ލެވަންޑޯސްކީއަށް ޕެނަލްޓީ ކާމިޔާބު ނުކުރެވި، މެކްސިކޯއާ އެއްވަރުވެއްޖެ

ފީފާ ވޯލްޑް ކަޕްގައި ޕޮލެންޑާއި މެކްސިކޯ ބައްދަލުކުރި މެޗުގައި ލިބުނު ފުރުސަތުގެ ބޭނުން ނުހިފި ދެޓީމު އެއްވަރުވެއްޖެއެވެ.

974 ސްޓޭޑިއަމްގައި ކުޅުނު ގްރޫޕް ސީގެ ދެވަނަ މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. ދެޓީމަށްވެސް ލަނޑު ޖެހުމަށް ރަނގަޅު ފުރުސަތުތަކެއް ލިބުނު މި މެޗުގައި އެންމެ ހުސް ފުރުސަތެއް ލިބުނީ ޕޮލެންޑުގެ ކެޕްޓަން ރޮބަޓް ލެވަންޑޯސްކީއަށެވެ. މެޗުގެ 58 ވަނަ މިނެޓުގައި ލެވަންޑޯސްކީ ފޮނުވާލި ޕެނަލްޓީ މަތަކުރީ މެކްސިކޯގެ ކީޕަރު ގިލޭމޯ އޮޗޮއާއެވެ.

ވޯލްޑް ކަޕްގައި ލެވަންޑޯސްކީއަށް މިހާތަނަށް ލަނޑެއް ޖެހިފައެއް ނުވެއެވެ. ލެވަންޑޯސްކީ ވަނީ 2018 އަހަރުގެ މުބާރާތުގައިވެސް ޕޮލެންޑު ޓީމަށް ކުޅެފައެވެ. ނަމަވެސް ބަޔާން މިއުނިކްގައި ހުރިއިރު އަދި ބާސެލޯނާއަށް ބަދަލުވުމަށް ފަހުވެސް ގިނަ ލަނޑުތަކެއް ޖަހަމުން އަންނަ ލެވަންޑޯސްކީއަށް ވޯލްޑް ކަޕްގައި މިހާތަނަށް އަދި ލަނޑެއް ނުޖެހެއެވެ.

މި މެޗުގައި މެކްސިކޯއަށްވެސް ލަނޑު ޖަހަން ރަނގަޅު ފުރުސަތުތަކެއް ލިބުނެވެ. އެންމެ ހުސް ފުރުސަތެއް ލިބުނީ ވޭގާއަށެވެ. މަތިމަތިން އައި ބޯޅަ ބޮލުން ޖަހާ ވެގާ ފޮނުވާލި ނަމަވެސް ބޯޅަ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

މިއީ މިދެޓީމު ވޯލްޑް ކަޕްގައި ބައްދަލުކުރި ދެވަނަ ފަހަރެވެ. އެންމެ ފުރަތަމަ ބައްދަލުކުރީ 1978 ވަނަ އަހަރުއެވެ. އެމެޗު 3-1ން ކާމިޔާބުކުރީ ޕޮލެންޑެވެ.

ގްރޫޕް ސީގައި ކުޅުނު ފުރަތަމަ މެޗު ކާމިޔާބުކުރީ ސައޫދީ އަރަބިއްޔާއެވެ. ގިނަ ބަޔަކު ހައިރާން ކޮށްލުމަށްފަހު ސައޫދީން އާޖެންޓީނާ ބަލިކުރީ ފަހަތުން އަރާ 2-1ންނެވެ. ގްރޫޕްގެ ކޮންމެ ޓީމެއްވެސް އެއް މެޗު ކުޅުނުއިރު ގްރޫޕްގެ އެއްވަނާގައި ތިން ޕޮއިންޓާއެކު އޮތީ ސައޫދީއެވެ. ޕޮލެންޑާއި މެކްސިކޯއަށް ލިބެނީ އެއް ޕޮއިންޓެވެ. ޕޮއިންޓެއް ނުލިބި ގްރޫޕްގެ ފުލުގައި އޮތީ އާޖެންޓީނާއެވެ.