ސްޕެއިންނާ ދެކޮޅަށް ކޮސްޓަރިކާ ބުދަ ދުވަހުގެ ރޭ ނުކުންނައިރު ޓީމުގައި އަނިޔާގެ އެއްވެސް މައްސަލައެއް ނެތެވެ. ހުރިހާ ކުޅުންތެރިން ވެސް ތިބީ ގަދަވެ ހެޔޮހާލުގައެވެ.
އާދައިގެ މަތިން މިރޭގެ މެޗު ވެސް ކޮސްޓަރިކާ ފަށާނީ ހަތަރު ޑިފެންޑަރުންނާއެކުއެވެ. ކޮސްޓްރިކާގެ ކޯޗުކަމާ ލުއިސް ފެނާންޑޯ ސުއަރޭޒް ހަވާލުވުމަށްފަހު ފަހަތުގައި ހަތަރު ޑިފެންޑަރުން ލައްވައި ކުޅުވަން ފެށުމަކީ އޭނާގެ އާދައެކެވެ. ގިނަ ފަހަރަށް އޭނާ ކުޅުވަނީ ފަހަތުގައި ފަސް މީހުން ބައިތިއްބައިގެން 5-4-1 އަށެވެ. މީގެ ބޭނުމަކީ ދެ އަރިމަތިން އެމީހުންގެ ސްޕީޑްގެ ބޭނުން ކައުންޓަ އެޓޭކްތަކުގައި ހިފުމެވެ. ޖަރުމަނާއި ސްޕެއިން ހިމެނޭ ގްރޫޕެއްގައި ކުޅެން އެންމެ އެކަށީގެންވަނީ ވެސް މި ފޯމޭޝަނަށް ކަމަށް ކޯޗު ދެކެއެވެ.
އެއްވެސް ޤައުމެއްގައި ފުޓްބޯޅަ އަށް މޮޅު ޖީލެއް ބަދަލުކުރުމަކީ އުނދަގޫ ކަމެކެވެ. 2014 ވަނަ އަހަރުގެ ވޯލްޑްކަޕުގެ ހީރޯއިން މިހާރު ތިބީ އުމުރުން ދުވަސްވެފައެވެ. ގޯލްކީޕަރު ކޭލާ ނަވާސް އާއި ކެމްބެލް، އޮސްކާ ޑުރާޓޭ، ސެލްސޯ ބޯހާސް، ފްރާންސިސްކޯ ކަލްވޯ އާއި ބްރަޔަން ރުއިޒް ފަދަ މިޑްފީލްޑަރުންނަކީ އަދިވެސް ޓީމުގެ މުހިންމު މަގާމުތަކުގައި ތިބި ކުޅުންތެރިންނެވެ. އެކަމަކު މި ކުޅުންތެރިންނަށް ރަނގަޅު ވޯލްޑްކަޕެއް ލިބެން އޮތީ ވިންގަށް ކުޅޭ ގާސޮން ޓޮރޭޒް އާއި ފޯވަޑް އެންތަނީ ކޮންޓްރޮރާސް ފަދަ ޒުވާން ކުޅުންތެރިން މޮޅަށް ކުޅެން ކަމަށް ކޯޗު ގަބޫލުކުރެއެވެ.
އަނެއްކޮޅުން ކީޕަރު ނަވާސްގެ ތަޖުރިބާ އަކީ މިރޭގެ މެޗުގައި ކޮސްޓަރިކާ އަށް މުހިންމު އެއްޗެކެވެ. އޭނާ އަކީ ސްޕެއިންގެ ރެއާލް މެޑްރިޑަށް ދުވަސްތަކެއް ވަންދެން ކުޅެ، އެކުލަބުގައި ޗެމްޕިއަންސް ލީގު ޖެހިޖެހިގެން ތިން ފަހަރު ހޯދި ކުޅުންތެރިއެކެވެ. އޭނާ އަށް ސްޕެއިންގެ ކުޅުންތެރިންނާއި އެމީހުންގެ ވައްޓަފާޅި އާއި މެޗެއްގެ ތެރޭގައި ސްޕެއިންގެ ކުޅުންތެރިންގެ ހަރަކާތް ހުންނާނެ ގޮތް ވަރަށް ރަނގަޅަށް އެނގޭނެއެވެ. މިހެންވެ ކޯޗު ލުއިސް ފެނާންޑޯ ވެސް ވަނީ ނަވާސްގެ ތަޖުރިބާ އާއި އޭނާގެ ބޭނުން މި މެޗުގައި ހިފަން ޖެހޭ ކަމުގެ މުހިންމުކަން މާކުރިން ކިޔަންފަށާފައެވެ.
ސްޕެއިންގެ ބައެއް ކުޅުންތެރިންގެ މެދުގައި ނަވާސްއާ މެދު އެކުވެރިގުޅުމެއް އެބައޮތެވެ. ނަމަވެސް ޓީމުގެ މެޖޯރިޓީ ކުޅުންތެރިންނަކީ އޭނާއާ މެދު މާބޮޑު ގުޅުމެއްނެތް ކުޅުންތެރިންނެވެ. ސްޕެއިން ޓީމުގައި ގިނައީ ބާސެލޯނާގެ ކުޅުންތެރިންނެވެ. އެމީހުން ނަވާސް އާމެދު ހިތްނުރުހެނީ އޭނާ އަކީ ރެއާލް މެޑްރިޑުގައި ހުރެ ބާސެލޯނާގެ ސަޕޯޓަރުންނާއި ކުޅުންތެރިން ހިތަށް ތަދުކުރި ކީޕަރަކަށްވާތީއެވެ.
