އަނިޔާގެ ބޮޑު މައްސަލައެއް ނެތް، ކެމަރޫން ޓީމު ނުކުންނާނީ އަޒުމާއެކު

ކެމަރޫން ސްވިޒަލޭންޑާ ދެކޮޅަށް ނުކުންނައިރު ނަޕޯލީގެ މިޑްފީލްޑަރު އަންދްރޭ ފްރޭންކް ޒްމަބޯ ހުރީ އަނިޔާގައެވެ. އޭނާ އަށް ކުޅެވޭނެކަން މުޅިން ޔަގީނެއް ނޫނެވެ. މިނޫން އަނިޔާގެ މައްސަލައެއް ކޯޗު ރިގްބަޓް ސޮންގެ ޓީމުގައެއް ނެތެވެ.

ކެމަރޫންއަކީ ދެ އަރި މަތިން ހަލުވިކޮށް ކުޅޭ ކުޅުންތެރިންގެ ބޭނުންހިފަން މަސައްކަތްކުރާ ޓީމެކެވެ. މި ޓީމު އާއްމުކޮށް ކުޅެނީ 4-3-3 އަށެވެ. ފޯވާޑް އަބޫބަރަކީ ވަރުގަދަ ކުޅުންތެރިއަކަށް ވުމުން އޭނާ އަށް ދިގު ބޯޅަތަކެއް ކުޅުމަކީ ވެސް ބައެއް ފަހަރު ކުރާކަމެކެވެ. ކެމަރޫނާއި ބާސެލޯނާގެ ކުރީގެ މަޝްހޫރު ފޯވަޑް ސެމިއުލް އެޓޫ ފުޓްބޯޅަ ފެޑަރޭޝަނުގެ ރައީސްކަމަށް އައުމަށްފަހު ފުރަތަމަ ވެސް ކުރި ކަމަކީ ކޯޗުކަމުން ޕޯޗުގަލްގެ ޓޯނީ ކޮންސެއިސާސޯ ވަކިކުރުމެވެ. އެއަށްފަހު ކޯޗުކަން ދިނީ އޭނާއާ އެކު ގައުމީ ޓީމަށް ކުޅުނު ގާތް އެކުވެރިޔާ ރިގްބަޓް ސޮންއަށެވެ. އޭނާގެ ކޯޗިން ތަޖުރިބާ މަދު ނަމަވެސް ސޮންގަކީ ކޮންމެ ކަމަކަށް އާނ ބަސް ބުނާ މީހެއް ނޫނެވެ. 1990 ވަނަ އަހަރުގެ ރޮޖަ މިލާ ޖާދޫ ދައްކައި ކެމަރޫން ގަދަ އަށަކަށް ގެންދިޔަ ނަމަވެސް އެފަހުން ކެމަރޫން ޓީމުން އެއިރުގެ ހިތްވަރާއި ފަންވަރެއް ނުފެނެއެވެ.

މިހެންވެ އެޓޫގެ އިރުޝާދުގެ ދަށުން ސޮންގަށް ދީފައިވާ އެންމެ މުހިންމު ޓާސްކަކީ މި ފަހަރުގެ ވޯލްޑްކަޕުގައި ގްރޫޕް ސްޓޭޖް ފަހަނައަޅައި ދިއުމަށެވެ. މި ޓާގެޓަށް ވާސިލް ނުވެވުނަސް ސޮންގު ކޯޗުކަމުގައި ދެމި ހުންނާނެއެވެ. ސަބަބަކީ އޭނާ އަށް ނަތީޖާ ނެރެން މަޖުބޫރު މުބާރާތަކީ ދެން އެންމެ އަވަހަށް ބާއްވާ އެފްރިކަން ނޭޝަންސް ކަޕު ކަމަށް ވުމުންނެވެ. ހަމަމިއާ އެކު 2026ގެ ވޯލްޑްކަޕް ކޮލިފައިން އަކީ ސޮންގް ކޮންމެހެން ނަތީޖާ ނެރެންޖެހޭ މުބާރާތެކެވެ.

މިކަމަށް ކެމަރޫނުގެ ފެޑަރޭޝަނުން އޭނާ އަށް ހިފެހެއްޓުމެއްނެތި އެހީތެރިވެދޭނެއެވެ. ގިނަ ބަޔަކު ސިފަކުރާ ގޮތުގައި ވޯލްޑްކަޕަށް ފަހު ކެމަރޫން ޓީމުގެ ވަރަށް ގިނަ ކަންކަމަށް ބަދަލު ގެންނާނެއެވެ. ނަމަވެސް އެކަމުގެ ސްޕީޑް ބިނާވާނީ ވޯލްޑްކަޕުގައި ޓީމު ނެރޭ ނަތީޖާއަކަށެވެ.