮށް، ގާޒީއަކު އައްޔަނު ކުރުމަށް ކޮމިޝަނުން ކުރަންޖެހޭ ހުރިހާ މަސައްކަތްތަކެއް ނިންމާލެވޭނެކަމަށް ބެލެވޭކަމަށް ޖޭއެސްސީގެ އޮފިޝަލު ރާއްޖެއެމްވީއަށް ވިދާޅުވިއެވެ.
ކްރިމިނަލް ކޯޓުގެ ސެކްޝަނެއްގައި ގާޒީއަކު ނެތި 4 މަހަށްވުރެ ގިނަ ދުވަސްވެފައިވާއިރު، އެ ސެކްޝަނުން ބަލަމުންދާމައްސަލައެއްގައިދައުވާލިބޭ 3 މީހަކު ބުދަ ދުވަހު ވަނީ ޝަރުތުތަކާއެކު ބަންދުން ދޫކޮށްލާފައެވެ. އެ މައްސަލަ ކުރިއަށް ގެންދެވި ގާޒީވެސް ވަނީ ބަންދުން ދޫކޮށްލެއްވި ސަބަބުތަކުގެ ތެރޭގައި މި މައްސަލަ އެކަށީގެންވާ އަވަސް މިނެއްގައި ކުރިއަށް ނުގެންދެވުން ފާހަގަ ކުރައްވާފައެވެ.
