މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމްއެންއެސްޑީއޭ)ގެ އަމާޒަކީ ތަމްރީނު ލިބޭ މީހުންނަކީ, ރާއްޖޭގެ އިތުރުން ބައިނަލްއަޤްވާމީ ފެންވަރުގައިވެސް ވަޒީފާ ލިބޭ މީހުންނަށް ހެދުން ކަމަށް އެ އޮތޯރިޓީގެ ސީއީއޯ އަހްމަދު ނަޝީދު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން ނަޝީދު ވިދާޅުވީ، މިހާތަނަށް ހުނަރުގެ ތަމްރީނު ދެވޭ ގޮތް ބަދަލުކޮށްފައިވާ ކަމަށާއި، މުޅި ނިޒާމަށް ބޮޑެތި ބަދަލުތަކެއް ގެނެވިފައިވާކަމަށެވެ.

ހުނަރުގެ ތަމްރީނު ހޯދުމަށް އެންމެން އެންމެ ބޮޑަށް ބޭނުންވާ ތަނަކަށް އެމްއެންއެސްޑީއޭ ވެގެންދާނެ ކަމަށާއި، މިހާރުވެސް ޑިމާންޑް އެބައޮތް ކަމަށެވެ. އަދި މި ޑިމާންޑް އިތުރަށް ފުޅާވެގެންދާނެ ކަމަށްވެސް ވިދާޅުވިއެވެ.

2019 ވަނަ އަހަރު ޓިވެޓް އޮތޯރިޓީން ލޯންޗުކުރި، ނެޝަނަލް އެޕްރެންޓިސްޝިޕް ޕްރޮގްރާމާ ބެހޭގޮތުން ވާހަކަފުޅުދައްކަވަމުން ނަޝީދު ވިދާޅުވީ، މިހާތަނަށް ޓްރެއިނިންގ ދޭ ދެފަރާތަކުން ޕްރޮގްރާމުގައި ހަރަކާތްތެރިވާ ކަމަށެވެ. އޭގެ އިތުރުން ވަޒީފާ ދޭ ފަރާތްތަކާއި ސަރުކާރުގެ ގިނަ އެސްއޯއީތައް ބައިވެރިވާ ކަމަށެވެ.

އެންމެ ބޮޑު މަސައްކަތެއް ކުރަނީ ޔޫތު މިނިސްޓްރީއާއެކު ކަމަށާއި، އެ މިނިސްޓްރީގެ އަމާޒަކީ 3000 ޒުވާނުން ވަޒީފާއަށް ނެރުންކަން ފާހަގަކުރެއްވިއެވެ.

ނަޝީދު އިތުރަށް ވިދާޅުވީ، ނެޝަނަލް ޓްރޭޑް ޓެސްޓިންގ އެންޑް ސެޓިފެކޭޝަންގެ މަސައްކަތް އުންމީދުކުރާ މިންވަރާ ގާތަށްވެސް ކުރިއަށް ނުދާކަމަށެވެ. ތަފާތު ސަބަބުތައް އެކަމުގައި ދިމާވާ ކަމަށާއި، ކަރަންޓް ވަޔަރިންގގައި ހުރި ސްޓޭންޑަޑްތަކަށް ކުރިމަތިލާ މީހުންގެ އަދަދު މަދުކަމަށެވެ. އެގޮތުން އިމްތިހާނުގައި އަންނާނީ ކޯޗެއްކަން އެމީހުންނަށް ނޭނގޭކަމަށާއި، އެގޮތަށް ދިމާވަނީ އެ މައުލޫމާތު އަދި އާންމު ނުކުރެވުމުން ކަމަށް ނަޝީދު ވިދާޅުވިއެވެ. އެހެންނަމަވެސް ކުރިއަށް އޮތްތަނުގައި އާންމުން ބޭނުންވާ ވިއްސަކަށް ދާއިރާގެ މައުލޫމާތު އާންމު ކުރާނެ ކަމަށް ވިދާޅުވިއެވެ.

ހުނަރުގެ ރަސްމީ ތަމްރީނުގެ ތެރެއިން ސެޓްފިކެޓެއް ނުލިބި ފަންނީ މަސައްކަތުގައި ގިނަ ދުވަހު ދެމިތިބޭ ދިވެހި ރައްޔިތުންނަށް ހުނަރުގެ ރަސްމީ ސަނަދެއް ހޯދޭނެ ނިޒާމު، މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީއިން ވަނީ ގާއިމްކޮށްފައެވެ. މިގޮތުން، މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީން ހިންގާ ނެޝަނަލް ޓްރޭޑް ޓެސްޓިންގ އެންޑް ސަރޓިފިކޭޝަން ޕްރޮގްރާމްގެ ދަށުން، ވަޒީފާއަށް ބޭނުންވާ ފަންނީ ހުނަރު ހުރިތޯ ބެލުމަށް ގައުމީ އިމްތިހާނެއް ދީ، އެ އިމްތިހާނުން ފާސްވާ މީހުނަށް ގައުމީ ސަނަދު ނުވަތަ ނެޝަނަލް ސެޓްފިކެޓެއް ދެވޭނެއެވެ.

މިގޮތުން ދެވޭ ގައުމީ އިމްތިހާން ނުވަތަ ނެޝަނަލް އެސެސްމަންޓް ޓެސްޓް ދެވޭނީ، މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީގެ ނޭޝަނަލް ކޮމްޕިޓެންސީ ސްޓޭންޑަރޑްތަކުގައި ކަނޑައަޅާފައިވާ އެންމެހައި ކޮމްޕިޓެންސީތައް ހާސިލުވެފައިވާކަން ކަށަވަރުކޮށްފައެވެ.