ޑިސެމްބަރު މަހު ހައިކޯޓާއި ކްރިމިނަލް ކޯޓު ރިސެސްއަށް
23 ނޮވެމްބަރު 2022 | ބުދަ 05:56ޤާނޫނުގައި ވަކި މުއްދަތެއްގެ ތެރޭގައި ނިންމުމަށް ލާޒިމުކުރާ މައްސަލަތައް ކުރިއަށްދާނެ
ހައި ކޯޓު
ޑިސެމްބަރު މަހުން ފެށިގެން ދިވެހިރާއްޖޭގެ ހައިކޯޓާއި ކްރިމިނަލް ކޯޓު ރިސެސްއަށް ދިއުމަށް ނިންމައިފިއެވެ.
ހައިކޯޓުގެ ޤަވާއިދުގެ 4 ވަނަ މާއްދާގެ ދަށުން އެ ކޯޓު ރިސެސްއަށް ދިއުމަށް ނިންމާފައިވަނީ ޑިސެމްބަރު މަހުގެ 1 ވަނަ ދުވަހުން ފެށިގެންނެވެ. އެގޮތަށް ނިންމާފައިވަނީ ހައިކޯޓުގެ ފަނޑިޔާރުންގެ މަޖިލީހުންނެވެ.
ރިސެސްގެ މުއްދަތުގައި އާންމު އުސޫލުން ޝަރީއަތްތައް ކުރިއަށް ނުގެންދިޔަ ނަމަވެސް، ޤާނޫނުގައި ވަކި މުއްދަތެއްގެ ތެރޭގައި ނިންމުމަށް ލާޒިމުކުރާ މައްސަލަތަކާއި، އަވަސް ތަބީއަތުގެ މައްސަލަތަކާއި، ޙުކުމް ކުރުމަށް ބާއްވާ ޝަރީއަތުގެ މަޖިލިސްތައް ފަދަ ކަންކަން އޭގެ ތެރެއިން އިސްތިސްނާ ވާނެ ކަމަށް ހައިކޯޓުން މައުލޫމާތު ދެއެވެ.
ހަމައެއާއެކު، އަވަހަށް ހިންގަން ޖެހޭކަމަށް މައްސަލަ ބައްލަވާ ފަނޑިޔާރުންގެ ބެންޗަށް އެއްބަސްވެވަޑައިގެންނެވޭ ބާވަތުގެ މައްސަލަތައްވެސް އޭގެ ތެރެއިން އިސްތިސްނާވެއެވެ.
އޭގެ އިތުރުން، ޑިސެމްބަރު މަހު އެއްކޮށް ކްރިމިނަލް ކޯޓުވެސް ރިސެސްއަށް ދިއުމަށް ވަނީ ނިންމާފައެވެ. އެހެންނަމަވެސް ކޮންމެހެން ބާއްވަން ޖެހޭ ޚާއްސަ ޝަރީއަތްތަކުގެ އަޑުއެހުންތަކާއި، އަދި ކުށުގެ ތުހުމަތުގައި ހައްޔަރުކުރެވޭ ނުވަތަ ބަންދުކުރެވޭ މީހުންގެ ބަންދާމެދު ގޮތެއް ނިންމުމަށް ބާއްވާ މަޖިލިސްތައް ބޭއްވުމާއި، ތަހުގީގުކުރާ އިދާރާތަކުން އެދިގެން ނެރެދޭ އަމުރުތައް ނެރުމުގެ މަސައްކަތްތައް ރިސެސްގެ މުއްދަތުގައި އަބަދުވެސް ކުރިއަށް ދެއެވެ.
ރިސެސްގެ މުއްދަތުގައި އާންމު އުސޫލުން ޝަރީއަތްތައް ކުރިއަށް ނުގެންދިޔަ ނަމަވެސް، މައްސަލަތައް ބަލައިގަތުމާއި އިދާރީ ކަންކަންވެސް ކޯޓުތަކުގައި ކުރިއަށް ގެންދާނެއެވެ.
